काठमाडौं । नेपाली कांग्रेसको १५औँ महाधिवेशनको उद्घाटन कार्यक्रम तोकिएको समयभन्दा पछि धकेलिँदै जानुको एउटा कारण असन्तुष्ट नेताहरूलाई समेत समेट्ने प्रयास रहेको कांग्रेस नेता मीनबहादुर विश्वकर्माले बताएका छन्।

महाधिवेशनस्थलमा सञ्चारकर्मीसँग कुरा गर्दै विश्वकर्माले कांग्रेसभन्दा बाहिर रहेका तथा मन नमिलेका नेताहरूलाई पनि मूलधारमा ल्याउन अन्तिम समयसम्म प्रयास भइरहेको बताए। त्यसकै लागि महाधिवेशनको कार्यतालिकासमेत आवश्यकताअनुसार लचिलो बनाइएको उनको भनाइ छ।

उनका अनुसार पार्टीभित्रको असहमति मिलाउने र सबै पक्षलाई महाधिवेशनमा सहभागी गराउने प्रयास अझै जारी छ।

विश्वकर्माले पूर्वसभापति शेरबहादुर देउवा महाधिवेशनस्थलमा आइपुगेर सम्बोधन गर्ने आशासमेत व्यक्त गरे। देउवाको सहभागिता निश्चित नभए पनि कांग्रेसको ऐतिहासिक परम्परा र नेतृत्व हस्तान्तरणलाई सम्मानजनक ढंगले अघि बढाउन उनी महाधिवेशनमा आउनुपर्ने उनको भनाइ थियो।

‘उहाँ यहाँ आएर उपस्थिति जनाएर, सम्बोधन गरेर आफ्नो सुखद बहिर्गमन र नेपाली कांग्रेसको ऐतिहासिक धरोहरको निरन्तरता कायम गर्नुहुन्छ भन्ने हामी विश्वास गर्दछौँ। उहाँ आउने त्यो निश्चित होइन, तर आशा गर्छौँ,’ विश्वकर्माले भने।

कांग्रेसभित्र पछिल्लो समय पूर्वसभापति देउवा पक्षका ठूलो संख्याका नेता गगन थापा नेतृत्वको कार्यसमितिमा समाहित भएका छन्। पार्टीले देउवा नेतृत्वको पुरानो कार्यसमितिका नेताहरूलाई समेत समेट्ने निर्णय गरेपछि उनीहरू महाधिवेशन प्रक्रियामा फर्किएका हुन्।

यद्यपि, देउवा आफैं भने महाधिवेशन प्रक्रियामा सहभागी हुने विषय अझै स्पष्ट भइसकेको छैन। कांग्रेसभित्र उनलाई महाधिवेशन उद्घाटनमा प्रमुख अतिथिका रूपमा सहभागी गराएर पार्टी एकताको सन्देश दिनुपर्ने आवाजसमेत उठ्दै आएको छ।

विश्वकर्माले अब महाधिवेशनबाट सभापतिमा गगन थापा सर्वसम्मत हुनसक्ने सम्भावनासमेत व्यक्त गरेका छन्। पार्टीभित्रका असन्तुष्ट पक्षहरूलाई समेट्दै अघि बढ्न सके नेतृत्व चयनमा समेत सहमति बन्न सक्ने उनको संकेत छ।