काठमाडौं । नेपाली कांग्रेसको १५औँ महाधिवेशनका लागि प्रतिनिधि छान्ने क्रममै पार्टीभित्र विवादको चाङ देखिन थालेको छ। क्षेत्रीय कार्यसमिति प्रायः सर्वसम्मत बने पनि महाधिवेशन प्रतिनिधि छनोटमा भने ठाउँठाउँमा किचलो निस्किएको हो।

स्याङ्जा–२ देखि सिन्धुपाल्चोक–२, काभ्रे–२, दैलेख–२ हुँदै काठमाडौं–३ सम्म निर्वाचन प्रक्रिया, मतपत्र र सर्वसम्मतिको नाममा प्रतिनिधि छनोट गर्ने विषय विवादित बनेको छ।

सिन्धुपाल्चोक–२ को क्षेत्रीय अधिवेशन मतदानका क्रममा रोकिएको छ। मतदान अधिकृतको हस्ताक्षर नभएका मतपत्र प्रयोग भएको भन्दै विवाद भएपछि प्रक्रिया स्थगित गरिएको हो।

नेता वंशलाल तामाङ पक्षले मतदानमा धाँधली भएको आरोप लगाएपछि विवाद चर्किएको थियो। यही क्रममा तामाङले मतपेटिकामा लात हानेको भिडियोसमेत सामाजिक सञ्जालमा सार्वजनिक भएको छ। भिडियोमा उनले हस्ताक्षर नभएका मतपत्रबारे प्रश्न उठाउँदै आक्रोश व्यक्त गरेको सुनिन्छ।

क्षेत्रीय सभापतिका लागि कृष्णकुमार तामाङ र पासाङ दोङ प्रतिस्पर्धामा छन्। निर्वाचन समितिले दुवै पक्षबीच सहमतिको वातावरण बनेपछि मात्र मतदान अघि बढाउने जनाएको छ।

काभ्रे–२ मा मनोनयन दर्ता गरिसकेका उम्मेदवारको अन्तिम नामावलीसमेत सार्वजनिक नगरी सहमतिका नाममा महाधिवेशन प्रतिनिधि चयन गर्न खोजिएको भन्दै असन्तुष्टि देखिएको छ।

काभ्रे–२ का २३ जना महाधिवेशन प्रतिनिधिका उम्मेदवारले निर्वाचन प्रक्रिया अघि बढाउन माग गर्दै केन्द्रीय निर्वाचन समितिमा निवेदन दिएका छन्। उनीहरूले उम्मेदवारहरूसँग आवश्यक समन्वय नगरी निर्वाचन सम्पन्न भएको सूचना जारी गरिएको दाबी गरेका छन्।

दैलेख–२ मा भने महाधिवेशन प्रतिनिधि छनोटका लागि निर्वाचन हुनुपर्ने माग गर्दै निर्वाचन समितिको कार्यालयमै तालाबन्दी गरिएको छ।

सर्वसम्मतिको नाममा सूचना टाँसेर प्रतिनिधि चयन गर्न खोजिएको भन्दै उम्मेदवारहरूले मंगलबार कार्यालयमा तालाबन्दी गरेका हुन्। बुधबार दिउँसोसम्म पनि मतदान प्रक्रिया अघि बढाउने विषयमा निर्णय नभएको र तालाबन्दी कायमै रहेको महाधिवेशन प्रतिनिधिका आकांक्षी रामचन्द्र भण्डारीले बताएका छन्।

स्याङ्जा–२ मा मतदान व्यवस्थापन फितलो भएको भन्दै विवाद भएको छ। निर्वाचन समितिले बैठक बसेर मतदान प्रक्रिया अघि बढाउने तयारी गरेको जनाएको छ।

काठमाडौं–३ मा क्षेत्रीय सभापति पदको निर्वाचन प्रक्रिया रद्द गर्न माग गर्दै उजुरी परेको छ।

क्षेत्रीय सभापतिका उम्मेदवार दुर्गा ढुंगेलले जिल्ला निर्वाचन अधिकृतसमक्ष निवेदन दिँदै उम्मेदवारहरूलाई मनोनयन तथा अन्य प्रक्रिया पूरा गर्न पर्याप्त सूचना र अवसर नदिई एक उम्मेदवारलाई विजयी घोषणा गरिएको दाबी गरेका छन्। त्यसैले निर्वाचन प्रक्रिया रद्द गर्नुपर्ने उनको माग छ।

कांग्रेसको १५औँ महाधिवेशन असोज १८ गतेदेखि काठमाडौंको खुलामञ्चमा हुने तय भएको छ। भारी वर्षाका कारण केही क्षेत्रको अधिवेशन तथा प्रतिनिधि छनोट प्रक्रिया प्रभावित भएपछि महाधिवेशनको मिति दुई दिन पछि सारिएको हो।

निर्वाचन समितिले प्रतिनिधि छनोटको बाँकी प्रक्रिया बिहीबारसम्म पूरा हुने जनाएको छ।