काठमाडौं । प्रमुख प्रतिपक्षी नेपाली कांग्रेसकी सांसद गंगालक्ष्मी अवालले प्रधानमन्त्री बालेन्द्र शाह ‘बालेन’को विदेश भ्रमणबारे संसदलाई जानकारी नदिएको भन्दै प्रश्न उठाएकी छन्।

बिहीबार प्रतिनिधिसभाको बैठकमा विशेष समयमा बोल्दै उनले प्रधानमन्त्री संयुक्त राष्ट्रसंघको ८१औँ महासभामा सहभागी हुन न्युयोर्क पुगेको जानकारी सांसदहरूले सञ्चारमाध्यमबाट मात्रै पाउनुपर्ने अवस्था किन आयो भन्दै प्रश्न गरिन्।

‘प्रधानमन्त्रीज्यू संयुक्त राष्ट्रसंघको ८१औँ महासभामा नेपालको प्रतिनिधित्व गर्न न्युयोर्क पुगेको जानकारी हामीले सञ्चारमाध्यमबाट प्राप्त गर्‍यौँ। नेपालको प्रधानमन्त्री कहाँ जाँदै हुनुहुन्छ भन्ने जानकारी संसदले सञ्चारमाध्यमबाट मात्र थाहा पाउनुपर्ने हो ?’ उनले प्रश्न गरिन्।

अवालले यो विषय सामान्य सूचना व्यवस्थापनको कमजोरी मात्र नभई संसदप्रतिको सरकारको दृष्टिकोणसँग जोडिएको बताइन्।

उनका अनुसार संविधानले राज्यका विभिन्न अंगबीचको सम्बन्ध, नियन्त्रण र सन्तुलन तथा संसदीय जवाफदेहितालाई लोकतान्त्रिक शासनको आधार मानेको छ। त्यसैले प्रधानमन्त्रीको विदेश भ्रमणजस्तो महत्त्वपूर्ण विषयमा संसदलाई जानकारी गराउनु आवश्यक रहेको उनको भनाइ छ।

अवालले संसद कानुन निर्माण गर्ने थलो मात्र नभई सरकारलाई प्रश्न गर्ने, सरकारी कामको अनुगमन गर्ने र सरकारलाई जनताप्रति उत्तरदायी बनाउने प्रमुख जनप्रतिनिधिमूलक संस्था भएको बताइन्।

प्रधानमन्त्री विदेश गएको वा नगएको विषयभन्दा पनि प्रधानमन्त्री र संसदबीचको सम्बन्ध कस्तो रहने भन्ने विषय महत्वपूर्ण रहेको उनले उल्लेख गरिन्।

‘प्रधानमन्त्री विदेश जानुभयो कि भएन भन्ने कुराभन्दा पनि प्रधानमन्त्री र संसदबीचको सम्बन्ध कस्तो रहने भन्ने कुरा ठूलो प्रश्न हो,’ उनले भनिन्।

उनले राष्ट्रिय महत्त्वका विषयमा संसदलाई जानकारी नदिने, संसदमा उपस्थित भएर जनप्रतिनिधिका प्रश्नको जवाफ नदिने तथा महत्त्वपूर्ण सरकारी निर्णय र गतिविधिबारे संसदलाई आवश्यक जानकारीबाट टाढा राख्ने प्रवृत्तिमाथि पनि प्रश्न उठाइन्।

अवालले प्रधानमन्त्रीको विदेश भ्रमणलाई व्यक्तिगत गतिविधिका रूपमा बुझ्न नहुने बताइन्।

उनका अनुसार प्रधानमन्त्री विदेश जाँदा उनी व्यक्तिगत हैसियतमा मात्र नभई नेपालको प्रतिनिधिका रूपमा अन्तर्राष्ट्रिय मञ्चमा उपस्थित हुन्छन्। त्यसैले त्यस्ता भ्रमणबारे संसदलाई जानकारी गराउनु संसदीय जवाफदेहितासँग जोडिएको विषय भएको उनको भनाइ छ।

‘प्रधानमन्त्री एक्लै राष्ट्र होइन, सरकार एक्लै राज्य होइन। प्रधानमन्त्रीको अन्तर्राष्ट्रिय उपस्थिति व्यक्तिगत उपस्थिति होइन, त्यो नेपालको प्रतिनिधित्व हो,’ उनले भनिन्।

अवालले सरकारका महत्त्वपूर्ण निर्णय र गतिविधिबारे संसदलाई नियमित जानकारी गराउने अभ्यास बलियो बनाउनुपर्ने धारणा राखिन्।