काठमाडौं । नेकपा एमालेले पूर्वराष्ट्रपति विद्यादेवी भण्डारीलाई पार्टीको वरिष्ठ नेता बनाउने प्रस्ताव अघि सारेको छ।

बिहीबार बसेको एमाले केन्द्रीय सचिवालय बैठकमा अध्यक्ष केपी शर्मा ओलीले भण्डारीलाई वरिष्ठ नेता बनाउने प्रस्ताव गरेका हुन्। सचिवालयबाट प्रस्ताव अघि बढे पनि यसको अन्तिम अनुमोदन भने केन्द्रीय कमिटीबाट हुन बाँकी छ।

भण्डारीलाई वरिष्ठ नेता बनाउने निर्णयसँगै उनको सक्रिय राजनीतिक पुनरागमनले औपचारिक रूप लिने भएको छ। उनी यसअघि लामो समय राष्ट्रपतिको जिम्मेवारीमा रहेकी थिइन्।

भण्डारीले सक्रिय राजनीतिमा फर्किन चाहेको विषय लामो समयदेखि एमालेभित्र बहसमा थियो। पूर्वराष्ट्रपति पदको गरिमा र संवैधानिक भूमिकालाई ध्यानमा राख्दै उनलाई तत्काल पार्टी राजनीतिमा फर्काउन नहुने तर्क एमालेभित्र उठेको थियो।

त्यसै कारण विगतमा उनको पार्टी सदस्यता नवीकरणको विषयसमेत रोकिएको थियो। पछि एमालेले भण्डारीलाई पार्टी सदस्यता दिने निर्णय गरेपछि उनको औपचारिक राजनीतिक पुनरागमनको बाटो खुलेको थियो।

भण्डारीको सदस्यता कायम गर्ने निर्णयसँगै उनी पार्टी राजनीतिमा सक्रिय हुन पाउने अवस्थामा पुगेकी थिइन्। अहिले भने उनलाई वरिष्ठ नेताको जिम्मेवारी दिने प्रस्ताव सचिवालयबाट अघि बढाइएको हो।

भण्डारीको पार्टी सदस्यता रोकिँदा उनको सक्रिय राजनीतिमा फर्किने विषयलाई लिएर एमालेभित्र मतभेद देखिएको थियो। अहिले भने अध्यक्ष ओलीकै प्रस्तावमा उनलाई वरिष्ठ नेता बनाउने प्रक्रिया अघि बढेको छ।

यसअघि एमालेको केन्द्रीय कमिटीले पूर्वराष्ट्रपति सक्रिय राजनीतिमा आउन नहुने धारणा राखेको थियो। राष्ट्रपतिको पद दलीय राजनीतिभन्दा माथि रहने संवैधानिक भूमिकासँग जोडिएको भन्दै त्यतिबेला भण्डारीको पार्टी पुनरागमनबारे प्रश्न उठाइएको थियो।

तर पछिल्लो समय पार्टी सदस्यता कायम गर्ने निर्णयपछि एमालेभित्र उनको भूमिकाबारे नयाँ बहस सुरु भएको थियो।

सचिवालयले अघि सारेको प्रस्ताव अब केन्द्रीय कमिटीमा जानेछ। केन्द्रीय कमिटीले अनुमोदन गरेपछि भण्डारी एमालेको वरिष्ठ नेताको भूमिकामा औपचारिक रूपमा रहनेछिन्।

एमालेले अहिले सांगठनिक पुनर्गठन, स्थायी कमिटी तथा पोलिटब्युरो गठनलगायत विषयमा निर्णय गरिरहेको छ। यही क्रममा पूर्वराष्ट्रपति भण्डारीलाई वरिष्ठ नेताको जिम्मेवारी दिने प्रस्ताव अघि बढेको हो।

भण्डारीको पार्टीमा पुनरागमनसँगै एमालेभित्र उनको आगामी भूमिका र पार्टी राजनीतिमा रहने जिम्मेवारीबारे थप चासो बढेको छ।