Author: nepalone

काठमाडाैँ – नेकपा एकीकृत समाजवादीले प्रतिनिधिसभाको प्रमुख सचेतककाे जिम्मेवारी मेटमणि चौधरीलाई दिएकाे  छ । उहाँलाई अध्यक्ष तथा संसदीय दलका नेता माधव नेपालले प्रमुख सचेतक नियुक्त गरेको चौधरीको सचिवालयले जनाएको छ ।

दाङ १ बाट निर्वाचित चौधरी नेकपा एसका पोलिटब्युरो सदस्यसमेत हुनुहुन्छ ।

यसअघि शहरी विकास मन्त्री बन्नुभएका चौधरी नेकपा एसबाट पार्टीबाट लुम्बिनीबाट प्रत्यक्षमा निर्वाचित एक मात्र सांसद हुनुहुन्छ । 

काठमाडौं – पूर्वमन्त्री गोविन्दराज जोशीले कारबाही फुकुवा भन्ने पार्टीको निर्णय भ्रम छर्न गरीएको टिप्पणी गर्नुभएको छ ।

सामाजिक सञ्जालमा जोशीले आफ्नो घारणा सार्वजनिक गर्दै यस बारेमा कुनै छलफल नभएको जनाउनु भएको छ ।

उहाँले लेख्नुभएको छ – गोबिन्द राज जोशी को कारबाही फुकुवा भन्ने पार्टीको निर्णय भ्रम छर्न गरीएको हो। मेरो कुनै व्यक्ति संग यसबारे छलफल भएको छैन। विस्तृत खण्डन को लागि प्रतीक्षा गर्नुहोला।

कांग्रेस केन्द्रीय कार्य सम्पादन समितिको आइतबार बसेको बैठकले पूर्वसहमहामन्त्री गोविन्दराज जोशी र चितवन जिल्लाका पूर्वसभापति विकास कोइरालामाथिको अनुशासनको कारबाही फुकुवा गर्ने निर्णय गरेको थियो ।

काठमाडौं – नेपाली कांग्रेसका सांसद रामहरि खतिवडाले सभामुखको भूमिका तटस्थ र निष्पक्ष बनाउन आफूले संशोधन प्रस्ताव दर्ता गरेको बताएका छन् ।

आइतबार प्रतिनिधिसभा नियमावलीमाथिको दफाबार छलफलका क्रममा उनले कार्यव्यवस्था परामर्श समितिको सल्लाहअनुसार सभामुख अघि बढ्नुपर्ने बताए ।

“सभामुख भनेको न सत्तापक्षको होस् न विपक्षको होस् । सभामुख तटस्थ र निष्पक्ष होस् भन्ने मेरो प्रस्तावको चाहना हो,” उनले भने, “सभामुखले न दायाँ न बायाँ, सभामुखले कतै पनि नहेरेर, सभामुखको छाया कतै पनि पर्नु हुँदैन भन्ने धारणा हो ।”

सभामुखलाई पार्टीको ‘चार्ज’ लाग्ने गरेकाले कार्यव्यवस्थाको निर्णयबाट अघि बढ्दा बलियो हुने उनको भनाइ छ ।

काठमाडौं – वैशाख १० मा हुने उपनिर्वाचनका लागि नेपाली कांग्रेसले तनहुँ १ र चितवन २ मा दुई महामन्त्रीद्वयलाई खटाएको छ । तनहुँ १ मा स्वर्णिम वाग्लेलाई रोक्न गगन थापा चितवन २ मा रवि लामिछानेलाई रोक्न विश्वप्रकाशलाई फिल्डमा उतारेको हो । 

नेपाली काँग्रेस परित्याग गरी राष्ट्रिय स्वतन्त्र पार्टी रास्वपामा प्रवेश गरेर तनहुँ १ बाट टिकट पाउनुभएका वाग्लेलाई रोक्न गगन थापा सक्रिय रुपले लाग्नुभएको छ । त्यस्तै नागरिकता प्रकरणबाट सांसद पद खारेज हुन पुगेका लामिछानेलाई हराउन विश्वप्रकाश शर्मा लाग्नुभएको छ । 

उहाँहरुलाई समन्वय समितिमा रहेर काम गर्न पार्टीले निर्देशन दिईसकेको छ ।  सोमबार हुने मनोनयनपछि उहाँहरु निर्वाचन केन्द्रमा केन्द्रित हुनुहुनेछ । 

कांग्रेसले तनहुँ १ मा गोविन्द भट्टराई र चितवन २ मा जितनारायण श्रेष्ठलाई उम्मेदवार तय गरिसकेको छ । उपनिर्वाचन हुने अर्को क्षेत्र बारा(२ मा भने कांग्रेसले जनता समाजवादी पार्टीलाई समर्थन गर्ने निर्णय गरिसकेको छ ।

त्यस्तै एमालेले तनहुँ १ मा पूर्व डिआईजि सर्वेन्द्र खनाल र चितवन २ मा रामप्रसाद न्यौपानेलाई उम्मेदवार बनाएको छ । 

काठमाडौँ – आगामी वैशाख १० गते हुने उपनिर्वाचनका लागि राष्ट्रिय प्रजातन्त्र पार्टी (राप्रपा)ले उम्मेदवार चयन गरेको छ ।

आइतबार राप्रपाले उपनिर्वाचनका लागि तीनवटै निर्वाचन क्षेत्रमा उम्मेदवार चयन गरेको हो ।

राप्रपा संसदीय समितिको निर्णयअनुसार तनहुँ १ मा शोभा गुरुङ, बारा २ मा सोनेलाल शाह र चितवन २ मा जीवलाल पुरीलाई उम्मेदवार बनाउने निर्णय गरेको हो ।

उपनिर्वाचनका लागि मुख्य दलहरूले उम्मेदवार ढुंगो लगाइसकेका छन् ।

काठमाडौं – पछिल्लो समय देशमा कोरोनाभाइरस संक्रमण बढ्न थालेपछि यसको नियन्त्रणको तयारीबारे सांसदहरुले चासो राखेका छन् । 

छिमेकी देशसहित नेपालमै कोरोना संक्रमण बढ्न थालेपछि प्रतिनिधिसभा सदस्यले कोरोनाभाइरस संक्रमण नियन्त्रणको तयारीबारे चासो राखेका हुन् । आइतबार बसेको प्रतिनिधिसभा बैठकमा कांग्रेस सांसद दिलेन्द्रप्रसाद बडूले कोरोनाभाइरस संक्रमणको अवस्थाबारे जानकारी मागेका हुन् ।

कोरोना संक्रमण नियन्त्रणको तयारीबारे जानकारी मागेका उनले नयाँ भेरियन्टको संक्रमण बढेकोले रोकथामका लागि सरकारको कार्यनीति के छ ? भनेर प्रश्न पनि गरेका छन् । 
 

काठमाडाैँ – सभामुखले गर्ने कामकारबाही कार्यव्यवस्था परामर्श समितिको निर्णयका आधारमा हुनुपर्ने संशोधन प्रस्तावबाट सत्तारूढ दलहरू पछि हटेपछि प्रतिनिधि सभा नियमावलीमा सहमति भएको छ ।

शनिबार सभामुख देवराज घिमिरेको आह्वानमा भएको छलफलमा सभामुखले सदनका कामकारबाही कार्यव्यवस्था समितिको नियमित परामर्शका आधारमा गर्ने सहमति भएपछि नियमावलीको गाँठो फुकेको हो । सत्तारूढ दलबाट सभामुखको कामकारबाही समितिको निर्णयबाट मात्र हुनुपर्ने संशोधन दर्ता भएपछि नियमावली पारितको प्रक्रिया रोकिएको थियो ।

सत्तारूढ दलको प्रस्तावले सभामुखको विशेषाधिकारमा समेत अङ्कुश लाग्न लागेको भन्दै विपक्षी दल र पूर्वसभामुखहरूले समेत आपत्ति जनाएका थिए । संसदीय मान्यता र स्थापित अभ्यासविपरीत अधिकार कटौतीको प्रस्ताव भएको भन्दै नियमावली पारितको प्रक्रिया रोकिएको थियो । दलीय सहमतिसँगै आइतबारको बैठकमा नियमावली पारित गर्ने सहमति भएको छ ।

सङ्घीय संसद् सचिवालयका प्रवक्ता एकराम गिरीले नियमावली मस्यौदा समितिको प्रतिवेदनलाई पारितको प्रक्रिया अघि बढाउने सम्भावित कार्यसूची तय भएको छ । “नियमावलीका विषयमा एकप्रकारको सहमति भएको छ । सचिवालयले सम्भावित कार्यसूचीमा प्रकाशन गरेको छ । सकेसम्म भोलि नै नियमावली पारितको तयारी छ,” गिरीले भने ।

मुख्य विवादित बनेको संशोधनलाई भाषा मिलाएर स्वीकार गर्ने राजनीतिक रूपमा सहमति भएको नेकपा एमालेका संसदीय दलका प्रमुख सचेतक पदम गिरीले बताए । गिरीले भने, “पेचिलो रहेको नियम १३ को संशोधन (सभामुखको अधिकारबारे)मा भाषा मिलाएर अघि बढ्ने कुरा भयो । सभामुखले निर्णयका आधारमा हैन, अधिवेशन चालु भएका बेला नियमित परामर्शमा र नभएको अवस्थामा आवश्यकताअनुसार परामर्शमा अघि बढ्ने भन्ने शब्दावली राखेर अघि बढ्ने सहमति भयो ।”

दलीय सहमतिअनुसार सचिवालयले मस्यौदा गरेको नियम १३ को उपनियम ४ मा ‘उपनियम १ बमोजिमको समितिको बैठक अधिवेशन चालु रहेको अवस्थामा नियमित रूपमा र अन्य समयमा आवश्यकताअनुसार बस्नेछ’ भन्ने शब्दावली राख्ने दलीय सहमति भएको छ । यसअघि उपनियम चारमा सभामुखले गर्ने काम कारबाही कार्यव्यवस्था परामर्श समितिको निर्णयका आधारमा हुने व्यवस्था प्रस्तावित थियो ।

काठमाडौँ – नेपाली कांग्रेसले पूर्वमन्त्री गोविन्दराज जोशी, विकास कोइरालालगायत नेताको कारबाही फुकुवा गर्ने निर्णय गरेको छ । 

कांग्रेस केन्द्रीय कार्यसम्पादन समितिको आइतबार सानेपामा बसेको बैठकमा २०७९ भन्दा पहिले नेताहरुमाथि गरिएको कारबाही फुकुवा गर्ने निर्णय गरेको सहमहामन्त्री बद्री पाण्डेले जानकारी दिनुभयाे ।

तनहुँका पूर्वमन्त्री जोशी गत निर्वाचनमा रामचन्द्र पौडेलविरुद्व बागी उम्मेदवारी दिएपछि कारबाहीमा पर्नभुएकाे थियाे । मंसिर ४ गतेको निर्वाचनमा तनहुँ-१ मा स्वतन्त्र उम्मेदवार बनेका थिए । चितवनका कोइराला पूर्वजिल्ला सभापति हुनुहुन्छ ।

काठमाडौँ – आगामी वैशाख १० गते तीन वटा निर्वाचन क्षेत्रमा प्रतिनिधिसभा सदस्यको उपनिर्वाचन हुँदैछ । चितवन–२, बारा–२ र तनहुँ–१ मा उपनिर्वाचन हुँदैछ ।

गत मंसिर ४ गते भएको प्रतिनिधिसभा सदस्य निर्वाचनमा तनहुँ–१ बाट नेपाली कांग्रेसका नेता रामचन्द्र पौडेल निर्वाचित हुनुभएको थियो तर उहाँ राष्ट्रपतिमा निर्वाचित भएपछि सो क्षेत्रमा उपनिर्वाचन हुन लागेको हो ।

त्यस्तै बारा–२ बाट निर्वाचित जनता समाजवादी पार्टी (जसपा) का रामसहायप्रसाद यादव पनि उपराष्ट्रपतिमा निर्वाचित भएपछि सो क्षेत्र खाली भएको हो । चितवन–२ बाट निर्वाचित राष्ट्रिय स्वतन्त्र पार्टी (रास्वपा) का सभापति रविलामिछानेको सांसद पद दोहोरो नागरिकता प्रकरणका कारण सर्वोच्च अदालतले खारेज गरिदिएपछ सो निर्वाचन क्षेत्र पनि खाली छ ।

लामिछानेले पुन: नेपाली नागरिकता लिएपछि उहाँ पुन: चितवन–२ बाट उपनिर्वाचनमा उम्मेदवारी दिने हुनुभएको छ । रास्वपाले तनहुँ–१ बाट भर्खरै नेपाली कांग्रेस परित्याग गर्नुभएका डा स्वर्णिम वाग्लेलाई उम्मेदवार बनाउने निर्णय गरेको छ ।

त्यस्तै नेपाल सुशासन पार्टीका अध्यक्ष रमेश खरेलले पनि रास्वपाबाटै बारा–२ बाट उम्मेदवारी दिँदै हुनुहुन्छ ।

तर रास्वपाका यी तीन जना उम्मेदवारले उम्मेदवारी दिएको निर्वाचन क्षेत्रमा भने स्वयंलाई मत हाल्न नपाउने भएका छन् ।

निर्वाचन आयोगको मतदाता नामावलीमा रवि लामिछानेको नाम काठमाडौँ निर्वाचन क्षेत्र नं २ मा रहेकाले उहाँ आफू उम्मेदवार भएको चितवन–२ बाट मतदान गर्न वञ्चित हुनुभएको छ ।

त्यस्तै डा वाग्लेको पनि मतदाता नामावलीमा चितवन–२ मा उहाँको नाम भएकाले उहाँले उम्मेदवारी दिएको तनहुँ–२ बाट उहाँले मतदान गर्न पाउनु हुनेछैन ।

खरेल पनि काठमाडौँ निर्वाचन क्षेत्र नं १ को मतदाता हुनुहुन्छ । गत मंसिर ४ गते भएको प्रतिनिधिसभा निर्वाचनमा उहाँ सोही निर्वाचन क्षेत्रबाट उम्मेदवार हुनुहुन्थ्यो । अब उहाँले पनि आफू उम्मेदवार भएको बारा–२ बाट आफूलाई मतदान गर्न पाउनु हुनेछैन ।

काठमाडौं – उपप्रधानमन्त्री तथा गृहमन्त्री नारायणकाजी श्रेष्ठले मिटरब्याज पीडितहरुको स्वास्थ्य अवस्थाबारे चासो राखेका छन् । 

पीडितहरुको स्वास्थ्य अवस्था परीक्षण भइरहेको स्थल अनामनगरमा पुगेर उनले स्वास्थ्य अवस्थाबारे जानकारी लिएका हुन् ।

यही १३ चैतदेखि काठमाडौंमा न्यायका लागि संघर्षरत उनीहरुको उपचारमा कमी हुन नदिन उपप्रधान तथा गृहमन्त्री श्रेष्ठले चिकित्सक तथा स्वास्थ्यकर्मीलाई निर्देशन पनि दिएका छन् । 

काठमाडौँ – आगामी वैशाख १० मा हुने प्रतिनिधिसभा सदस्यको उपनिर्वाचनका लागि यही चैत २० गते सोमबार उम्मेदवारको मनोनयनपत्र दर्ता हुँदैछ ।

निर्वाचन आयोगले तय गरेको कार्यक्रम अनुसार निर्वाचनमा भाग लिन दर्ता भएका राजनीतिक दलका तर्फबाट र स्वतन्त्र उम्मेदवारले सम्बन्धित मुख्य निर्वाचन अधिकृतको कार्यालयमा उम्मेदवारको मनोनयनपत्र दर्ता गर्नुहुनेछ ।

गत मङ्सिर ४ गतेको निर्वाचनमा निर्वाचित रवी लामिछाने नागरिकतासम्बन्धी मुद्धामा सर्वाेच्च अदालतको फैसलाबाट पदमुक्त भएपछि चितवन क्षेत्र नं. २, राष्ट्रपतिमा रामचन्द्र पौडेल निर्वाचित भएपछि तनहुँ निर्वाचन क्षेत्र नंं. १ र उपराष्ट्रपतिमा रामसहायप्रसाद यादव निर्वाचित भएपछि बारा निर्वाचन क्षेत्र नं. २ का लागि उपनिर्वाचन हुन लागेको हो । उपनिर्वाचनका लागि शनिबार मुख्य निर्वाचन अधिकृतको कार्यालय स्थापना भइसकेको छ ।
 

काठमाडौँ – नेकपा एमालेका महासचिव शंकर पोखरेलले राजनीतिक स्थायित्वका लागि बलियो राष्ट्रिय शक्ति अपरिहार्य रहेको बताउनुभएको छ ।  उहाँले विकास र समृद्धिका लागि राजनीतिक स्थायित्व अपरिहार्य रहेको बताउनुभएको हो । 

सामाजिक सञ्जालमा महासचिव पोखरेलले लेख्नुभएको छ,  ‘विकास र समृद्धिका लागि राजनीतिक स्थायित्व र राजनीतिक स्थायित्वका लागि बलियो राष्ट्रिय शक्ति अपरिहार्य छ । देश किन बनेन भनेर चिन्ता गर्नेहरु सबै राष्ट्रिय शक्ति निर्माणको दिशामा अघि बढौँ ।’

उहाँले वैशाख १० गते हुने उपनिर्वाचनमा बलियो राष्ट्रिय शक्ति निर्माणको संकल्प पुरागर्न तनहुं-१,चितवन-२ र बारा-२ मा एमाले उम्मेदवारलाई विजयी बनाउने अभियानमा जुट्न आग्रह गर्नुभएको छ ।

काठमाडौं – राष्ट्रिय स्वतन्त्र पार्टी तनहुँ क्षेत्र नम्बर १ का उम्मेदवार डा. स्वर्णिम वाग्लेले अब रास्वपा नछाड्ने बताएका छन् । 

रास्वपाले आयोजना गरेको पत्रकार सम्मेलनमा वाग्लेले आफूले कथमकदाचित चुनाव हारे पनि रास्वपा नछाड्ने बताएका हुन् । 
‘म रास्वपाको साधारण सदस्य भएर आएको हुँ। म फेरि नेपाली कांग्रेसमा फर्किन्न। मेरो पछाडि फर्किने बानी छैन। गण्डकी प्रदेशको पानी खाएको छु,’  उनले भने ।

यो देशलाई देखिन लायक बनाउन युवाहरू लाग्न आवश्यक रहेको उनको भनाइ छ । 

काठमाडौं – बारा-२ बाट राष्ट्रिय स्वतन्त्र पार्टी (रास्वपा) को उम्मेदवार बनेका रमेश खरेलले सुशासन कायम गर्न सबै देशभक्तहरु एक ठाउमा आउनुपर्ने अवस्था सिर्जना भएकाे बताएका छन् । 

रास्वपाले शनिबार गरेको पत्रकार सम्मेलनमा बोल्दै खरेलले नेपाल आमा रोइरहेको बताउदै अहिलेको भागबण्डा र लुछाचुडीलाई तोड्नुपर्ने बताएका छन् ।

अहिले देशमा भइरहेको निराशालाई आशामा बदल्ने पार्टी रास्वपा मात्र आफुले पाएर आफु यस पार्टीमा आएको बताउदै खरेलले आफु चुनाव लड्न मात्र पार्टीमा नआएको बताए ।

काठमाडौँ – नेपाली कांग्रेसले सरकारमा सहभागी हुने बाँकी मन्त्री छान्नका लागि पार्टीको केन्द्रीय कार्यसम्पादन समितिको बैठक बोलाएको छ ।

कांग्रेसका मुख्यसचिव कृष्णप्रसाद पौडेलले एक सूचना प्रकाशित गरी आइतबार बिहान ११ बजे पार्टी कार्यालयमा बस्ने गरी बैठक बोलाइएको जानकारी दिएका छन ।

उनको सूचनामा भनिएको छ, ‘नेपाली कांग्रेस केन्द्रीय कार्यसम्पादन समितिको बैठक २०७९ चैत्र १९ गते आइतबार बिहान १०ः०० बजे पार्टीको केन्द्रीय कार्यालय, वीपी स्मृति भवन, वीपीनगर, ललितपुरमा बस्ने भएको छ । उक्त बैठकमा केन्द्रीय कार्यसम्पादन समितिका पदाधिकारी एवं सदस्यहरूको उपस्थितिका लागि निर्देशानुसार अनुरोध गरिन्छ ।’