एजेन्सी। उत्तरपश्चिमी मेक्सिकोको सिनालोआ राज्यस्थित एल क्यास्टिलो कारागारमा भएको दङ्गामा १० जनाको मृत्यु भएको छ। मृत्यु हुनेमा नौ कैदी र एक कैदीका परिवारका सदस्य रहेका छन्। घटनामा थप १६ कैदी घाइते भएका छन्।

राज्यका अधिकारीहरूका अनुसार बन्दरगाह सहर माजाट्लानस्थित कारागारमा कैदीका आफन्त भेटघाटका लागि पुगेका बेला झडप सुरु भएको थियो। स्थानीय सञ्चारमाध्यमले दङ्गाका क्रममा कैदीहरूले बन्दुकसमेत प्रयोग गरेको जनाएका छन्।

घटनापछि स्थिति नियन्त्रणमा लिन सेना, नौसेना, राष्ट्रिय सुरक्षा गार्ड र राज्यका सुरक्षा बल परिचालन गरिएको थियो। करिब एक हजार ८०० कैदी रहेको उक्त कारागार अहिले सुरक्षा निकायको नियन्त्रणमा रहेको अधिकारीहरूले बताएका छन्।

विश्लेषकहरूका अनुसार कारागारमा क्षमताभन्दा बढी कैदी हुनु, कर्मचारी अभाव र भ्रष्टाचारजस्ता समस्याले हिंसात्मक घटनाको जोखिम बढाएको छ। यसअघि गत मे महिनामा सिनालोआको राजधानी कुलियाकानस्थित कारागारमा भएको दङ्गामा सात कैदीको ज्यान गएको थियो।

आधिकारिक तथ्याङ्कअनुसार गत फेब्रुअरीसम्म मेक्सिकोका कारागारमा दुई लाख ६१ हजार ३८८ कैदी थिए।

सिनालोआ राज्यमा सन् २०२४ सेप्टेम्बरदेखि लागुऔषध तस्करीमा संलग्न सिनालोआ कार्टेलका दुई समूहबीचको शक्ति सङ्घर्षका कारण हिंसा बढ्दै आएको छ। पूर्वलागुऔषध तस्कर जोआकिन ‘एल चापो’ गुजमानका छोराहरूको समूह र कार्टेलका पूर्वनेता इस्माइल ‘एल मेयो’ जाम्बादाका समर्थकबीचको द्वन्द्वले राज्यको सुरक्षा अवस्थालाई थप चुनौतीपूर्ण बनाएको छ।

यसैबीच, अमेरिकी राष्ट्रपति डोनाल्ड ट्रम्पको प्रशासनले लागुऔषध तस्करीमा संलग्न गिरोहविरुद्ध कडा कदम चाल्न मेक्सिको सरकारमाथि दबाब दिँदै आएको छ।