काठमाडौं । दशैंमा सरकारी सहुलियतको खसीबोका खोज्ने उपभोक्ताका लागि यसपटक निराशाजनक खबर आएको छ। खाद्य व्यवस्था तथा व्यापार कम्पनीले यस वर्ष दशैंका लागि खसीबोका र च्याङ्ग्रा बिक्री नगर्ने भएको छ।

हरेक वर्ष दशैंको समयमा बजार मूल्य नियन्त्रण र उपभोक्तालाई केही राहत दिने उद्देश्यले खसी, बोका तथा च्याङ्ग्रा खरिद गरेर सुपथ मूल्यमा बिक्री गर्दै आएको कम्पनी यसपटक बजेट अभाव देखाउँदै उक्त कारोबारबाट बाहिरिएको हो।

कम्पनीका सूचना अधिकारी माधव मिश्रका अनुसार खसीबोका खरिदका लागि चालु आर्थिक वर्षमा बजेट नै छुट्याइएको छैन। बजेट नभएपछि खरिद प्रक्रिया अघि नबढाइएको उनले बताए।

‘अघिल्ला वर्षमा दशैंका लागि खाद्यले आफैं खसीबोका खरिद गरेर सुपथ मूल्यमा बिक्री गर्दै आएको थियो। यस वर्ष भने बिक्री नगर्ने निर्णय भएको छ। यो शीर्षकमा बजेट नै विनियोजन भएको छैन,’ मिश्रले भने।

यससँगै दशैंको बजारमा सरकारी कम्पनीबाट सहुलियत दरमा खसीबोका र च्याङ्ग्रा बिक्री हुने परम्परा यस वर्ष रोकिने भएको छ।

खसीबोका बिक्री नगरे पनि खाद्य कम्पनीले चाडपर्व लक्षित सुपथ मूल्य पसल भने सञ्चालन गरिरहेको छ।

कम्पनीले भदौ २८ गतेदेखि देशभर ४४ जिल्लाका १९३ स्थानमा सुपथ मूल्य पसल सञ्चालनमा ल्याएको छ। ती पसलबाट चामल, दाल, तेल, चिनी र नुनलगायत दैनिक उपभोग्य वस्तु बिक्री भइरहेको छ।

त्यस्तै, स्थानीय उत्पादनलाई समेत प्राथमिकता दिँदै चिनो, कागुनो, फापर, सिमीलगायत खाद्यवस्तु बिक्रीमा राखिएको कम्पनीले जनाएको छ।

सुपथ मूल्य पसलबाट बिक्री हुने दैनिक उपभोग्य वस्तुमा उपभोक्तालाई प्रतिकिलो वा प्रतिइकाइ पाँच रुपैयाँसम्म छुट दिने व्यवस्था गरिएको छ।

तर, दशैंको मुख्य उपभोग्य वस्तुमध्ये पर्ने खसीबोका र च्याङ्ग्रामा भने यसपटक सरकारी सहुलियत नपाइने भएको छ।