काठमाडौं । रुसले युक्रेनको राजधानी किभमा थप भीषण सैन्य प्रहार गर्ने चेतावनी दिँदै विदेशी कूटनीतिज्ञ तथा नागरिकलाई तत्काल सहर छाड्न भनेको छ ।

रुसी विदेश मन्त्रालयले विज्ञप्ति जारी गर्दै यसअघि दिइएका चेतावनीलाई बेवास्ता गरिएको भन्दै असन्तुष्टि जनाएको छ । आफ्नो चेतावनी नसुनी किभमै बस्नेहरूले जानीजानी ज्यान जोखिममा पारेको रुसी दाबी छ ।

रुसले चेतावनी बेवास्ता गर्नेहरूमाथि आइपर्ने जुनसुकै नकारात्मक परिणामको जिम्मेवारी उनीहरू स्वयंले लिनुपर्ने पनि स्पष्ट पारेको छ ।

मस्कोले यसअघि मे महिनामा पनि यस्तै चेतावनी दिएको थियो । तर युक्रेनका सहयोगी मुलुकका प्रमुखहरूले रुसी चेतावनीलाई बेवास्ता गर्दै किभ पुगेर युक्रेनप्रति ऐक्यबद्धता जनाएका थिए ।

पछिल्ला महिनामा किभमाथि रुसी हवाई आक्रमण तीव्र बनेको छ । किभका मेयर भिताली क्लित्स्कोले सहरको अवस्था अत्यन्तै गम्भीर बनेको बताएका छन् । उनका अनुसार रुसी सेनाले पुल तथा ऊर्जा पूर्वाधारलाई निशाना बनाइरहेको छ ।

यता, युक्रेनी राष्ट्रपति भोलोदिमिर जेलेन्स्कीले रुसी राष्ट्रपति भ्लादिमिर पुटिनमाथि नागरिक क्षेत्रमा भीषण आक्रमणको अनुमति दिएर युद्धका नियम उल्लङ्घन गरेको आरोप लगाएका छन् । क्रेमलिनले भने उक्त आरोप अस्वीकार गर्दै आएको छ ।

लगातारको हवाई आक्रमण र साइरनका कारण करिब ३० लाख जनसंख्या रहेको किभको जनजीवन अस्तव्यस्त बनेको छ । दिनभरजसो बज्ने साइरनसँगै नागरिकहरू सुरक्षित आश्रयस्थलतर्फ दौडिनुपर्ने अवस्था छ । सडकमा सवारीसाधनको लामो जाम लाग्दा कतिपय यात्रु पैदल हिँड्न बाध्य छन् ।

युक्रेनका पूर्वी, उत्तरी र मध्य क्षेत्रमासमेत रुसी आक्रमणका कारण विद्युत् आपूर्ति प्रभावित भएको छ । जाडो बढ्दै जाँदा ऊर्जा माग चुलिएको समयमा विद्युत् ग्रिड सञ्चालक उक्रेनर्गोले उपभोक्तालाई विद्युत् खपत घटाउन आग्रह गरेको छ ।

गत वर्षको जाडोमा तापक्रम माइनस २० डिग्री सेल्सियससम्म झर्दा कतिपय क्षेत्रमा दिनौंसम्म बिजुली र तातोपानी आपूर्ति ठप्प भएको थियो । यसपटक पनि युक्रेन कठिन हिउँदको सामना गर्ने तयारीमा छ ।

सन् २०२२ को फेब्रुअरीमा रुसले पूर्ण रूपमा आक्रमण सुरु गरेयता जारी युद्ध दोस्रो विश्वयुद्धपछि युरोपकै सबैभन्दा रक्तपातपूर्ण द्वन्द्वमध्ये एक बनेको छ ।

यसबीच, युद्धको अग्रभागमा युक्रेनले रुसी सेनाको दबाब रोकिराखेको देखिए पनि हवाई रक्षा प्रणालीको मौज्दात घट्दै जाँदा उसका प्रमुख सहरहरू रुसी आक्रमणको जोखिममा परेका छन् ।

शान्ति प्रयाससमेत यहीबीच अल्झिएको छ । रुसी सेनाले पूर्ण नियन्त्रणमा लिन नसकेका पूर्वी युक्रेनका भूभागसमेत युक्रेनले छाड्नुपर्ने मस्कोको अडान छ । यही विषयमा सहमति जुट्न नसक्दा अमेरिकाको मध्यस्थतामा अघि बढाइएका शान्ति प्रयासहरू समेत ठप्पजस्तै बनेका छन् ।