मोरङ । मोरङको लेटाङमा मोटरसाइकल दुर्घटना हुँदा दुई जनाको मृत्यु भएको छ भने एक जना गम्भीर घाइते भएका छन्।

लेटाङ नगरपालिका–९ हात्तीचोकस्थित भित्री सडकखण्डमा शुक्रबार राति जाँते बजारबाट पथरीतर्फ जाँदै गरेको मे ४ प ७४६ नम्बरको मोटरसाइकल अनियन्त्रित भएर दुर्घटनामा परेको प्रहरीले जनाएको छ। दुर्घटना राति करिब १०ः३५ बजे भएको हो।

दुर्घटनामा झापाको घेराबारीका २७ वर्षीय मोटरसाइकल चालक कुमार नेपाली, सोही ठाउँका २५ वर्षीय सन्देश नेपाली र पथरीशनिश्चरे नगरपालिका–८ का ३२ वर्षीय अमर नेपाली घाइते भएका थिए।

कुमारलाई उपचारका लागि मंगलबारेस्थित मदन भण्डारी अस्पताल तथा ट्रमा सेन्टर लगिएको थियो। उपचारकै क्रममा राति करिब १२ बजे चिकित्सकले उनलाई मृत घोषणा गरेका थिए।

सन्देशको विराटनगरस्थित न्युरो अस्पतालमा उपचारका क्रममा बिहान १२ः०४ बजे मृत्यु भएको प्रहरीले जनाएको छ।

दुर्घटनामा गम्भीर घाइते अमरको न्युरो अस्पतालमै उपचार भइरहेको छ। घटनाबारे थप अनुसन्धान भइरहेको प्रहरीले जनाएको छ।