काठमाडौं । सत्तारुढ राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंहले पार्टी र सरकारको नेतृत्वमाथि खुलेर असन्तुष्टि जनाएपछि उनको मधेश केन्द्रित राजनीतिक सक्रियता बढेको छ।

प्रधानमन्त्री बालेन्द्र शाह, गृहमन्त्री सुधन गुरुङसहित पार्टी नेतृत्वको कार्यशैलीमाथि संसद्मै प्रश्न उठाउँदै आएका सिंहले छठपछि मधेशमा पदयात्रा गर्ने घोषणा गरेका छन्। त्यसको पूर्वतयारीका रूपमा उनी पछिल्ला दिनमा मधेशका विभिन्न जिल्लामा पुगेर राजनीतिक भेटघाट र अन्तरसंवाद गरिरहेका छन्।

सिंहले रुपन्देही र कपिलवस्तु पुगेर विभिन्न दलसँग आबद्ध तथा प्रभावशाली नेताहरूसँग भेट गरेका छन्। उनले ती भेटघाटलाई आफ्नो आगामी पदयात्राको तयारीका रूपमा प्रस्तुत गरेका छन्।

‘छठपछि हुने मेरो पदयात्राको पूर्वतयारीका लागि आज कपिलवस्तु र भैरहवामा भेटघाट तथा अन्तरक्रिया, आज र भोलि भैरहवा र कपिलवस्तुमा हुनेछु,’ सिंहले सामाजिक सञ्जालमार्फत जानकारी दिएका थिए।

कपिलवस्तुमा सिंहले कांग्रेसका पूर्वकेन्द्रीय सदस्य तथा भारतका पूर्वराजदूत दीपकुमार उपाध्याय, कांग्रेस नेता अभिषेकप्रताप शाह, नेकपाका नेता बृजेश गुप्ता, दानबहादुर चौधरी, ईश्वरदयाल मिश्र, मिर्जारसिद बेगलगायतसँग भेटघाट गरेका छन्।

पूर्वराजदूत उपाध्यायले सिंहसँग जिल्लामा भेट भएको र उनको प्रस्तावित मधेश पदयात्राबारे छलफल भएको बताए।

कांग्रेस नेता तथा कपिलवस्तु–३ का सांसद अभिषेकप्रताप शाहले पनि सिंहसँग आफ्नै निवासमा भेट भएको र समसामयिक विषयमा कुराकानी भएको बताएका छन्।

रुपन्देहीमा पनि सिंहले रास्वपाका नेता, सांसद तथा शुभेच्छुकहरूसँग भेटघाट गरेका छन्। रुपन्देही–५ का सांसद तौफिफ खानसँग भेट गर्नुका साथै बुटवलमा आयोजित अन्तरसंवादमा समेत उनी सहभागी भएका थिए।

रास्वपा रुपन्देहीका सचिव ज्ञानेन्द्र पाण्डेका अनुसार सिंह केही दिनयता रुपन्देही र कपिलवस्तुका विभिन्न स्थानमा भेटघाट गरेर काठमाडौं फर्किएका छन्।

सिंहले पछिल्लो समय सरकार र आफ्नै पार्टीको कार्यशैलीमाथि लगातार प्रश्न उठाउँदै आएका छन्। उनले रास्वपा संसदीय दलको बैठकमै मधेशमा ठूलो असन्तुष्टि रहेको र छठपछि मधेशमा पुग्दा पार्टीका सांसदहरूले जनताको आक्रोश सामना गर्नुपर्ने चेतावनी दिएका थिए।

उनको यही अभिव्यक्तिपछि अहिलेको मधेश दौडाहालाई राजनीतिक रूपमा अर्थपूर्ण मानिएको छ।

तर सिंहको सक्रियतालाई लिएर सामाजिक सञ्जालमा भने समर्थनभन्दा आलोचनाका आवाज बढी देखिएका छन्। पार्टीका केही शुभेच्छुकले सरकार र पार्टीलाई कमजोर बनाउने गरी अभिव्यक्ति नदिन आग्रह गरेका छन् भने केहीले उनको गतिविधिलाई व्यक्तिगत राजनीतिक महत्वाकांक्षासँग जोडेर प्रश्न उठाएका छन्।

सामाजिक सञ्जालमा आएका प्रतिक्रियामा सिंहलाई पार्टीभित्रैबाट असहयोग गरिरहेको आरोप लगाउनेदेखि सरकारलाई खबरदारी गर्नु सकारात्मक भए पनि स्थिरता खलबल्याउने गतिविधि नगर्न आग्रह गर्नेसम्मका टिप्पणी छन्।

सिंहले सरकार र पार्टी नेतृत्वमाथि आलोचना गरेपछि आचार्य श्रीनिवासले पनि उनको अभिव्यक्तिको कडा प्रतिवाद गरेका छन्। उनले सिंहमाथि रास्वपालाई कमजोर बनाउने र विभाजनतर्फ धकेल्ने प्रयास गरेको आरोप लगाएका छन्।

यस्तै, जनता लोकतान्त्रिक पार्टीका अध्यक्ष अशोक यादवले सिंहको लुम्बिनी तथा सुदूरपश्चिम क्षेत्रमा बढ्दो राजनीतिक सक्रियतामाथि प्रश्न उठाएका छन्।

उनले सिंहको सक्रियता जनसेवाका लागि हो वा व्यक्तिगत राजनीतिक विस्तारका लागि भन्ने प्रश्न गर्दै राजनीतिक पारदर्शिता र जवाफदेहिताको आवश्यकता औंल्याएका छन्।

यादवले सिंहको विगतको राजनीतिक भूमिकालाई लिएर विभिन्न किसिमका आरोप सार्वजनिक बहसमा आउने गरेको उल्लेख गर्दै प्रमाणबिना कसैलाई विदेशी एजेन्ट भन्न नहुने, तर त्यस्ता प्रश्न उठेपछि राजनीतिक रूपमा स्पष्ट जवाफ दिनुपर्ने बताएका छन्।

सिंहको मधेश पदयात्रालाई कतिपयले रास्वपाभित्रै नयाँ राजनीतिक ध्रुवीकरणको सम्भावनासँग जोडेर हेर्न थालेका छन्। मधेशमा अन्य दलका असन्तुष्ट तथा प्रभावशाली नेतासँग सिंहले गरिरहेको भेटघाटले पनि यस्तो आशंकालाई थप बल दिएको छ।

तर सिंहको वास्तविक राजनीतिक उद्देश्य भने पदयात्रा सुरु भएपछि मात्रै थप स्पष्ट हुने देखिन्छ।

सिंहले मधेशमा असन्तुष्टि बढेको दाबी गर्दै आएका छन्। छठपछि मधेशमा रास्वपाका सांसदले जनताको आक्रोश सामना गर्नुपर्ने उनको चेतावनीले उनको आगामी अभियानलाई अझ चासोको विषय बनाएको छ।