काठमाडौं । अत्यधिक वर्षाका कारण उत्तरपूर्वी स्पेनमा बाढीको जोखिम बढेपछि अधिकारीहरूले अत्यावश्यकबाहेकका यात्रामा प्रतिबन्ध लगाएका छन्।

बाढीको जोखिम बढेपछि कातालोनियामा आपत्कालीन योजना सक्रिय पारिएको छ। २० प्रशासनिक क्षेत्रमा आइतबार दिउँसोसम्म यात्रा प्रतिबन्ध लागू गरिएको छ। अधिकांश यात्रुवाहक तथा क्षेत्रीय रेल सेवा पनि स्थगित गरिएको अधिकारीहरूले बताएका छन्।

मौसमविद्हरूले आइतबार बिहान मौसमजन्य जोखिम उच्चतम तहमा पुग्न सक्ने चेतावनी दिएका छन्। केही क्षेत्रमा तीन घण्टामै ९० मिलिमिटरभन्दा बढी र २४ घण्टामा २०० मिलिमिटरसम्म वर्षा हुन सक्ने पूर्वानुमान गरिएको छ। जोखिममा रहेका क्षेत्रमा मोबाइल फोनमार्फत आपत्कालीन सूचना पठाइएको छ।

कातालोनियाका क्षेत्रीय राष्ट्रपति साल्भाडोर इयाले सर्वसाधारणलाई उच्च सतर्कता अपनाउन आग्रह गरेका छन्। भारी मेघगर्जनसहितको वर्षा, तीव्र हावा तथा पानीका बवण्डर र टोर्नाडो आउन सक्ने चेतावनी दिइएको छ। मौसम प्रणाली आइतबार उत्तरतर्फ सर्ने अनुमान गरिएको छ।

यसैबीच, मध्यपूर्वी स्पेनको अल्बासेते प्रान्तस्थित माद्रिगेरासमा आएको आकस्मिक बाढीमा १०२ वर्षीया महिलाको मृत्यु भएको छ। बाढीका कारण घर, सवारीसाधन र सार्वजनिक संरचनामा क्षति पुगेको छ।

करिब दुई घण्टाको अवधिमा प्रतिवर्गमिटर १४० मिलिमिटरभन्दा बढी वर्षा भएपछि आएको बाढीबाट करिब ९० जनालाई सुरक्षित स्थानमा सारिएको थियो। बाढीका कारण प्रभावित स्वास्थ्य केन्द्रबाट सेवा सञ्चालन गर्न नसकिएपछि स्वास्थ्य सेवा अस्थायी रूपमा रेडक्रसको परिसरबाट सञ्चालन गरिएको छ।