Author: nepal one

फुङ्लिङ (ताप्लेजुङ), २७ भदौः ताप्लेजुङको सदरमुकाम फुङ्लिङसहित आसपासको क्षेत्रमा लगाइएको कर्फ्यू आज पनि जारी छ । जेनजीको प्रदर्शनपछि देशमा सिर्जित विषम परिस्थितिका बीचमा हुनसक्ने सम्भावित हुलदङ्गा र अराजक गतिविधि रोक्न तथा शान्ति, सुरक्षा कायम राख्न बुधबारदेखि कर्फ्यू जारी भएको हो ।

प्रमुख जिल्ला अधिकारी शिवराज सेढाईंले आज सूचना प्रकाशित गर्दै बेलुका ७ बजेदेखि लागू हुनेगरी कर्फ्यू आदेश जारी गर्नुभएको छ । सेढाईंद्वारा जारी सूचनाअनुसार शनिबार बिहान ६ बजेसम्म जिल्लाभर कर्फ्यू लागू हुनेछ ।

पूर्वमा मित्रराष्ट्र भारतको सिमानाबाट पश्चिम, पश्चिममा सङ्खुवासभा जिल्लाको सिमानाबाट पूर्व, उत्तरमा मित्रराष्ट्र चीन, तिब्बतको सिमानाबाट दक्षिण र दक्षिणमा तेह्रथुम तथा पाँचथर जिल्लाको सिमानाबाट उत्तर क्षेत्रभित्र कर्फ्यू लागू हुने सूचनामा उल्लेख छ । कर्फ्यूको समयावधिभर कुनै पनि भेला, सभा, जुलुस, प्रदर्शन, बैठक, घेराउलगायत गतिविधि गर्न नपाइने जारी सूचनामा उल्लेख गरिएको छ ।

कर्फ्यूको अवधिमा एम्बुलेन्स, वारुणयन्त्र, शववाहन, स्वास्थ्यकर्मी, सञ्चारकर्मी, मानवअधिकाकर्मी र कूटनीतिक नियोगका व्यक्तिले भने आवतजावतका लागि सवारीसाधन प्रयोग गर्न पाउने छन् । उक्त सुविधाका लागि सेवासँग सम्बन्धित परिचयपत्र वा अन्य कागजात हुनुपर्ने प्रजिअ सेढाईंले जानकारी दिनुभयो । कर्फ्यूको उल्लङ्घन गरेमा कानुनी कारबाही हुने जिल्ला प्रशासन कार्यालय ताप्लेजुङले जनाएको छ ।

धुलिखेल (काभे्रपलाञ्चोक) – बिपी राजमार्ग अन्तर्गत यहाँको नमोबुद्ध नगरपालिका–२ भकुण्डेबेँसीमा नेपाली सेना र नेपाल प्रहरीको संयुक्त सुरक्षा टोलीले गाडी जाँच गर्ने क्रममा स्रोत नखुलेको नगद रकम र सुनको गरगहनासहित एक जनालाई नियन्त्रणमा लिएको छ ।

जिल्ला प्रहरी कार्यालयका प्रहरी नायब उपरीक्षक मीनबहादुर घलेका अनुसार आज दिउँसो काठमाडौँबाट सिरहातर्फ जाँदै गरेको बाप्र ०१–००६ ख ९१७३ नं को विद्युतीय गाडीमा नगद तीन लाख ५० हजार ३०० रुपैयाँ र १२ लाख २६ हजार ९४ रुपैयाँ उनन्चालिस पैसा बराबरको गरगहनासहित एक जनालाई नियन्त्रणमा लिएको हो ।

प्रहरीका अनुसार गाडीमा सवार सिरहा जिल्ला भगवानपुर गाउँपालिका–२ बस्ने १८ वर्षीय नरेशकुमार यादवलाई नगद र गरगहनासहित नियन्त्रणमा लिइएको हो । “यादवलाई खानतलासी गर्दा निजले बोकेको झोलाबाट स्रोत नखुलेको नगद र गरगहना बरामद गरेका हौँ”, प्रनाउ घलेले भन्नुभयो ।

यादवको साथबाट बरामद गरेको गरगहनामा हालको बजार मूल्यअनुसार एक लाख ६१ हजार ८८८ रुपैयाँ १२ पैसा पर्ने ७५ लालको छड्के तिलहरी थान–१, दुई लाख ५९ हजार २१ रुपैयाँ पर्ने १२ दशमलव ६ लालको मंगलसुत्र थान–१, तीन लाख तीन हजार ९६९ रुपैयाँ ६४ पैसा पर्ने ६३ दशमलव तीन लालको बेरुवा औँठी थान–१ र पाँच लाख एक हजार २०५ रुपैयाँ ६३ पैसा पर्ने सिक्री थान ३ रहेको प्रहरीले जनाएको छ । यादवमाथि थप अनुसन्धान भइरहेको प्रहरीले जनाएको छ ।

भरतपुर – चितवनको भरतपुर महानगरपालिकाका उपप्रमुखको घर जलाउँदा ग्यास पड्किएर एक जनाको मृत्यु भएको छ । जेनजी समूहको प्रदर्शनका क्रममा यही भदौ २४ गते दिउँसो उपप्रमुख चित्रसेन अधिकारीको घरमा आगो लगाउँदा ग्यास सिलिन्डर पड्किएर गम्भीर घाइते भएका भरतपुर–२१ का १९ वर्षीय सरोज गुरुङको उपचारका क्रममा आज मृत्यु भएको हो ।

ग्यास पड्किएर गुरुङको टाउको, छाती र पेटमा चोट लागेको थियो । उहाँको पुरानो मेडिकल कलेज भरतपुरमा उपचार भइरहेको थियो । आगलागीबाट उपप्रमुख अधिकारीको घर पूर्ण रुपमा क्षतिग्रस्त भएको जिल्ला प्रहरी कार्यालय चितवनका प्रमुख एवं प्रहरी उपरीक्षक गोविन्द पुरीले जानकारी दिनुभयो ।

यस्तै पूर्वी चितवनको भण्डारामा खानेपानी ट्याङ्कीको चेम्बरमा डुबेर एक जनाको मृत्यु भएको छ । आज बिहान राप्ती नगरपालिका–७ सिक्सग्रुपस्थित अमृतपानी खानेपानी तथा सरसफाइ समितिको चेम्बरभित्र स्थानीय ४० वषीय कमल घलेको डुबेर मृत्यु भएको जिल्ला प्रहरी कार्यालयले जनाएको छ ।

काठमाडौँ, २७ भदौःकाठमाडौँको नयाँबस पार्कस्थित लोत्से मलमा आगजनी हुँदा ३० करोडभन्दा बढीको क्षति भएको छ ।जेनजी प्रदर्शनका क्रममा यही भदौ २४ गते राति ९ः०० बजे लोत्से मलमा आगजनी भएको थियो । उक्त आगो भोलिपल्ट बिहान ५ः३० बजे नियन्त्रणमा आएको थियो । उक्त आगजनीबाट रु ३५ करोडभन्दा बढीको क्षति भएको लोत्से बहुउदेश्यीय प्रालिले जनाएको छ ।

दसैँ अगाडि उक्त घटना भएकाले चाडपर्व लक्षित गरी बिक्रीका लागि ल्याइएका कपडासहितका ५० भन्दाबढी कपडा पसल जलेर पूर्ण रुपमा नष्ट भएका प्रालिका अध्यक्ष एवं सञ्चालक दिपक कुँवरले जानकारी दिनुभयो । उहाँका अनुसार कपडाबाहेक मोबाइल, रेष्टुरेन्टलगायत पसलसमेत जलेका छन् । यसअघि २०७९ फागुन १ गते यातायात मजदुरको आन्दोलनका क्रममा लोत्से मल तोडफोड हुनुका साथै आगजनीसमेत भएको थियो ।

सोहीबेला उक्त मलभित्र रहेको मोबाइल पसल लुटपाट हुनुका साथै प्रहरीको भ्यानहरु जलाइएको थियो । नयाँबसपार्क सञ्चालन गरेको लोत्से बहुउदेश्यीय प्रालिका अध्यक्ष कुँवरले व्यावसायिक संरचनामाथि विभिन्न समय आक्रमण तथा आगजनी हुँदा व्यवसायीको मनोबल घट्दै गएको बताउनुभयो ।

“आगजनी र तोडफोडका घटनाले नेपालमा व्यवसाय गर्ने वातावरण हराउँदै गएको छ । व्यावसायिक भवनमा विभिन्न समयमा आक्रमण हुँदा चिन्ता थपिएको छ”, उहाँले भन्नुभयो । मलभित्रका पसल लुटपाट गर्ने तथा आगजानी गर्नेलाई सिसि क्यामेरा फुटेजका आधारमा कडा कारबाही गनुपर्नेमा उहाँले जोड दिनुभयो ।

काठमाडौँ महानगरपालिकासँग सार्वजनिक निजी साझेदारीमा लोत्से बहुउदेश्यीय प्रालिले नयाँबसपार्कमा मल सञ्चालन गर्दै आएको छ । विसं २०७४ मा लोत्से मल निर्माण गरी सञ्चालनमा ल्याइएको हो ।

भक्तपुर, २७ भदौ-जेनजी आन्दोलनका क्रममा यही भदौ २४ गते आन्दोलनरत समूहले तोडफोड गरी आगो लगाइदिँदा सूर्यविनायक नगरपालिका–२ बालकोटस्थित नेपाल कम्युनिष्ट पार्टी (एमाले)का अध्यक्ष केपी शर्मा ओलीको निवास खण्डहरमा परिणत भएको छ ।

ओली निवासमा यतिखेर स्थानीय सलमपाखा युथ क्लबले ताल्चा लगाएर प्रवेश निषेधको बोर्ड टाँसेर राखेको छ । आन्दोलनरत भीडमध्ये केहीले ओली निवासमा रहेका महत्त्वपूर्ण सामान लुटेर लगेको र कवाडी सङ्कलन गर्नेहरूसमेतले सामान लान थालेपछि सोही दिन राति ८ः०० बजे फोडिएका फलामका बार वाइरिङ गरी क्लबले ताल्चा लगाएर राखेको छ ।

आगो लगाइएपछि कतिपय सामान, गाडी तथा मोटरसाइकल, बैठक हलसहितको एउटा र निवास गरी दुई ठूला भवन र सुरक्षाकर्मीको निवास रहेको साना दुईवटा भवन जलेर खण्डहर भएको छ । हजारौँ पुस्तक रहेको पुस्तकालय आधाभन्दा बढी जलेको छ ।

त्यसैगरी एमालेका पोलिटब्यूरो सदस्य महेश बस्नेतको गुण्डुस्थित घर पनि खण्डहरमा परिणत भएको छ । आन्दोलनकारीले लगाइदिएको आगोले तीनतले घर पूरै जलेर खण्डहरमा परिणत भएको छ ।

त्यसैगरी वडा नं ७ गुण्डुका वडाध्यक्ष रवीन्द्र सापकोटाको घर पनि आन्दोलनकारीले तोडफोड गरी आगो लगाइएको छ । नेता बस्नेतको घर आगजनी गर्ने टोलीले नै वडाध्यक्षको घर तोडफोड गरी आगजनी गरेको सापकोटाले बताउनुभयो ।

आन्दोलनमा उत्रिएको सोही टोलीले गुण्डुस्थित वडा कार्यालयको भवनसमेत जलाएर खरानी बनाएका छन् । कार्यालयमा पार्किङ गरिराखेको राष्ट्रिय स्वतन्त्र पार्टीका सचेतक एवं सांसद सन्तोष परियार चढ्ने सरकारी गाडी र जिल्ला समन्वय समितिको गाडीलगायत अन्य सवारीसाधन पूर्ण रूपमा जलेको छ । गुण्डुकै प्रहरी चौकी र सँगै जोडिएको खानेपानी कार्यालय जलेर नष्ट छ ।

त्यसैगरी सूर्यविनायक नगरपालिकाका प्रमुख वासुदेव थापाकी छोरी सुमित्रा थापाको सूर्यविनायक दार्जिलिङ हाइटमा रहेको घर पनि आन्दोलनकारीले तोडफोड गरी जलाएर पूर्ण क्षति पुर्याएका छन् । घरमै रहेकी सुमित्राले घरभित्र रहेको कुनै पनि सामानसमेत झिक्न नदिई तोडफोड गरी आगो लगाइदिँदा खण्डहर भएको थापाले बताउनुभयो ।

त्यस्तै बागमती प्रदेशका स्वास्थ्यमन्त्री किरण थापामगरको सूनपा–८ सिपाडोलमा रहेको घर तोडफोड गरेका छन् । प्रहरी बृत्त जगातिबाट लुटेर लगेका दुई बन्दुकसहित पुगेका आन्दोलनकारीले घरमा आगो लगाउन खोज्दा स्थानीय महिला प्रतिकारमा उत्रिएपछि बन्दुक छाडेर आन्दोलनकारी भागेका सुजन थापाले जानकारी दिनुभयो ।

त्यसैगरी वडा नं ५ का वडाध्यक्ष राजकुमार जोशीको घर तोडफोड गरेका छन्भने एक मोटरसाइकल जलाएका छन् । आन्दोलनकारीले आगो लगाइदिँदा सूर्यविनायक नगरपालिका–४ दधिकोट गाम्चाको वडा कार्यालय भवन पूर्ण रूपमा क्षति भई खण्डहर बनेको छ ।

मध्यपुरथिमि शङ्खधरचोकस्थित मध्यपुरथिमिका पूर्व नगरप्रमुख मदनसुन्दर श्रेष्ठको घरमा पनि तोडफोड गरी क्षति पुर्याएका छन् । सूर्यविनायक नगरपालिकाको कार्यालय भवन तोडफोड गरिएको छभने भवन आगो लगाउने प्रयास गरेपछि नगर प्रहरी र स्थानीयले प्रतिकारमा उत्रिएपछि आन्दोलनकारी भागेर गएको स्थानीयले बताएका छन् ।

नजिकै रहेको डिभिजन सडक कार्यालय तोडफोड गरी आगजनी गर्दा धेरै ठूलो क्षति भएको छभने नजिकै रहेको कोष तथा लेखा नियन्त्रण कार्यालय तोडफोड गरिएको छ । आन्दोलनरत समूहले सरकारी कार्यालयतर्फ जिल्ला प्रशासन कार्यालयको मुद्दा शाखालगायत पछाडि भाग जलाएर पूर्ण रूपमा क्षति पुर्याएका छन् । मुद्दा शाखाको सम्पूर्ण दस्तावेज र सामग्री जलेको छ भने सँगै रहेको जिल्ला समन्वय समिति, काठमाडौँ नगर विकास कार्यालय, नेपाल स्काउट कार्यालय, क्षयरोग कार्यालय जलाएका छन् ।

महननगरीय प्रहरी वृत्त मध्यपुरथिमिको भवन पूर्ण रूपमा जलाउँदा नष्ट भएको छ भने सँगै रहेको मध्यपुरथिमि नगरपालिकाको कार्यालय भवन जलाउँदा ठूलो क्षति पुगेको छ । मध्यपुरथिमि नगरपालिकाका पूर्वप्रमुख मदनसुन्दर श्रेष्ठको घर ताडफोड भएको भने मनोहरामा खोला किनारामा रहेको प्रहरी प्रभागमा आगो लगाइदिँदा खण्डहर बनेको छ ।

मध्यपुरथिमि राधेराधेस्थित स्थानीय विकास श्रेष्ठको घरमा भाडामा रहेको यातायात कार्यालय तोडफोड गरी जलाइएको छ । आन्दोलनकारीले गाडी र मोटरसाइकलमा पेट्रोल छर्केर आगो लगाएपछि कार्यालयको सटर फोडर भित्र तीन तलासम्मका सबै सामान बाहिर निकालेर तोडफोड गरी आगो लगाउँदा सम्पूर्ण सामानदेखि कार्यालय भवन खण्डहरमा परिणत भएको छ ।

जिल्ला ट्राफिक प्रहरी परिसर कटुञ्जेको भवन पूर्ण रूपमा नष्ट भएको छ । यस भवनमा कारबाहीका लागि ल्याइएको १०० भन्दा बढी सवारीसाधन पूर्ण रूपमा जलाएको जानकारी दिँदै प्रमुख एवं ट्राफिक प्रहरी निरीक्षक प्रदीप खत्रीले करिब १० वटा मोटरसाइकल १६ बोरा चामल, खाद्यान्न, ट्राफिक प्रहरीको पोशाक, मोबाइललगायत सामग्री आन्दोलनमा आउनेहरूले लुटेर लगेको जानकारी दिनुभयो । कटुञ्जेकै सामुदायिक प्रहरी प्रभागमा आगो लगाइदिँदा खण्डहर भएको छ ।

जगातिस्थित प्रहरी बृत्तमा तोडफोड गरी हतियार लुटेर लगेका छन् भने चाँगुनारायण नगरपालिकाभित्रको खरिपाटी प्रहरी चौकी आन्दोलनकारीले आगो लगाउँदा जलेर नष्ट भएको छ भने चाँगुनारायणकै सुडाल प्रहरी चौकी पनि खण्डहर भएको छ ।

भक्तपुरका प्रमख जिल्ला अधिकारी नमराज घिमिरेले प्रहरी कार्यालयलाई सञ्चालन गर्ने प्रयास भइरहेको र अन्य सरकारी कार्यालयहरूको क्षति भएको विवरण सङ्कलन गरी मुचुल्का उठाएपछि मात्र सञ्चालन गर्नेगरी तयारी गरिएको जानकारी दिनुभयो । आइतबारदेखि नै खण्डहरमा परिणत कार्यालयलाई कुनै न कुनै बिन्दुबाट सेवा सञ्चालन गरेर जनताको काममा फर्किने गरी तयारी भइरहेको जानकारी दिनुभयो ।

बाजुरा । जेनजी आन्दोलनमा सहभागी बाजुराको स्वामीकार्तिक खापर गाउँपालिका २ सुपानाका २३ बर्षका ओजन बुढा मृत फेला परेका छन्।
४ दिनदेखि सम्पर्कविहीन रहेका उनी शुक्रवार दिउँसो काठमाडौं स्थित बि एण्ड बि अस्पतालमा मृत भेटिएका हुन् ।बुढा काठमाडौं स्थित चाबिलमा बस्दै आएका थिए भने उनी कक्षा १२ मा अध्ययन गरिरहेका थिए ।

यसअघि उनको फोन अफ थियो भने खोजी कार्य गर्दा पनि सम्पर्कमा आउँन सकेका थिएनन् । यहीँ भदौ २३ गते काठमाडौंमा जेनजी युवाहरुको आन्दोलन उनी सहभागी भएका थिए ।आज आफन्तहरुले दिनभर खोजी कार्य गर्दा उनी आज दिउँसो अस्पतालमा मृत भेटिएको पारिवारीक स्रोतले जनाएको छ ।

गण्डकी – जेनजी आन्दोलनका क्रममा कारागार कार्यालय, कास्कीबाट भागेका सात सय ७३ कैदीबन्दीमध्ये आज साँझसम्ममा ८५ जना कारागार फर्किएका छन् ।

कारागार कार्यालयका सूचना अधिकारी महेन्द्रबहादुर कुँवरका अनुसार कैदीबन्दी फर्कने क्रम जारी छ । “कारागार विभाग र जिल्ला प्रहरी कार्यालयले भागेका कैदीबन्दीलाई काराबार फर्कन आह्वान गरेको छ”, उहाँले भन्नुभयो, “हामीले आफन्तमार्फत कैदीबन्दीलाई सम्पर्क गरेर तत्काल कारागार फर्कन भनेका छौँ ।”

जेनजी प्रदर्शनकारीको आन्दोलन उग्र बन्दै गएपछि गत मङ्गलबार राति कारागारबाट कैदीबन्दी फरार भएका थिए । प्रदर्शनकारीले कारागार तोडेर ३५ महिलासहित सात सय ७३ कैदीबन्दीलाई भगाएका थिए ।

कास्की कारागारबाट भागेका तीन जनालाई जिल्ला प्रहरी कार्यालय, बागलुङले पर्वत र बागलुङको सीमा क्षेत्र मालढुङ्गाबाट बिहीबार नियन्त्रणमा लिएको थियो । भागेका कैदीबन्दीलाई नियन्त्रणमा लिन प्रहरी सक्रिय बनेको छ । कास्की, म्याग्दीलगायतका कारागारबाट कैदीबन्दी भागेका थिए ।

सिरहा, २७ भदौ : जितिया पर्वको अवसरमा जिल्ला प्रशासन कार्यालय सिरहाले विशेष व्यवस्था स्वरूप आगामी शनिबारसम्म हरेक दिन तीन घण्टाका लागि निषेधाज्ञा खुकुलो गर्ने निर्णय गरेको छ ।

प्रमुख जिल्ला अधिकारी वसन्त अधिकारीका अनुसार, नागरिकको सुरक्षा र जनजीवनलाई सहज बनाउन सात घण्टा निषेधाज्ञा जारी गरिएको भए पनि पर्वको तयारीका लागि दिउँसो ३ बजेदेखि ६ बजेसम्म स्थानीय हाटबजार तथा पसल सञ्चालन गर्न दिने निर्णय गरिएको हो ।

इलाका प्रशासन कार्यालय लहानका शाखा अधिकृत सन्तोष रायले लहान क्षेत्रमा लाग्ने साप्ताहिक हटिया र पसल यही समयमा सञ्चालन हुने जानकारी दिनुभयो । उहाँले भन्नुभयो, “नागरिकलाई आवश्यक सामग्री किनमेल गर्दा अनावश्यक भीडभाड नगरी स्वास्थ्य मापदण्ड पालना गर्दै तुरुन्त घर फर्किन अनुरोध गरिन्छ । अन्यथा कुनै अवाञ्छित गतिविधि वा लुटपाट भएमा सुरक्षाकर्मीले आवश्यक कारबाही गर्नेछन् ।”

प्राचीन कालदेखि मिथिला क्षेत्रमा असोज कृष्णपक्ष सुरु भएसँगै जितिया पर्वको तयारी सुरु हुन्छ । विशेषगरी महिलाले सन्तानको दीर्घायु र सुस्वास्थ्यका लागि २४ घण्टासम्म पानीसमेत नखाई कठोर व्रत बस्ने यो पर्वलाई पौराणिक र सांस्कृतिक दृष्टिले महत्वपूर्ण मानिन्छ । आगामी आइतबार जितिया पर्व मनाइँदै छ ।

सिमकोट (हुम्ला), २७ भदौः बडादशैँ र तिहारलगायतका पर्वलाई लक्षित गर्दै खाद्य व्यवस्था तथा व्यापार कम्पनी लिमिटेड हुम्लाले सहुलियत पसल सञ्चालन गर्ने भएको छ ।

विगतका वर्षमा झैँ यस वर्ष पनि सहुलियत मूल्यमा खाद्यान्न उपलब्ध गराउने उद्देश्यले पसल सञ्चालन गर्न लागिएको हो । कम्पनीका अनुसार वर्ष चामल, तेल र चिनी सहुलियत मूल्यमा उपलब्ध गराइनेछ ।

खाद्य व्यवस्था तथा व्यापार कम्पनी लिमिटेड शाखा कार्यालय हुम्लाका प्रमुख कृष्णबहादुर थापा मगरले भदौ ३० गतेदेखि सहुलियत पसल सञ्चालन गरिने जानकारी दिनुभयो । उहाँका अनुसार खाद्यान्न र चिनीमा प्रतिकेजी रु ५ छुट दिइनेछ भने तेलमा प्रतिलिटर रु सात छुट दिइनेछ ।