काठमाडौं । प्रतिनिधिसभाको बिहीबारको बैठक सुरु भएको केही मिनेटमै सभाहलको माहोल हाँसोयुक्त बन्यो।

राष्ट्रिय गान सकिएपछि बैठकको कारबाही अघि बढ्दै थियो। त्यही क्रममा श्रम संस्कृति पार्टीका सांसद ध्रुवराज राई आफ्नो आसनबाट उठे र बोल्नका लागि समय मागे।

सभामुख डोलप्रसाद अर्यालले समय दिएपछि रोस्ट्रममा पुगेका राईले भने, ‘सम्माननीय सभामुख महोदय, कुरा त्यही हजुर, धन्यवाद।’

यति भन्दै उनी तुरुन्तै आफ्नो आसनमा फर्किए।

राईले लामो मन्तव्य राख्लान् भन्ने अपेक्षामा रहेका सांसदहरू उनको छोटो जवाफपछि हाँसे। सभामुख अर्याल पनि मुसुमुसु हाँसेको देखियो।

संसद्मा प्रायः सांसदहरूले लामो समय लिएर आफ्ना धारणा राख्ने गरे पनि राईको उक्त छोटो सम्बोधन भने बिहीबारको बैठकको सुरुवातमै चर्चाको विषय बन्यो।

भोजपुर–१ बाट प्रतिनिधिसभामा प्रतिनिधित्व गर्ने राई श्रम संस्कृति पार्टीका प्रमुख सचेतकसमेत हुन्।