काठमाडौं । प्रधानमन्त्री बालेन शाहले निवर्तमान उद्योगमन्त्री गौरीकुमारी यादवलाई हटाएर दीपक साहलाई उद्योगमन्त्री बनाएपछि सत्तारूढ राष्ट्रिय स्वतन्त्र पार्टी (रास्वपा)भित्र असन्तुष्टि चुलिएको छ ।

विशेषगरी पार्टी सभापति रवि लामिछानेलाई बाइपास गर्दै मन्त्रालयको जिम्मेवारी फेरबदल गरिएको विषयले पार्टीभित्र तरंग ल्याएको बताइएको छ ।

गौरीकुमारी यादव लामिछानेको कोटाबाट मन्त्री बनेकी थिइन् । तर उनलाई हटाएर नयाँ मन्त्री नियुक्त गर्ने निर्णय गर्दा प्रधानमन्त्री शाहले पार्टी सभापति लामिछानेलाई औपचारिक रूपमा जानकारीसमेत नगराएको रास्वपा निकट स्रोतको दाबी छ ।

प्रधानमन्त्री कार्यालय तथा रास्वपा स्रोतका अनुसार यादवको कार्यसम्पादनप्रति प्रधानमन्त्री असन्तुष्ट रहेको जानकारी भने लामिछानेलाई यसअघि नै गराइएको थियो । यादवलाई हटाउने विषयमा लामिछाने पनि सहमत रहेको प्रधानमन्त्री पक्षको भनाइ छ । तर नयाँ मन्त्रीका रूपमा कसलाई ल्याउने भन्ने निर्णयबारे भने लामिछानेलाई शपथ लिनुअघि मात्रै जानकारी दिइएको बताइएको छ ।

यही विषयलाई लामिछानेले गम्भीर रूपमा लिएको स्रोतको दाबी छ । प्रधानमन्त्रीलाई मन्त्री नियुक्त गर्ने अधिकारमाथि विवाद नभए पनि पार्टी सभापतिसँग समन्वय नगरी रास्वपाको कोटामा रहेको मन्त्रालयसमेत आफैंले राखेको शैलीप्रति लामिछाने पक्ष असन्तुष्ट बनेको बताइएको छ ।

प्रधानमन्त्री पक्षले भने यादवको कार्यसम्पादन कमजोर हुँदै गएपछि सुधारका लागि विभिन्न प्रयास गरिएको तर अपेक्षित परिणाम नआएपछि उनलाई हटाउनुपरेको दाबी गरेको छ । पछिल्ला अभिव्यक्तिले समेत समस्या थप जटिल बनाएपछि प्रधानमन्त्री स्वयं एक्सनमा गएको उसको भनाइ छ ।

तर रास्वपाभित्र यो विषयलाई एउटा मन्त्री हटाउने र अर्को नियुक्त गर्ने सामान्य प्रक्रियाका रूपमा मात्र हेरिएको छैन । प्रधानमन्त्री र पार्टी सभापतिबीचको शक्ति सन्तुलन तथा सरकार सञ्चालनमा पार्टी नेतृत्वको भूमिकाबारे समेत प्रश्न उठ्न थालेको स्रोतको दाबी छ ।

मन्त्री तथा अन्य राजनीतिक नियुक्तिमा पार्टी सभापति लामिछानेको स्वाभाविक राजनीतिक चासो रहे पनि पछिल्लो समय प्रधानमन्त्री पक्षले जानकारी गराउने औपचारिकतासमेत घटाउँदै गएको रास्वपाभित्रको बुझाइ रहेको बताइएको छ ।

लामिछाने निकट एक नेताका अनुसार पुराना दलमा देखिएको ‘पार्टी सत्ता कि राज्यसत्ता’ भन्ने विवाद रास्वपामा दोहोरिन नदिन नेतृत्व सचेत हुनुपर्ने धारणा छ । तर पछिल्ला घटनाक्रमले भने त्यस्तै खालको शक्ति संघर्षको संकेत देखाउन थालेको ती नेताको भनाइ छ ।

नवनियुक्त उद्योगमन्त्री दीपक साहको राजनीतिक पृष्ठभूमिलाई लिएर पनि रास्वपाभित्र प्रश्न उठेको बताइएको छ । साह यसअघि सीके राउत निकट राजनीतिक पृष्ठभूमिबाट रास्वपामा आएका नेता हुन् ।

स्रोतका अनुसार प्रधानमन्त्री शाहले सभापति लामिछानेसँग परामर्श गरेको भए लामिछाने पक्षले संसदीय दलका उपनेता गणेश पराजुलीलाई उद्योग मन्त्रालयको जिम्मेवारी दिने तयारी गरेको थियो । 

तर परामर्शको अवसरसमेत नदिई प्रधानमन्त्री पक्षले मन्त्रालय आफ्नै प्रभावमा राखेको बुझाइ रास्वपाको एउटा समूहमा रहेको बताइएको छ ।