काठमाडौं । नेपाली कम्युनिस्ट पार्टीका संयोजक पुष्पकमल दाहाल प्रचण्डले नेपाली कांग्रेसका सभापति गगन थापाले अब देशको नेतृत्व गर्ने अवस्था आएको बताएका छन्।

कांग्रेसको १५औँ महाधिवेशनको उद्घाटन समारोहलाई सम्बोधन गर्दै प्रचण्डले विगतमा आफ्नो नेतृत्वको सरकारमा गगन थापा स्वास्थ्य मन्त्री रहेको स्मरण गरे। त्यतिबेलै आफूले गगनले देशको नेतृत्व गर्ने समय आउन सक्ने बताएको उनले उल्लेख गरे।

‘मैले त्यतिबेलै भन्थेँ, तपाईंले यो देशको नेतृत्व गर्ने बेला आउन सक्छ। आज आएको देख्छु, निकै ठूलो जिम्मेवारी उहाँको काँधमा आएको छ,’ प्रचण्डले भने।

उनले कांग्रेस सभापति थापाले पार्टीमा निरन्तरताको क्रम भंग गर्दै नयाँ इतिहासतर्फ डोर्‍याएको भन्दै बधाई दिए।

‘कांग्रेसमा निरन्तरताको क्रम भंग गर्दै कांग्रेसलाई नयाँ इतिहासमा डोहोर्‍याएकोमा गगन थापालाई बधाई,’ उनले भने।

प्रचण्डले कांग्रेसभित्र रूपान्तरणका लागि भूमिका खेल्ने नेता तथा प्रतिनिधिहरूलाई धन्यवादसमेत दिए। नयाँ पुस्ताले पुरानो पुस्तालाई अपमान गर्ने प्रवृत्ति देखाउन नहुने भन्दै उनले गगनलाई सबैलाई समेटेर अघि बढ्न सुझाव दिए।

नयाँ पुस्ताले विगतका पुस्ताको योगदानलाई सम्मान गर्दै सबैलाई साथमा लिएर अघि बढ्नुपर्ने उनको भनाइ थियो।