काठमाडौं । प्रधानमन्त्री बालेन्द्र शाहले इन्जिनियरिङ पृष्ठभूमिका सांसदलाई ‘एक्स्ट्रा अर्डिनरी’ भन्दै नयाँ सोच ल्याउन आग्रह गरेको भोलिपल्टै रास्वपा महामन्त्री विपिनकुमार आचार्यले आफू पनि ‘एक्स्ट्रा अर्डिनरी’ बन्ने प्रयासमा रहेको बताएका छन्।

बिहीबार प्रतिनिधिसभाको शून्य समयमा बोल्दै आचार्यले आफू औसत क्षमताको इन्जिनियर भए पनि क्षमता, नियत र तथ्यका आधारमा अब्बल व्यक्तिबाट प्रभावित हुने बताए।

‘म औसत क्षमताको इन्जिनियर भएर होला, मलाई हरेक विधाका क्षमता, नियत र तथ्यमा अब्बल व्यक्तिहरू एक्स्ट्रा अर्डिनरी लाग्छ । म आफैँ पनि एक्स्ट्रा अर्डिनरी बन्न कोसिस गर्दैछु,’ उनले भने।

आचार्यले प्रधानमन्त्री शाहको नाम भने लिएनन्। तर, अघिल्लो दिन शाहले इन्जिनियरिङ पृष्ठभूमिका १७ सांसदसँग छलफल गर्दै उनीहरूलाई प्राविधिक ज्ञान र अनुभवमार्फत विकासमा योगदान गर्न आग्रह गरेका थिए।

त्यसै प्रसंगतर्फ संकेत गर्दै आचार्यले संसद्मा अर्को विषय पनि उठाए।

आचार्यले नेपाली मुद्राको आफ्नै प्रतीक बनाउन सरकारको ध्यानाकर्षण गराए।

डलर, युरो, पाउन्ड, येन, युआन र भारतीय रुपैयाँजस्ता मुद्राको छुट्टै प्रतीक रहेको उल्लेख गर्दै उनले नेपाली मुद्राको पनि मौलिक प्रतीक आवश्यक रहेको बताए।

त्यस्तै, उनले देवनागरी लिपिको मौलिकता र नेपालको पहिचान झल्किने गरी प्रतीक निर्माण गर्न अर्थ मन्त्रालय र नेपाल राष्ट्र बैंकलाई आग्रह गरे।

डिजिटल कारोबार र फिनटेकको विस्तारसँगै नेपाली मुद्राको छुट्टै प्रतीकले यसको पहिचान र प्रयोगलाई थप सहज बनाउन सक्ने उनको भनाइ थियो।

प्रधानमन्त्री शाहले भने इन्जिनियरिङ तथा प्राविधिक पृष्ठभूमिका सांसदलाई दीर्घकालीन नीति, औद्योगिकीकरण र नयाँ विचारमा केन्द्रित हुन आग्रह गरेका थिए। छलफलमा नयाँ योजना वा नीतिगत प्रस्ताव लिएर आए प्रधानमन्त्री कार्यालयमा सिधै छलफल गर्न सकिने बताएका थिए।