काठमाडौं । प्रमुख प्रतिपक्षी नेपाली कांग्रेसले बोलाएको विपक्षी दलहरूको बैठकले भोटेकोशी-त्रिशूली नदी प्रणालीमा आएको बाढीपछि सरकारबाट भइरहेका उद्धार, राहत तथा पुनःस्थापनाका कामबारे छलफल गरेको छ ।

सिंहदरबारस्थित कांग्रेस संसदीय दलको कार्यालयमा बिहीबार बसेको बैठकमा सरकारले गरेका उद्धार तथा राहतका कामको अवस्थाबारे समीक्षा गरिएको कांग्रेसकी प्रमुख सचेतक बासना थापाले बताइन् ।

उनका अनुसार कांग्रेसले यसअघि नै उद्धार, राहत र पुनःस्थापनासम्बन्धी विषयमा सरकारलाई नौबुँदे ध्यानाकर्षणपत्र बुझाएको थियो । बैठकमा उक्त ध्यानाकर्षणपत्रका विषय तथा सरकारले त्यसको कार्यान्वयनमा गरेका कामबारे पनि छलफल भएको थियो ।

थापाले राहत सामग्री सुरुमा नुवाकोटमा थुप्रिएको र वास्तविक पीडितले राहत नपाएको अवस्था देखिएपछि कांग्रेसले सरकारको ध्यानाकर्षण गराएको बताइन् । अहिले पनि कतिपय ठाउँमा सरकार चुकेको भन्दै उनले निरन्तर खबरदारी गरिरहने बताइन् ।

‘सरकार कहीं-कहीं चुकेको छ । यसमा खबरदारी गर्छौं र गरिरहेका छौं,’ उनले भनिन्, ‘सरकारका सकारात्मक काममा भने हाम्रो समर्थन रहन्छ ।’

बैठकमा राष्ट्रिय स्वतन्त्र पार्टीका सभापतिले बुधबार संसदमा बाढीपछिको उद्धार, राहत तथा पुनःस्थापनाबारे छानबिन तथा अनुगमनका लागि समिति गठन गर्ने विषय उठाएको प्रसंगमा पनि छलफल भएको थियो ।

थापाले बाढीपछिको अवस्थाबारे संसदीय समिति गठन गर्ने विषय सकारात्मक रहेको बताउँदै समिति गठनमा ढिलाइ गर्न नहुने बैठकको निष्कर्ष रहेको जानकारी दिइन् ।