काठमाडौं। देवचुली नगरपालिका-१६ टाँगिकोटस्थित नारायणगढ-बुटवल सडकखण्डअन्तर्गत चाइना कम्पनीको परिसरमा ट्याक्टरको ट्रली पल्टिँदा एक महिलाको मृत्यु भएको छ।

लु.२ त ६८११ नम्बरको ट्याक्टरको ट्रलीमा कम्पनीका ब्लक लोड गरिएको थियो। ट्रलीको पछाडिपट्टि बसिरहेकी देवचुली नगरपालिका-४ निवासी करिब ४० वर्षीया मनकुमारी सोती मगर ट्रली पल्टिएपछि च्यापिएकी थिइन्।

ट्रलीको ढालाले टाउकोदेखि कम्मरसम्मको भाग च्यापिँदा उनको घटनास्थलमै मृत्यु भएको प्रहरीले जनाएको छ।

घटनाको जानकारी पाएलगत्तै प्रहरी नायब निरीक्षक ज्ञानप्रसाद काफ्लेको कमाण्डमा ७ जनाको प्रहरी टोली घटनास्थलमा पुगेको थियो। प्रहरीले ट्रली उठाएर उद्धारको प्रयास गरे पनि मगरको मृत्यु भइसकेको पाइएको जनाएको छ।

घटनाबारे मृतकका आफन्तलाई जानकारी गराइएको छ भने शव घटनास्थलमै रहेको प्रहरीले जनाएको छ। घटनाबारे थप अनुसन्धान भइरहेको छ।