काठमाडौं । बालेन सरकार गठन भएपछि दुई मन्त्रीले राजीनामा दिएका छन् । बिहीबार उद्योग, वाणिज्य तथा आपूर्तिमन्त्री गौरीकुमारी यादवले राजीनामा दिएपछि राजीनामा दिने मन्त्रीको संख्या दुई पुगेको हो । 

यसअघि श्रम, रोजगार तथा सामाजिक सुरक्षामन्त्री दीपककुमार साहले राजीनामा दिएका थिए । 

मन्त्रीबाट ‘हट्नू’ भनेर प्रधानमन्त्री बालेनले निर्देशन दिएपछि साहले २६ वैशाख २०८२ मा राजीनामा दिएका थिए । 

स्वास्थ्य बीमा बोर्डमा आफ्नी श्रीमतीलाई सक्रिय बनाउन भूमिका खेलेको आरोप उनीमाथि लागेको थियो। त्यही प्रकरणले उनको पद चट् भयो । साह पनि राजीनामा दिँदै गर्दा निकै दुःखी देखिएका थिए । 

यता, उद्योगमन्त्री यादव ग्यास उद्योगीलाई दिएको विवादास्पद अभिव्यक्तिपछि राजीनामा दिन बाध्य भएकी हुन्।

बुधबार प्रतिनिधिसभाको उद्योग तथा वाणिज्य र श्रम तथा उपभोक्ता हित समितिको बैठकमा उनले ग्यास उद्योगीहरूलाई ‘पाता नफर्काएसम्म’ आपूर्ति सहज नहुने बताएकी थिइन् । उनको यो अभिव्यक्ति निकै विवादित बन्यो ।

उद्योगीहरुले प्रधानमन्त्री बालेनलाई भेटेरै गुनासो गरे । अन्ततः उनी प्रधानमन्त्री बालेनसमक्ष राजीनामा दिन बाध्य भइन् । उनी मन्त्रालयबाट रुँदै बाहिरिएकी थिइन् ।

यसैबीच, रास्वपा सांसद अमरेशकुमार सिंहले प्रधानमन्त्री बालेनले मन्त्री यादवप्रति गुण्डागर्दी शैली अपनाएको भन्दै आलोचना गरे । 

केही दिनअघि नै मन्त्री यादवको घरमा प्रधानमन्त्री बालेन र उनको सचिवालयले राति प्रहरी पठाएर तनाव दिएको सिंहले खुलासा गरे । उनका अनुसार मन्त्री यादवले त्यही दिन राजीनामा दिनुपथ्र्यो ।

एकपछि अर्को मन्त्रीको राजीनामालाई लिएर कतिपयले ‘बालेन मन्त्रिपरिषदको दुई विकेट पतन’ भनेर टिप्पणी गरेका छन् ।