एजेन्सी। उत्तर कोरियाली नेता किम जोङ उनले रुस-युक्रेन युद्धमा सहभागी आफ्ना सैनिकको प्रशंसा गरेका छन् ।

देशको ७८औँ स्थापना दिवसका अवसरमा आयोजित कार्यक्रममा उनले विदेशमा सैन्य जिम्मेवारी सम्हालिरहेका सैनिकप्रति सम्मान व्यक्त गरेका हुन् ।

एक कार्यक्रममा किमले विदेशमा खटिएका उत्तर कोरियाली सेनाका कमान्डर तथा सैनिकको योगदानप्रति विशेष कृतज्ञता व्यक्त गरे ।

‘विदेशमा हुने सैन्य कारबाहीमा सहभागी हाम्रा कमान्डर र सैनिकप्रति विशेष कृतज्ञता र गहिरो सम्मान व्यक्त गर्दछु,’ किमले भने ।

रुसले सन् २०२२ मा युक्रेनमाथि पूर्णस्तरको आक्रमण थालेपछि उत्तर कोरिया मस्कोको निकट सैन्य साझेदारका रूपमा देखिँदै आएको छ । प्योङयाङले रुसी युद्ध प्रयासमा हतियार तथा सैनिक सहयोग गरेको आरोप लाग्दै आएको छ ।

दक्षिण कोरियाली अधिकारीहरूले रुस–युक्रेन युद्धमा सहभागी उत्तर कोरियाली सैनिकमध्ये करिब दुई हजारको मृत्यु भएको दाबी गरेका छन् । तर रुस र उत्तर कोरियाले सैनिक हताहतीबारे आधिकारिक तथ्यांक सार्वजनिक गरेका छैनन् ।

युक्रेनले रुसले उत्तर कोरियाली ब्यालेस्टिक क्षेप्यास्त्र प्रयोग गरिरहेको आरोप लगाउँदै आएको छ । युक्रेनी पक्षले गत अगस्टमा त्यस्तो क्षेप्यास्त्र आक्रमणबाट नौ जनाको मृत्यु र दर्जनौँ घाइते भएको दाबी गरेको थियो ।

युक्रेनले रुसमा करिब ५० हजार उत्तर कोरियाली सैनिक परिचालन हुन सक्ने दाबीसमेत गरेको छ । यद्यपि उक्त संख्याको स्वतन्त्र पुष्टि भएको छैन ।

यसैबीच युक्रेनी राष्ट्रपति भोलोदिमिर जेलेन्स्कीले रुसी क्षेप्यास्त्रबाट सुरक्षाका लागि दक्षिण कोरियासँग हवाई प्रतिरक्षा प्रणाली उपलब्ध गराउन आग्रह गरेका छन् ।

दक्षिण कोरियाले उक्त आग्रहबारे औपचारिक निर्णय सार्वजनिक गरेको छैन।

रुस र उत्तर कोरियाबीच बढ्दो सैन्य सहकार्यले युरोपसँगै कोरियाली प्रायद्वीपको सुरक्षा अवस्थालाई लिएर पश्चिमा मुलुक र दक्षिण कोरियामा समेत चिन्ता बढाएको छ।