अस्ट्रेलिया। अस्ट्रेलियाको प्रमुख बजेट एयरलाइन्स जेटस्टारका कर्मचारी पारिश्रमिक र सेवा सुविधासम्बन्धी माग राख्दै औद्योगिक आन्दोलनमा उत्रिएका छन्।

अस्ट्रेलियन सर्भिसेस युनियन (एएसयू) मा आबद्ध करिब एक हजार ग्राहक सेवा तथा विमानस्थल कर्मचारीले सेप्टेम्बर २३ र २४ मा औद्योगिक कारबाही गरेका थिए। उनीहरूले यात्रुलाई सेवा दिन जारी राखे पनि अतिरिक्त ब्यागेज, सिट परिवर्तन र ढिलो शुल्कलगायतका केही बिक्रीसम्बन्धी शुल्क नलिने वा शून्यमा रेकर्ड गर्ने गतिविधि गरेका थिए।

के मागिरहेका छन् कर्मचारी ?

युनियनले कर्मचारीको तलब वृद्धि, ओभरटाइम तथा पेनाल्टी दरमा सुधार, बिदासम्बन्धी सुविधा र रोजगारीको सुरक्षा सुनिश्चित गर्न माग गरेको छ। त्यस्तै, पद कटौतीबाट संरक्षण तथा अत्यधिक गर्मी र खराब मौसममा काम गर्ने कर्मचारीको सुरक्षाको विषय पनि उठाएको छ।

जेटस्टारले भने तलब वृद्धि, पेनाल्टी भुक्तानी तथा भत्तामा सुधार र कामको रोस्टरमा थप लचकतासहितको प्रस्ताव अघि सारेको जनाएको छ। औद्योगिक कारबाहीका कारण उडान सञ्चालनमा ठूलो असर नपर्ने गरी तयारी गरिएको कम्पनीको भनाइ थियो।

सेप्टेम्बर २३ र २४ को औद्योगिक कारबाहीपछि जेटस्टारले युनियनसँग वार्ताका लागि पहल गरेको छ। एएसयूका अनुसार कम्पनीले सेप्टेम्बर २८, सोमबार हुने बैठकमा संशोधित प्रस्ताव पेस गर्नेछ।

त्यसअघि थप औद्योगिक कारबाही घोषणा गरिएको छैन। यसअघि वार्ता निष्कर्षमा पुग्न नसके थप आन्दोलन गर्न सक्ने संकेत युनियनले दिएको थियो।

अब कर्मचारीको अर्को कदम सोमबार हुने वार्ता र कम्पनीले पेस गर्ने संशोधित प्रस्तावमा निर्भर हुनेछ।

जेटस्टारको उडानबाट यात्रा गर्ने यात्रुलाई आफ्नो उडानको पछिल्लो अवस्था कम्पनीको आधिकारिक वेबसाइट वा एपमार्फत जाँच गर्न आग्रह गरिएको छ।