Author: nepal one

संयुक्त राष्ट्रसङ्घको शान्ति सेना सन् २०२६ डिसेम्बर ३१ देखि लेबनान छोड्ने योजना अनुसार काम भइरहेको भएपनि इटालीले भने लेबनानमा आफ्नो सैन्य उपस्थिति कायम राख्ने बताएको छ ।

रक्षामन्त्री गुइडो क्रोसेटोले लेबनानको भ्रमणका क्रममा भन्नुभयो, “युनिफिलपछि पनि इटालीले आफ्नो भूमिका निर्वाह जारी राख्नेछ र अन्तर्राष्ट्रिय उपस्थितिलाई विश्वासका साथ समर्थन गर्नेछ । इटालीले अबको समयमा लेबनानी सशस्त्र बलको क्षमता विकासमा सहयोग गर्नेछ।”

इटालीका रक्षा मन्त्रालयका प्रवक्तालाई एएफपीले के इटालीले लेबनानमा सैन्य उपस्थिति कायम राख्न चाहेको हो भनी सोधिएको प्रश्नमा उहाँले इटालीको सेनाले अहिले छोडिनहाल्ने कुरा पुष्टि गर्नुभयो ।

सन् १९७८ देखि इजरायल र लेबनानबीच एक मध्यवर्ती सीमा क्षेत्रको रूपमा काम गरिरहेको थियो भने सन् २००० मा इजरायलले दक्षिणी लेबनानमा कब्जा अन्त्य गरेपछि बाँकी लेबनानमा संयुक्त राष्ट्रसङ्घको अन्तरिम बल (युनिफिल) तैनाथ रहँदै आएको थियो ।

लेबनानले युनिफिलको उपस्थिति चाहेको थियो ।संयुक्त राष्ट्रसङ्घको सुरक्षा परिषद्ले गत अगस्टमा इजरायल र उसको सहयोगी राष्ट्र अमेरिकाले युनिफिलको म्याद अन्त्य गर्न दबाब दिएपछि एउटा मात्र अन्तिम म्याद थप्ने पक्षमा मतदान गरेको थियो ।

हाल युनिफिलको नेतृत्व इटालीका मेजर जनरल डियोडाटो अबग्नाराले गरिरहनुभएको छ भने यहाँ ४९ देशका नौ हजार ९२३ सैनिक रहेका छन् ।लेबनानमा इन्डोनेसियापछि इटालीको दोस्रो धेरै एक हजार ९९९ सैनिक तैनाथ भएको छ। इजरायलले युनिफिलको अन्त्यको स्वागत गरेको छ ।

इजरायल र हेजबुल्लाहबीच भएको युद्धविराम अन्तर्गत लामो समयदेखि नयाँ लेबनानी राष्ट्रिय सेना दक्षिणी लेबनानमा तैनाथ भइरहेको छ र हिजबुल्लाहको पूर्वाधार भत्काइरहेको छ।

“लेबनानी सशस्त्र बललाई बलियो बनाउन समर्थन आवश्यक छ, ताकि उनीहरू देशको रक्षा गर्न उत्तम स्थितिमा रहन सकून्, यसको सीमाको सुरक्षा र सम्मान सुनिश्चित गर्न सकून्,” क्रोसेटोले सोमबार भन्नुभयो । उहाँले अगाडी थप्नुभयो, “हामी बहुपक्षीय र द्विपक्षीय सन्दर्भमा हाम्रो उपस्थितिको सुनिश्चितता गर्नेछौं ।”

इरानले सोमबार आफ्नो क्षेप्यास्त्र कार्यक्रम रक्षात्मक प्रकृतिको भएको र आक्रमणलाई रोक्नका लागि बनाइएको बताएको छ । तेहरानकोे शस्त्रागारको अस्तित्व बहसको विषय नभएको र यो सम्झौतायोग्य नहुने बताएको छ।

इजरायलले इरानको ‘ब्यालेस्टिक मिसाइल’ र उसको परमाणु कार्यक्रमलाई जुन महिनामा लडेको १२ दिने युद्धका क्रममा निष्प्रभावी पार्न खोजेको दुई मुख्य खतराको रूपमा प्रस्तुत गरेको थियो ।

इरानी विदेश मन्त्रालयका प्रवक्ता इस्माइल बकाईले साप्ताहिक पत्रकार सम्मेलनमा भन्नुभयो, “इरानको क्षेप्यास्त्र कार्यक्रम वार्ताका लागि नभई इरानको भूमिको रक्षाका लागि विकास गरिएको हो, तसर्थ, इरानको रक्षा क्षमता शत्रुहरूलाई इरानमाथि आक्रमण गर्ने कुनै पनि विचारबाट रोक्न बनाइएकोे हो, यो वार्ता गर्नुपर्ने विषय होइन ।”

इरानको ब्यालिस्टिक क्षमताले इजरायललाई आक्रमणको दूरीमा पुर्यायो, र जूनमा इजरायलको अभूतपूर्व आक्रमणपछि तेहरानले इजरायलका शहरहरूमा मिसाइल र ड्रोनद्वारा आक्रमण गरेको थियो ।

अमेरिकी प्रसारक एनबीसीका अनुसार युद्धपछि इरानले आफ्नो क्षेप्यास्त्र उत्पादनको पुनर्निर्माण र विस्तार गर्न खोजेको भन्दै इजरायलले चिन्ता व्यक्त गरेको छ ।

यसै महिनाको अन्त्यतिर हुने भनिएको अमेरिका भ्रमणका क्रममा इजरायली प्रधानमन्त्री बेन्जामिन नेतान्याहुले राष्ट्रपति डोनाल्ड ट्रम्पलाई कुनै पनि नयाँ सैन्य कारबाहीमा सहयोग गर्न सक्ने विकल्प प्रस्तुत गर्ने अपेक्षा गरिएको एनबीसीले जनाएको छ ।

हालैको युद्धको क्रममा इजरायलले सैन्य स्थलहरू, आणविक सुविधाहरू र आवासीय क्षेत्रहरूमा आक्रमण गरेको थियो जसमा एक हजारभन्दा बढी व्यक्तिको मृत्यु भएको थियो।

इजरायलले आफ्नो भूमिमा ५० भन्दा बढी इरानी क्षेप्यास्त्र आक्रमण भएको र यसबाट २८ जनाको मृत्यु भएको बताएको थियो ।

अमेरिकाले युद्धविरामको घोषणा गर्नुअघि इरानको आणविक केन्द्रमा केही समयका लागि आफ्नो सहयोगी इजरायलसँग मिलेर आक्रमण गरेको थियो।

इरानले कुनै समय अमेरिकाबाट धेरै हतियार खरिद गरेको थियो तर सन् १९७९ को इस्लामिक क्रान्तिपछि कूटनीतिक सम्बन्ध टुटेपछि उसले आफ्नै घरेलु हतियार उद्योग विकास गरेको छ।

जापानको शिक्षा, विज्ञान तथा प्रविधि मन्त्रालयका अनुसार, सोमबार प्रक्षेपण गरिएको ‘एच–३ रकेट’ले ‘मिचिबिकी नम्बर ५’ उपग्रह कक्षमा पु¥याउन सकेन ।

‘मिचिबिकी नम्बर ५’ जापानको क्वासी–जियोस्टेशनरी स्याटेलाइट प्रणाली (क्युजेडएसएस) अन्तर्गत राखिएको पाँचौं उपग्रह हो, जसको उद्देश्य जीपीएस सङ्केत सुधार गरेर स्मार्टफोन, कारको नेभिगेसन प्रणाली र अन्य स्थान–निर्धारित सेवाहरूमा स्थान निर्धारणको शुद्धता बढाउनु हो ।

जापानको अन्तरिक्ष अनुसन्धान निकायले आठौं एच–३ रकेट कागोशिमाको तानेगाशिमा अन्तरिक्ष केन्द्रबाट बिहान १०ः५१ बजे प्रक्षेपण गरेको थियो । तर दोस्रो चरणको इन्जिन समयभन्दा पहिले बन्द भएपछि रकेट असफल भयो ।
अन्तरिक्ष निकायले हाल परिस्थितिको मूल्याङ्कन गर्दै इन्जिन बन्द हुनुको कारण पत्ता लगाउने काम गरिरहेको छ ।

यो रकेटले बोकेको ‘मिचिबिकी नम्बर ५’ उपग्रह मोबाइल फोन, सवारी साधनका नेभिगेसन प्रणाली र अन्य स्थान–निर्धारण सेवाहरूको शुद्धता सुधार्ने उद्देश्य राखेको थियो ।

चीनले युरोपेली सङ्घबाट आयात हुने केही दुग्ध उत्पादनहरूमा ४२.७ प्रतिशतसम्म कर लगाउने घोषणाको इयूले सोमबार प्रतिवाद गरेको छ । दुग्धजन्य उत्पादनमा शुल्कवृद्धि गर्ने चीनको कदम कदमलाई इयूले ‘अनुचित’ भनेको छ ।

युरोपेली आयोगका व्यापार क्षेत्र हेर्ने एक प्रवक्ताले भन्नुभयो, “हाम्रो मूल्याङ्कनले दुग्धजन्य उत्पादनमा करवृद्धि गर्न सुझाब दिने अनुसन्धानमा अपर्याप्त प्रमाण र शङ्कास्पद आरोपहरू रहेका छन् र यी उपायहरू अनुचित र अन्यायपूर्ण छन् ।

उहाँले भन्नुभयो, “अहिले, आयोगले प्रारम्भिक निर्णयको जाँच गरिरहेको छ र चिनियाँ अधिकारीहरूलाई टिप्पणी प्रदान गर्नेछ ।”

चीनले घोषणा गरेको २१.९ प्रतिशतदेखि ४२.७ प्रतिशतसम्म रहेको ‘करवृद्धि’ मङ्गलबारदेखि लागू हुनेछ ।

बेइजिङस्थित वाणिज्य मन्त्रालयले जारी गरेको विज्ञप्तिमा भनिएको छ, “चीनले ताजा र प्रशोधित पनीर, दही, नीलो चीज र केही दूध र क्रिमलगायतका वस्तुको आयातमा करवृद्धि गरेको छ।

‘डेरी एसोसिएसन अफ चाइना’ बाट अनुरोध प्राप्त भएपछि अधिकारीहरूले सन् २०२४ अगस्टमा छुटविरोधी अनुसन्धान सुरु गरेका छन् भने यो अनुसन्धान सुरू गरेका छन् र यो आगामी फेब्रुअरीमा समाप्त हुनेछ।

चीनको वाणिज्य मन्त्रालयले सोमबार प्रारम्भिक निष्कर्षले इयूले दिने अनुदान र दुग्ध उद्योगमा ठूलो घाटाको अवस्था रहेको देखाएको बताएको छ ।

बेइजिङले पाँच वर्षका लागि ईयूको सुँगुरको मासुको आयातमा ‘एन्टी डम्पिङ’ कर लगाउने बताएको एक हप्तापछि इयू डेरीमा अतिरिक्त शुल्क लगाइएको हो ।

न्यूनतम ४.९ प्रतिशतदेखि १९.८ प्रतिशतको बीचमा लगाइएको शुल्क डिसेम्बर १७ देखि लागू भएका छन् । यद्यपि, सेप्टेम्बरदेखि लागू गरिएको अस्थायी शुल्क १५.६ देखि ६२.४ प्रतिशतभन्दा भन्दा कम रहेको छ।

ग्रीसको अर्थतन्त्रको एक प्रमुख क्षेत्रमा श्रम अभाव जारी भए पनि ग्रीसले सन् २०२५ मा पर्यटनका लागि ‘अर्को उच्च रेकर्ड’ कोर्ने बाटोमा रहेको बताएको छ ।

नोभेम्बरको अन्त्यमा प्रकाशित ‘बैङ्क अफ ग्रीस’को तथ्याङ्क अनुसार सनु २०२५ जनवरीदेखि सेप्टेम्बरको अन्त्यसम्ममा लामो समयदेखि घमाइलो टापु र सम्पन्न पुरातात्विक स्थलहरूको लागि पर्यटकहरूको प्रिय भूमध्यसागरीय राष्ट्र (ग्रीस) मा सन् २०२५ मा तीन करोड १६ लाख आगन्तुकहरूलाई स्वागत गरेको छ । यो सन् २०२४ को सोही अवधिको तुलनामा चार प्रतिशतले बढी हो ।

“समग्रमा, सन् २०२५ मा हाम्रो देशमा पर्यटनको लागि अर्को रेकर्ड वर्ष हुनेछ,” पर्यटन मन्त्री केफालोजियानीले ग्रीक समाचार एजेन्सी एएनएसँगको अन्तर्वार्तामा भन्नुभयो । उहाँले सन् २०२६ अर्को उपहार लिएर आउने आशा पनि व्यक्त गर्नुभयो ।

“सन् २०२६ का लागि सूचकहरू पहिले नै विशेष रूपमा उत्साहजनक छन् र हामीलाई आशावादी हुन अनुमति दिन्छ,” उहाँले भन्नुभयो ।

कोभिड–१९ महामारीपछि ग्रीसले पर्यटन राजस्व र विदेशी पर्यटकको सङ्ख्यामा वार्षिक रेकर्ड तोड्दै आएको छ ।

सन् २०२४ मा चार करोड ७० हजार मानिसहरूले ग्रीस भ्रमण गरेका थिए र यो सन् २०२३ को तुलनामा १२.८ प्रतिशतले बढी हो ।

यो वृद्धिले पर्यटनका लागि धेरै प्रसिद्ध स्थलहरूमा अनियन्त्रित निर्माणको चिन्ता जगाएको छ । एथेन्सका स्थानीयहरूले छोटो अवधिको विदा र विदा मनाउनका लागि सरकारले गरेको पर्यटनको प्रचारप्रसारले ग्रीसमा भाडा आकाशिएको छ ।

जलवायु परिवर्तनले निम्त्याएको उष्ण लहर र बढ्दो विनाशकारी जङ्गलको डढेलोले पनि यस क्षेत्रका लागि खतरा निम्त्याएको छ । प्रधानमन्त्री किरियाकोस मित्सोटाकिसले वित्तीय सङ्कटपछि अर्थतन्त्रलाई पुनर्जीवित गर्ने प्रयासमा सन् २०१९ मा पदभार ग्रहण गरेदेखि पर्यटनका लागि प्रचारप्रसारलाई व्यापकता दिनुभएको छ।

इन्स्टिच्युट अफ द ग्रीक टुरिजम कन्फेडेरेसन (इनसेट) का अनुसार सन् २०२४ मा कुल गार्हस्थ्य उत्पादनमा पर्यटनले प्रत्यक्ष योगदान १३ प्रतिशत र अप्रत्यक्ष रूपमा कुल गार्हस्थ्य उत्पादनमा ३० प्रतिशतभन्दा बढी योगदान पुर्याएको थियो।