काठमाडौं । रसुवाको भोटेकोशीमा आएको विनाशकारी बाढीपछि उद्धार, राहत, पुनर्निर्माण र विपद् व्यवस्थापनका काममा सहजीकरण गर्न सर्वदलीय संयन्त्र गठन हुने भएको छ।

बुधबार बसेको सर्वदलीय बैठकले सात दिनभित्र संयन्त्र गठन गर्ने गरी समयसीमा तोकेर छलफल अघि बढाएको हो। बैठकपछि राप्रपा सांसद ज्ञानेन्द्र शाहीले एक साताभित्र सर्वदलीय संयन्त्र बनाउने विषयमा सहमति जुटेको जानकारी दिए।

उनका अनुसार विपद्बारे छानबिन गर्न संसदीय समिति गठन गर्ने विषयमा समेत छलफल भएको छ। त्यस्तै, विपद् तथा अन्य राष्ट्रिय संकटमा लागू हुने ‘सनसेट ल’ को अवधारणाबारे पनि बैठकमा कुरा उठेको शाहीले बताए।

भदौ १० गते भोटेकोशीमा ठूलो बाढी आएपछि रास्वपा सभापति रवि लामिछानेले भोलिपल्टै सर्वदलीय बैठक बोलाएर उद्धार, राहत र पुनर्स्थापनाका लागि साझा संयन्त्र बनाउन प्रस्ताव गरेका थिए।

त्यस बैठकमा रास्वपासहित नेपाली कांग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी, राप्रपा, जसपा र जनमत पार्टीका नेताहरू सहभागी थिए।

लामिछानेले सरकारलाई निर्णय र कार्यान्वयनमा सहयोग पुग्ने गरी सर्वदलीय, सर्वपक्षीय वा संसदीय संयन्त्र बनाउनुपर्ने प्रस्ताव राखेका थिए। त्यसपछि जारी १० बुँदे संकल्पमा पनि विपद्पछिको पुनर्निर्माण, जलवायु अनुकूलन, राष्ट्रिय विपद् नीति सुधार तथा सरकारी कामको अनुगमनका लागि संसदीय समिति गठन गर्ने विषय समेटिएको थियो।

संकल्पमा प्रस्तावित संयन्त्रलाई तत्कालको संकट व्यवस्थापनमा मात्र सीमित नराखी विपद्पूर्व तयारी, दिगो विकास र नीतिगत सुधारमा समेत प्रयोग गर्ने उल्लेख थियो।

भदौ १६ गते बसेको सर्वदलीय बैठकले पनि संयन्त्र गठन गर्ने विषयमा सहमति जनाएको थियो। तर त्यसपछि यसको औपचारिक गठन हुन सकेन।

बुधबारको बैठकले भने पहिलोपटक गठनको समयसीमा नै तोकेको हो। अब सात दिनभित्र संयन्त्रको संरचना, जिम्मेवारी र कार्यक्षेत्र टुंग्याएर गठन गर्ने तयारी छ।

विपद्पछिको पुनर्निर्माणसँगै भविष्यमा यस्ता संकट आउँदा राज्यका निकायबीच समन्वय, पूर्वतयारी र नीतिगत सुधारमा पनि संयन्त्रले भूमिका खेल्ने विषयमा छलफल भएको छ।