काठमाडौं । जापानको आइची इन्टरनेसनल एरिनामा जारी २०औँ एसियाली खेलकुदअन्तर्गत जुडोमा नेपालका चार खेलाडी आ-आफ्नो स्पर्धामा पराजित भएका छन्।

महिला ४८ केजी तौल समूहको राउन्ड अफ १६ मा नेपालकी निशा श्रेष्ठ हङकङकी का ली वोङसँग २ मिनेट ३२ सेकेन्डमा इप्पोनबाट पराजित भइन्।

त्यस्तै, महिला ५२ केजी तौल समूहको राउन्ड अफ १६ मा देवकीमाया श्रेष्ठ भियतनामकी थि नगान हा लामसँग युकोबाट पराजित भइन्। उक्त खेल ०:०० मा टुंगिएको थियो।

पुरुष ६६ केजी तौल समूहको राउन्ड अफ ३२ मा नेपालका विशाल विक हङकङका का कि वोङसँग वाजाआरीबाट पराजित भए। उक्त खेलको नतिजा पनि ०:०० मा आएको थियो।

साथै, ६० केजी तौल समूहको राउन्ड अफ १६ मा भने नेपालका विकास विक उज्बेकिस्तानका समरिद्दिन कुचकारोभसँग ३ मिनेट १२ सेकेन्डमा इप्पोनबाट पराजित भए।