काठमाडौं । सर्वोच्च अदालतमा फेरि आगलागी भएको छ। अदालतको निर्माणाधीन भवनअन्तर्गत मुद्दा फाँटमा रहेको मल्टिप्लगमा विद्युत् सर्ट हुँदा आगलागी भएको प्रारम्भिक जानकारी दिइएको छ।

सर्वोच्च अदालतका प्रवक्ता अर्जुन कोइरालाका अनुसार बन्द कोठाभित्र आगलागी भएको हो। आगो ठूलो रूपमा फैलिन नपाउँदै प्रहरी र दमकलको टोली पुगेर नियन्त्रणमा लिएको उनले बताए।

‘मुद्दा फाँटको मल्टिप्लगमा विद्युत् सर्ट भएर आगलागी भएको छ। बन्द कोठाभित्र आगो लागेको हो। ठूलो क्षति भएको होइन,’ प्रवक्ता कोइरालाले भने।

आगलागीबाट एउटा टेबल र तीनवटा कम्प्युटर जलेका छन्। मुद्दाका मिसिल तथा अन्य महत्वपूर्ण अभिलेखमा भने क्षति नभएको अदालतले जनाएको छ।

सर्वोच्च अदालतमा यसअघि १७ भदौमा पनि आगलागी भएको थियो। त्यसबेला अभिलेख शाखामा आगलागी हुँदा महत्वपूर्ण कागजात र संरचनामा क्षति पुगेको थियो।

उक्त घटनाको छानबिन भइरहेकै बेला फेरि अर्को आगलागी भएको हो। लगातार आगलागीका घटना भएपछि अदालत परिसरको विद्युत् प्रणाली र सुरक्षा व्यवस्थामाथि प्रश्न उठ्न थालेको छ।

सर्वोच्च अदालत यसअघि जेनजी आन्दोलनका क्रममा भएको आगजनीबाट समेत प्रभावित भएको थियो। आन्दोलनका क्रममा अदालतमा आगजनी र तोडफोड हुँदा भौतिक संरचनामा ठूलो क्षति पुगेको थियो।

त्यसपछि अदालतको सुरक्षा, अभिलेख संरक्षण र भौतिक संरचनाको पुनःव्यवस्थापनको विषय चर्चामा आएको थियो। १७ भदौको आगलागीपछि त्यसको कारणबारे छानबिन भइरहेकै अवस्थामा फेरि विद्युत् सर्टबाट आगलागी भएको घटनाले सुरक्षा सतर्कतामाथि थप प्रश्न उठाएको छ।

यसपटक भने आगो समयमै नियन्त्रणमा लिइएकाले मुद्दाका मिसिल तथा महत्वपूर्ण अभिलेख जोगिएको अदालतले जनाएको छ।