काठमाडौं । बराम जातिका युवालाई एकजुट गराउने उद्देश्यले काठमाडौंमा आयोजित प्रथम बराम फुटसल कप सम्पन्न भएको छ। नेपाल बराम समाजले आयोजना गरेको प्रतियोगितामा २४ टोलीले सहभागिता जनाएका थिए।

बुढानीलकण्ठस्थित देवी स्पोर्ट्स हाउसमा भएको प्रतियोगिताको फाइनलमा थुमी युवा क्लबले गाउँले एकता बराम क्लबलाई ३–२ गोलले पराजित गर्दै उपाधि जितेको हो। उपविजेता गाउँले एकता बराम क्लबमा सीमित भयो।

उपाधिसँगै थुमी युवा क्लबले २० हजार रुपैयाँ नगद र ट्रफी प्राप्त गरेको छ। दोस्रो भएको गाउँले एकता बराम क्लबले १० हजार रुपैयाँ नगदसहित ट्रफी पाएको छ।

प्रतियोगितामा उत्कृष्ट प्रदर्शन गर्ने खेलाडीलाई पनि विभिन्न विधामा पुरस्कृत गरिएको थियो। गाउँले एकता बराम क्लबका सन्देश बराम उत्कृष्ट खेलाडी घोषित भए भने थुमी युवा क्लबका सचिन बराम उत्कृष्ट गोलकिपर बने।

त्यस्तै, अन्नपूर्ण युवा क्लबका मनोज बरामले प्रतियोगिताभरि ८ गोल गर्दै सर्वाधिक गोलकर्ताको पुरस्कार पाए।

नेपाल बराम समाजका अध्यक्ष सागर बरामले काठमाडौं उपत्यकाका विभिन्न स्थानमा छरिएर रहेका बराम युवालाई एक ठाउँमा जोड्नुका साथै आफ्नो जाति, भाषा र संस्कृतिबारे जानकारी गराउने उद्देश्यले प्रतियोगिता आयोजना गरिएको बताए।

बराम जाति नेपाल सरकारद्वारा सूचीकृत आदिवासी जनजातिमध्ये अति सीमान्तकृत समूहमा पर्छ। उपलब्ध तथ्यांकअनुसार बराम समुदायको जनसंख्या करिब ८ हजार रहेको छ भने काठमाडौं उपत्यकामा ६ सय ३७ जना बसोबास गर्छन्।

समाजका संरक्षक प्रेम बरामले बराम समुदायको मौलिक भाषा ‘बालकुरा’ लोपोन्मुख अवस्थामा रहेको बताए।

भाषा र संस्कृति संरक्षणसँग जोडिएका यस्ता सामुदायिक तथा खेलकुद गतिविधिले युवालाई आफ्नो मौलिक पहिचानप्रति सचेत बनाउन सहयोग पुग्ने उनको अपेक्षा छ।