काठमाडौं । नेपाली कांग्रेसको १५औँ महाधिवेशनको उद्घाटन आज काठमाडौंको खुलामञ्चमा हुँदैछ। उद्घाटन समारोहमा कांग्रेसले प्रमुख राजनीतिक दलका शीर्ष नेतालाई निम्तो दिएको छ। तर, निम्तो पाएका सबै शीर्ष नेता भने खुलामञ्चमा देखिने छैनन्।

राष्ट्रिय स्वतन्त्र पार्टीका सभापति रवि लामिछाने आफैं सहभागी हुने तयारीमा छन्। रास्वपाका प्रवक्ता जगदिश खरेलका अनुसार अहिलेसम्म लामिछाने नै कार्यक्रममा जाने तय भएको छ।

नेकपा एमालेका अध्यक्ष केपी शर्मा ओली भने कांग्रेसको महाधिवेशनमा जाने छैनन्। बुवाको निधनपछि बरखीमा रहेका ओलीको ठाउँमा एमाले महासचिव शंकर पोखरेल सहभागी हुनेछन्। पोखरेलले एमालेका तर्फबाट महाधिवेशनलाई शुभकामना दिने कार्यक्रम छ।

यता नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ भने आफैं खुलामञ्च पुग्ने तयारीमा छन्। पार्टी प्रवक्ता प्रकाश ज्वालाका अनुसार प्रचण्डले कांग्रेस महाधिवेशनको उद्घाटन समारोहलाई सम्बोधन गर्नेछन्। प्रचण्डका प्रमुख स्वकीय सचिव गोविन्द आचार्यले पनि उनको आजको कार्यतालिकामा कांग्रेस महाधिवेशनमा सहभागी हुने कार्यक्रम रहेको बताएका छन्।

राष्ट्रिय प्रजातन्त्र पार्टीका अध्यक्ष राजेन्द्र लिङ्देन पनि कार्यक्रममा सहभागी हुनेछन्। झापामा रहेका लिङ्देन आजै काठमाडौं आउने र त्यसपछि कांग्रेस महाधिवेशनको उद्घाटन समारोहमा सहभागी हुने राप्रपा प्रवक्ता मोहन श्रेष्ठले बताएका छन्।

जनता समाजवादी पार्टी नेपालका अध्यक्ष उपेन्द्र यादव भने नआउने भएका छन्। उनको ठाउँमा सहअध्यक्ष शरतसिंह भण्डारी सहभागी हुनेछन्। यादवले भण्डारीलाई महाधिवेशनमा पार्टीको प्रतिनिधित्व गर्न पठाएको उनको सचिवालयले जनाएको छ।

यसरी कांग्रेसले सबै प्रमुख दलका शीर्ष नेतालाई बोलाए पनि खुलामञ्चमा केही शीर्ष नेता आफैं देखिनेछन् भने केहीको प्रतिनिधित्व दोस्रो तहका नेताले गर्ने भएका छन्।

कांग्रेसको १५औँ महाधिवेशन ‘परम्पराको सम्मान र परिवर्तनको संकल्प : समुन्नत नेपालका लागि सबल कांग्रेसको विकल्प’ भन्ने नारासहित हुँदैछ।