काठमाडौं । बाजुरामा विद्युत् पोलबाट करेन्ट लाग्दा एक जनाको मृत्यु भएको छ।

बुढीगंगा नगरपालिका–२ परिवनका ४२ वर्षीय धनबहादुर केसीको आइतबार साँझ सामुदायिक वनभित्र करेन्ट लागेर मृत्यु भएको हो।

आफन्तले खोजी गर्ने क्रममा परिवन सामुदायिक वनमा केसी विद्युत्को केन्द्रीय प्रसारण लाइनको पोलबाट करेन्ट लागेर घटनास्थलमै मृत्यु भएको अवस्थामा फेला परेका थिए। स्थानीयले साँझ पौने ८ बजेतिर घटनाबारे जिल्ला प्रहरी कार्यालय बाजुरालाई जानकारी गराएका थिए।

सूचना पाएपछि अस्थायी प्रहरी बेस क्याम्प बल्देबाट प्रहरी वरिष्ठ हवल्दार रतनबहादुर साउदको नेतृत्वमा चार सदस्यीय टोली घटनास्थल पुगेको थियो। प्रहरीले घटनास्थल सुरक्षित राखेर प्रारम्भिक अनुसन्धान थालेको थियो।

सोमबार बिहान प्रहरी चौकी बार्जुगाडबाट प्रहरी नायब निरीक्षक जंगबहादुर चन्दको नेतृत्वमा थप पाँच जना प्रहरी घटनास्थलतर्फ खटिएका छन्। घटनाको थप अनुसन्धानका लागि जिल्ला प्रहरी कार्यालय बाजुराबाट प्रहरी निरीक्षकको नेतृत्वमा सात सदस्यीय टोलीसमेत परिचालन गरिएको जिल्ला प्रहरी कार्यालयका प्रवक्ता प्रहरी निरीक्षक नरेशबहादुर शाहीले जानकारी दिए।

प्रहरीका अनुसार घटनास्थलमा खटिएका केही अधिकारीसँग तत्काल सम्पर्क हुन नसकेको जनाइएको छ। केसी किन जंगलमा पुगेका थिए र कुन परिस्थितिमा विद्युत् पोलबाट करेन्ट लाग्यो भन्ने विषयमा अनुसन्धान भइरहेको प्रहरीले जनाएको छ।