Author: nepal one

चीनले सोमबार सार्वजनिक चेतना जगाउने र दूरसञ्चार तथा साइबर ठगी विरुद्ध लड्ने उद्देश्यले एक महिना लामो राष्ट्रव्यापी अभियान सुरु गरेको छ । चिनियाँ कम्युनिष्ट पार्टी केन्द्रीय समितिको प्रचार विभाग र मन्त्रालयले संयुक्तरूपमा आयोजना गरेको अभियानको एक भागका रूपमा चीनभरका स्थानीय अधिकारीहरूले समुदाय, ग्रामीण क्षेत्र, घरपरिवार, विद्यालय र व्यवसायसम्म पुग्न तल्लो तहसम्मको पहुँचका प्रयासहरू व्यवस्थित गर्नेछन् ।

उद्यम, वित्तीय कर्मचारी, नाबालिग र वृद्धवृद्धाहरू जस्ता उच्च जोखिम समूहहरूमा केन्द्रित भएर लक्षित सचेतना कार्यक्रमहरू विभिन्न क्षेत्रहरू अनुरूप बनाइनेछ । सामान्य ठगीका घटना र नवीनतम घोटाला रणनीतिहरू सार्वजनिक ठगी जागरूकता र रोकथाम क्षमताहरू सुधार गर्न व्यापकरूपमा प्रचार गरिनेछ । अधिकारीहरूले कानूनी अवधारणा र आत्म–सुरक्षामा जनतालाई शिक्षित गर्न आपराधिक मुद्दाबारे प्रकाश पार्नेछन् ।

विश्वभरका एक सय १३ देशमा कहिल्यै पनि राज्य वा सरकारको प्रमुखका रूपमा महिलाले काम गरेका छैनन् । हालसम्म २६ देशमा मात्र महिलाको नेतृत्व रहेको सोमबार प्रकाशित महिला राजनीतिक नेत्रीहरूको युएन वुमन विश्वव्यापी तथ्याङ्क २०२४ ले देखाएको छ ।

प्रगतिका बावजुद महिलाहरू अझै पनि सत्ता र कूटनीतिक पदबाट ‘धेरै हदसम्म बहिष्कृत’ रहेको र प्रभाव तथा निर्णय लिने उच्चतम स्तरमा पुरुषहरूको कब्जा रहेको युएन वुमनले प्रेस विज्ञप्तिमा जनाएको छ ।

विज्ञप्तिअनुसार विश्वव्यापी रूपमा निर्णय प्रक्रियामा महिलाहरूको कम प्रतिनिधित्व ‘कठोर वास्तविकता’ बनेको छ । नेतृत्व पदहरूमा लैङ्गिक समानतासम्बन्धी युएन वुमनको नयाँ तथ्याङ्क त्यतिबेला प्रकाशित भएको छ जतिबेला महिलाहरूले कसरी अवरोधहरू तोडिरहेका छन् र कूटनीतिमा भिन्नता ल्याइरहेका छन् भनेर पहिचान गर्न जुन २४ मा विश्वले कूटनीतिमा महिलाका लागि अन्तर्राष्ट्रिय दिवस मनाउँदै छ ।

सन् २०२४ जनवरी १ सम्म मन्त्री पदहरूमा २३ प्रतिशत मात्र महिला रहेका छन् र एक सय ४१ देशमा क्याबिनेट मन्त्रीहरूमा एक तिहाइभन्दा कम महिला रहेका छन् । सात देशको मन्त्रिपरिषद्मा कुनै पनि महिलाको प्रतिनिधित्व छैन ।

कूटनीति र वैदेशिक मामिलामा पुरुषको प्रभुत्व राष्ट्रसङ्घका स्थायी नियोगहरूमा फैलिएको छ । यहाँ महिलाहरूलाई स्थायी प्रतिनिधिका रूपमा कम प्रतिनिधित्व प्राप्त भएको छ । सन् २०२४ मेसम्ममा न्युयोर्कमा २५ प्रतिशत, जेनेभामा ३५ प्रतिशत र भियनामा ३३ दशमलव पाँच प्रतिशत स्थायी प्रतिनिधिमा महिला थिए ।

“हाम्रो काम विश्वासद्वारा निर्देशित छ । जब महिलाहरूले नेतृत्व गर्छन्, संसार सबै मानिसहरू र पृथ्वीका लागि राम्रो हुन्छ । यस वर्ष धेरै देश चुनावमा जान्छन्, हामी सबैले महिलाहरूलाई पहिलो स्थानमा राख्नुपर्छ । सबैको जीवनमा सुधार ल्याउनका लागि शासन र नेतृत्वमा महिलाको समान सहभागिता सबैभन्दा महत्त्वपूर्ण छ”, युएन वुमनका कार्यकारी निर्देशक सिमा बाहौसले भन्नुभयो ।

विज्ञप्तिमा नेतृत्वको पदमा महिलाको चयन र नियुक्तिले ‘लैङ्गिक समानताका लागि बलियो राजनीतिक इच्छाशक्तिको सङ्केत गर्दछ’ र आज विश्वले सामना गरिरहेका चुनौतीहरूको सामना गर्न सामूहिक प्रतिबद्धता देखाउँछ भनिएको छ ।

“महिला अधिकारलाई अगाडि बढाउनका लागि विश्वको सबैभन्दा प्रगतिशील खाका, बेइजिङ घोषणापत्र र कार्यका लागि प्लेटफर्म पारित भएको ३० वर्ष पूरा भएको हामीले तयारी गरिरहेका छौँ । युएन वुमनले महिलाहरूको नेतृत्व गर्न र सकरात्मक परिवर्तनलाई अगाडि बढाउने कामलाई सुनिश्चित गर्न निरन्तर काम गरिरहेको छ”, विज्ञप्तिमा भनिएको छ । सन् १९९५ मा बेइजिङमा भएको चौथो विश्व महिला सम्मेलनले बेइजिङ घोषणा र कार्यका लागि मञ्च अपनाएको थियो ।

मलेसियाको समुद्री पार्कका ५० प्रतिशतभन्दा बढी कोरल ( मुगा वा रङ्गिन चट्टान) बढ्दो समुद्री तापक्रमका कारण हुने बढ्दो मानवीय गतिविधि र ब्लिचिङबाट प्रभावित भएको मत्स्यपालन विभागले जनाएको छ ।

यो मूल्याङ्कन अप्रिल र जुनको बीचमा गरिएको अध्ययनपछि गरिएको आइतबार एक विज्ञप्तिमा उल्लेख छ । गम्भीर वा लामो गर्मीको तनावले कोरल चट्टानहरू समाप्त हुने खतरा बढ्छ । यद्यपि, तापक्रम घट्दा अधिक माछा मार्ने र प्रदूषणजस्ता अन्य हस्तक्षेप कम भएमा सुधारको सम्भावना हुन्छ ।

विभागले पर्यटन सेवा सञ्चालकलाई चट्टानमा दबाब कम गर्न मनोरञ्जन गतिविधिहरूमा संलग्न पर्यटकहरूको सङ्ख्या नियन्त्रण गर्न आग्रह गरेको छ ।

यदि ब्लिचिङ ८० प्रतिशतभन्दा बढी भएमा थप हस्तक्षेपसहित प्रभावित चट्टानको सुरक्षा र व्यवस्थापन लागि त्यहाँ पुग्ने पहुँचमा अस्थायी प्रतिबन्ध लगाउन सकिने विभागले जनाएको छ । विभागले बोर्नियो टापुका शोधकर्ता, गैरसरकारी संस्था, सबाह र सारावाक राज्यका प्रतिनिधिसँग ‘कोरल ब्लिचिङ रेस्पोन्स’ समिति गठन गरी समस्या नियन्त्रण प्रयास गरिरहेको बताएको छ ।

दक्षिणपूर्वी एसियाली देश मलेसियामा धेरै लोकप्रिय डाइभिङ स्थल र समृद्ध र जीवन्त समुद्री जीवन छ । यहाँका ४२ टापु वरपरको पानी समुद्री पार्कका रूपमा अङ्कित गरिएको छ ।

सामुद्रिक ब्लिचिङ घटनासँग सङ्घर्ष गरिरहेको समयमा विश्वभरका वैज्ञानिकले समस्या विस्तार र गम्भीर हुँदै गएको चेतावनी दिएका छन् ।

रेकर्ड गरिएको समुद्री तापक्रमले ६२ वटा देश र क्षेत्रमा चट्टानका केही भागहरू सेतो भएकाले तिनीहरू भित्र बस्ने शैवाललाई बाहिर निकाल्छन् ।

‘कोरल माइक्रोस्कोपिक जुक्सान्थेला’ शैवालसँग सहजीवी सम्बन्धमा बस्छ, जसले खाना उत्पादन गर्दछ र चट्टानलाई यसको रङ दिन्छ । शैवालबिना चट्टान सेतो हुन्छ र यहाँ तापक्रम घटेन भने कोरल चट्टान मर्छ ।

कोरल ब्लीचिङका परिणाम दूरगामी भएकाले समुद्रको स्वास्थ्यलाई मात्र नभई मानिसहरूको जीविकोपार्जन, खाद्य सुरक्षा र स्थानीय अर्थतन्त्रलाई पनि असर गर्छ ।

इजरायली प्रधानमन्त्री बेन्जामिन नेतन्याहूले गाजामा हमासविरुद्धको लडाइँको वर्तमान चरण समाप्त हुँदै गएको बताउनुभएको छ । उहाँले लेबनानी लडाकू समूह हिजबुल्लाहसँग जुध्न इजरायलले आफ्नो उत्तरी सीमामा थप सैनिक पठाउन सक्ने बताउनुभयो ।

इजरायल र हिजबुल्लाह युद्धको नजिक पुगिरहेका बेला उक्त टिप्पणीले तनावलाई अझ बढाउने देखिएको छ । नेतन्याहूले गाजामा जारी युद्धको अन्त्य भने नभएको पनि सङ्केत गर्नुभएको छ । इजरायली नेताले एक लामो टिभी अन्तर्वार्तामा भन्नुभयो, “सेना दक्षिणी गाजा शहर रफाहमा आफ्नो हालको जमिनी आक्रमण पूरा गर्ने तयारीमा छ, यसको मतलब यो होइन कि हमासविरुद्ध युद्ध समाप्त भएको छ ।” उहाँले अबका दिनमा गाजामा कम सेना आवश्यक पर्ने र हिजबुल्लाहसँग लड्नका लागि सेना परिचालन गरिने बताउनुभएको छ ।

इजरायलको नेतन्याहू निकट मानिने टिभी च्यानल१४ लाई दिएको अन्तर्वार्तामा उहाँले भन्नुभयो, “हिलो र सबैभन्दा महत्वपूर्ण, रक्षाका लागि, तर दशौं हजार विस्थापित इजरायलीलाई घर फर्कन अनुमति दिन पनि हाम्रा केही सेनालाई उत्तरतर्फ स्थानान्तरण गर्ने सम्भावना छ र हामी त्यो गर्नेछौं ।”

इरान समर्थित हिजबुल्लाहले अक्टोबर ७ मा हमासको सीमापार आक्रमणपछि गाजा युद्ध सुरु गरेलगत्तै इजरायलमाथि आक्रमण सुरु गरेको थियो । इजरायल र हिजबुल्लाहबीच त्यसयता हरेक दिनजसो गोली हानाहान हुँदै आएको छ, तर पछिल्ला हप्ताहरूमा युद्ध चर्किंदै गएको छ ।

हिजबुल्लाह हमासभन्दा धेरै शक्तिशाली छ र नयाँ मोर्चा खोल्दा अन्य इरानी प्रोक्सीहरू र सम्भवतः इरान स्वयं संलग्न ठूलो, क्षेत्रव्यापी युद्धको जोखिम बढ्नेछ जसले सीमाको दुवैतर्फ भारी क्षति र ठूलो हताहती निम्त्याउन सक्छ ।ह्वाइट हाउसका दूत अमोस होचस्टाइन गत साता इजरायल र लेबनानका अधिकारीसँग तनाव कम गर्ने प्रयासमा उक्त क्षेत्रको भ्रमण गर्नुभएको थियो । तर, लडाइँ भने जारी छ ।

नेतन्याहूले सङ्कटको कुटनीतिक समाधान खोज्न सकिने आशा व्यक्त गरे पनि आवश्यक परेको खण्डमा ‘फरक तरिकाले’ समस्याको समाधान गर्ने प्रतिबद्धता व्यक्त गर्नुभयो । “हामी विभिन्न मोर्चामा लड्न सक्छौं र त्यसका लागि हामी तयार छौं,” उहाँले भन्नुभयो ।

उहाँले कुनै पनि ‘कागजमा सीमित भएको सम्झौता’ मात्र नहुने बताउनुभएको छ । उहाँले भन्नुभयो, “हिजबुल्लाहलाई सीमाबाट गर्ने संयन्त्र र इजरायलीहरूलाई आफ्नो घर फर्काउनु पर्ने बताउँदै युद्ध सुरु भएको केही समयपछि दशौँ हजार मानिसहरूलाई सुरक्षित स्थानमा सारिएको थियो र उनीहरू अझै घर जान सकेका छैनन् ।”

हिजबुल्लाहले गाजामा युद्धविराम नहुञ्जेलसम्म इजरायलसँग लड्ने बताएको छ । समूहका नेता हसन नसरल्लाहले गत हप्ता इजरायललाई युद्ध सुरु नगर्न चेतावनी दिँदै हिजबुल्लाहसँग नयाँ हतियार र गुप्तचर क्षमता रहेको र यसले इजरायलभित्रका थप महत्वपूर्ण स्थानहरूलाई निशाना बनाउन मद्दत गर्न सक्ने बताउनुभएको थियो ।

दिल्लीका जलमन्त्री अतिशी सिंहले २८ लाख दिल्लीवासीले पानी नपाएसम्म आफ्नो हड्ताल जारी रहने बताउनु भएको छ । उहाँको अनिश्चितकालीन भोक हडताल चौथो दिनमा प्रवेश गरेको छ ।

जलमन्त्री आतिशीले ‘हरियाणा सरकारले दिल्लीलाई विगत तीन हप्तादेखि एक सय एमजीडी कम पानी दिइरहेको बताउँदै जबसम्म दिल्लीवासीले सहज रुपमा पानी पाउँदैनन् त्यतिन्जेलसम्म अनिश्चितकालीन अनशन जारी रहने बताउनु भएको हो । दिल्लीमा पानीको ठुलो अभाव भएकाले आफु अनशनमा बसेको उल्लेख गर्दै दिल्लीसँग आफ्नै पानी नभएकाले सबै पानी छिमेकी राज्यबाट आउने गरेकोमा विगत तीन हप्तादेखि हरियाणाले दिल्लीवासीलाई पानीको आपूर्ति घटाएपछि समस्या बढेको बताउनुभएको छ ।

दिल्लीवासीका लागि दैनिक ४६ करोड लिटर पानीे चाहिने उहाँले बताउनुभयो । हरियाणा सरकारले दिल्लीवासीलाई पानी उपलब्ध नगरेसम्म आफ्नो स्वास्थ्य खराब भएपनि अनशन जारी रहने उहाँको जिकिर थियो । उहाँले हिजो डाक्टर आएर जाँच गर्दा आफ्नो बीपी कम हुँदै गइरहेको ,शरिरमा चिनीको मात्रा कम हुँदै गइरहेको तथा तौल घट्दै गइरहेको बताउदै उहाँले आफ्नो स्वास्थ्य जति खराब भए पनि, संकल्प बलियो रहेको बताउनुभयो ।

साउदी अरबले हज तीर्थयात्राको क्रममा एक हजार ३०१ जनाको मृत्यु भएको आइतबार जनाएको छ ।

गर्मीको तनाव र अनधिकृत यात्राका कारण पाँचमध्ये चार जनाको मृत्यु भएको साउदी अधिकारीलाई उद्धृत गरी समाचारमा जनाएको छ ।

साउदी सरकारले ‘साउदी अरबको स्वास्थ्य सेवा तथा सुविधाले यस वर्ष गर्मीको कारण विरामी परेका धेरै मामिलालाई सम्बोधन गरेको तथा केही व्यक्तिहरू अझै पनि हेरचाहमा रहेको जनाउदै दुर्भाग्यवस, मृतृकको सङ्ख्या एक हजार ३०१ पुगेको जनाएको छ ।

मृत्यु हुनेमध्ये ८३ प्रतिशत ‘अनधिकृत रुपमा’ हज गर्न गएका थिए । उनीहरूमध्ये धेरैले पर्याप्त आश्रय वा आराम बिना, सूर्यको तातो्र प्रकाशमा लामो दूरी पैदल हिँडेको साउदी अरबका सरकारी अधिकारीले जारी गरेको विज्ञप्तिमा उल्लेख गरिएको छ ।

विज्ञप्ति अनुसार मृतकमध्ये ‘धेरै वृद्ध र दीर्घ बिरामी व्यक्ति’ रेहेका छन् भन सबै मृतकको परिवार पहिचान गरिएको छ ।

यस वर्षको हज तीर्थयात्राका क्रममा सयौँको मृत्यु र घाइते हुनुको मुख्य कारण चरम गर्मी रहेको उल्लेख गरिएको छ । सोमबार मक्काको तापक्रम रेकर्ड १२५ डिग्री फरेनहाइट पुगेको थियो । अनौपचारिक तीर्थयात्रीको सङ्ख्याले समस्या बढाएको अधिकारीले बताएका छन् ।

साउदी अरबले प्रत्येक तीर्थयात्रीलाई हजका लागि पवित्र शहर मक्कामा कानुनी रूपमा पहुँच विस्तार गर्न १८ लाख व्यक्तिलाई मात्र यात्राका लागि अनुमति दिएको थियो ।

यसैबीच, तीर्थयात्रीले यस वर्षको हज तीर्थयात्राको लागि कमजोर पूर्वाधार व्यवस्थापन भएको भनी साउदी अधिकारीको आलोचना गरेका छन् । आधिकारिक भ्रमणमा रहेका तीर्थयात्रीले पनि आफ्नो दिनको ठुलो हिस्सा भीषण गर्मीमा बाहिर हिँडेर बिताएको बताए । सिएनएनसँग कुरा गर्दै, केही प्रत्यक्षदर्शीले उनीहरूले उपासकहरूलाई बेहोस भएको र सेतो कपडाले ढाकिएको देखेको बताएका छन् ।

सरकारलाई आफ्नो राष्ट्रको कोटाको हिस्साको रूपमा मक्कामा दर्ता भएका र भ्रमण गरेका तीर्थयात्रीहरूको बारेमा मात्र थाहा भएकाले यस वर्षको हजमा मृत्युको कुल सङ्ख्या अझै बढ्न सक्ने आशङ्का गरिएको छ ।

श्रीलङ्काको पशु उत्पादन तथा स्वास्थ्य विभाग (डीएपीएच) का अधिकारीले बर्डफ्लुको सङ्क्रमण देखिएका देशबाट जनावर तथा पशुजन्य उत्पादनको आयात रोक्न कदम चालेको बताउनुभएको छ ।

विभागका महानिर्देशक हेमाली कोथलावालाले संयुक्त राज्य अमेरिकाबाट आएका गाईवस्तु पहिलो पटक एभियन इन्फ्लुएन्जा भाइरसबाट प्रभावित भएको पत्रकारलाई बताउँदै यसलाई रोक्न छिट्टै पहल गरिने उहाँले बताउनुभयो ।

श्रीलङ्काका अधिकारीहरू विदेशको घटनाक्रमबारे जानकार रहेको यहाँको कृषि उद्योग र उपभोक्ताको सुरक्षाका लागि कदम चालेकाले आइतबारदेखि प्रभावित मुलुकबाट आयातमा प्रतिबन्ध लगाउने निर्णय गरेको उहाँले बताउनुभयो । श्रीलङ्काले विगतका वर्षमा मानिसमा एच ९ एच ७ र एच ५ बर्ड फ्लुका बिरामी पत्ता लगाउने क्षमता विकास गरेको छ ।

भारतको दक्षिणपश्चिमी राज्य कर्नाटकको एउटा विमानस्थलमा सोमबार बमको धम्कीको इमेल प्राप्त भएको छ । यसले अधिकारीहरूलाई खोजी अभियान सुरु गर्न प्रेरित गरेको छ । प्रहरीका अनुसार बम पत्ता लगाउने तथा डिस्पोजल टोलीसहित स्निफर कुकुरलाई विमानस्थल परिसरमा लगिएको थियो । तर अन्तिम रिपोर्ट नआएसम्म जारी रहेको खोजीका क्रममा शङ्कास्पद केही पनि फेला परेको छैन ।

कालाबुर्गी विमानस्थल कर्नाटकको राजधानी बेङ्गलुरुबाट लगभग छ सय १७ किमी उत्तरमा छ । एक वरिष्ठ प्रहरी अधिकारीले सञ्चारमाध्यमलाई भन्नुभयो, “विमानस्थल निर्देशकलाई एक अज्ञात प्रेषकबाट एउटा इमेल प्राप्त भयो, जसमा विमानस्थल परिसरभित्र बम राखिएको दाबी गरिएको थियो । उहाँले मेल प्रेषकले शक्तिशाली बम प्रयोग गरेर पूरै विमानस्थल विस्फोट गर्ने धम्की दिएको बताउनुभयो ।” गत हप्ता भारतका ४१ विमानस्थल र मुम्बई सहरका ५० भन्दा बढी अस्पतालले बम भएको चेतावनी इमेल प्राप्त गरेका थिए । तर पछि ती सबै होक्स (फेक) कल भएको पाइएको छ ।

विमानस्थलहरूमा बढ्दो होक्स बम धम्कीको पृष्ठभूमिमा भारतको नागरिक उड्डयन सुरक्षा निकाय ब्युरो अफ सिभिल एभिएसन सेक्युरिटीले यस्ता धम्की दिनेहरूलाई पाँच वर्षको उडान प्रतिबन्धको प्रस्ताव गरेको छ । विगत दुई महिनामा राष्ट्रिय राजधानी क्षेत्र दिल्लीलगायत देशभरका विद्यालय, विमानस्थल र अस्पतालहरूमा होक्स (फेक) बम धम्कीहरूको शृङ्खला पठाइएको छ ।

क्रिमियामा अमेरिकी मिसाइलबाट युक्रेनी आक्रमणमा चार जनाको मृत्यु भएको मस्कोले बताएपछि क्रेमलिनले सोमबार संयुक्त राज्य अमेरिकालाई ‘परिणाम’ भोग्नुपर्ने चेतावनी दिँदै अमेरिकी राजदूतलाई बोलाएको छ ।

मस्कोले रुसी लक्ष्यहरूमा प्रहार गरिएको हतियारको आपूर्तिका लागि वासिङ्टन र किएभका पश्चिमी समर्थकहरूको आलोचना गरेको छ र उनीहरूलाई दुई वर्षको द्वन्द्वमा प्रत्यक्ष सहभागी भएको बताएको छ ।

क्रेमलिनका प्रवक्ता दिमित्री पेसकोभले सेवस्तोपोलमा आइतबारको आक्रमणलाई ‘बर्बर’ भन्दै वासिङ्टनमाथि ‘रुसी बालबालिकाको हत्या गरेको’ आरोप लगाउनुभयो । सेवस्तोपोलका गभर्नर मिखाइल रजभोझायेभले टेलिग्राममा मर्नेहरूमा दुई नाबालिग रहेको बताउनुभयो ।

पेसकोभले यसै महिनाको प्रारम्भमा पश्चिमी लक्ष्यहरूमा सम्भावित आक्रमणका लागि पश्चिमी मुलुकहरूलाई हतियार दिनेबारे राष्ट्रपति भ्लादिमिर पुटिनको टिप्पणीहरूतर्फ सङ्केत गर्नुभयो । “संयुक्त राज्य अमेरिकाको सहभागिता, प्रत्यक्ष संलग्नताले रुसी नागरिक मारिएका छन्, परिणामबिना हुन सक्तैन”, उहाँले भन्नुभयो, “के हुन्छ भन्ने समयले बताउने छ ।”

“युरोपमा र त्यसभन्दा माथि वासिङ्टनमा मेरा सहयोगीहरूसँग सोध्नुहोस्, त्यहाँका प्रेस सचिवहरूसँग सोध्नुहोस् कि तिनीहरूको सरकारले किन रुसी बालबालिका मारिरहेका छन्”, उहाँले भन्नुभयो ।

विदेश मन्त्रालयले अमेरिकी राजदूत लिन ट्रेसीलाई बोलाएको बताएको छ । पछि मन्त्रालयले एक विज्ञप्ति जारी गर्दै वासिङ्टनले ‘यो अत्याचारका लागि किएभ शासनसँगै समान जिम्मेबारी लिन्छ’ र आक्रमण ‘दण्डविहीन हुने छैन’ भनेको छ । रुसले आइतबार भएको आक्रमण अमेरिकाले आपूर्ति गरेको एटिएसिएमस मिसाइलले क्लस्टर वारहेडले भरिएको बताएको छ ।

मस्कोद्वारा स्थापित स्थानीय अधिकारीहरूले मिसाइलले बलौटे सामुद्रिक तट र होटलहरू भएको बन्दरगाह सहरको एक क्षेत्रमा प्रहार गरेको बताएका छन् । आक्रमणमा घाइते भएका २७ बालबालिकासहित ८२ जनालाई अस्पतालमा भर्ती गरिएको छ । तास समाचार एजेन्सीले सोमबार स्वास्थ्यमन्त्री मिखाइल मुराश्कोलाई उद्धृत गर्दै घाइतेमध्ये १४ जनाको अवस्था गम्भीर रहेको बताएको छ ।

यसै महिना एएफपीलगायत अन्तर्राष्ट्रिय समाचार एजेन्सीहरूको एक बैठकमा पुटिनले पश्चिमद्वारा युक्रेनलाई लामो दूरीको हतियार प्रदान गरेकामा आलोचना गर्नुभयो ।

“हामीलाई विश्वका ती (पश्चिमी) मुलुकहरूको संवेदनशील संरचनाहरूमा हमला हुने क्षेत्रहरूमा एउटै वर्गको हतियारहरूको आपूर्ति गर्ने अधिकार हामीसँग किन छैन ?”, पुटिनले भन्नुभयो, “अर्थात प्रतिक्रिया समरूप नहुनसक्छ, यसका बारेमा हामी सोच्नेछौँ ।”

पेसकोभले युक्रेनी आक्रमणका लागि लक्षित डाटा पश्चिमी मुलुकहरूले प्रदान गराएको पुटिनको भनाइ उद्धृत गर्नुभयो । रुसले सन् २०१४ मा क्रिमियामाथि एकपक्षीय कब्जा गरेको थियो ।

युक्रेनी राष्ट्रपति कार्यालयका प्रमुख एन्ड्री यरमकले सोमबार भन्नुभयो, “क्रिमिया युक्रेन हो ।” उहाँले सामाजिक सञ्जालमा भन्नुभयो, “रुसले क्रिमिया प्रायद्वीप छाड्नुपर्छ, त्यहाँ उनीहरूको सेना र सैन्य वस्तुहरूको अस्तित्व समाप्त हुनुपर्छ ।”

युक्रेनी राष्ट्रपतिका वरिष्ठ सहयोगी मिखाइलो पोडोल्याकले पनि क्रिमियालाई वैध लक्ष्य भएको बताउनुभयो । “सयौँ प्रत्यक्ष लक्ष्यहरूसहित क्रिमिया पनि ठूलो सैन्य शिविर र गोदाम हो, जसलाई रुसले आफ्नै नागरिकहरूसँग लुकाउने प्रयास गरिरहेको छ ।”