काठमाडौं । नेकपा एमालेले अख्तियार दुरुपयोग अनुसन्धान आयोग र भ्रष्टाचार निवारणसँग सम्बन्धित विधेयकमा प्रधानमन्त्री केपी शर्मा ओलीले अस्वाभाविक चासो राखेको भन्दै समाचार आएको भन्दै आपत्ति जनाएको छ ।
एमाले प्रमुख सचेतक महेश बर्तौलाले यस विषयमा छलफल गर्न प्रधानन्त्रीले संसदको राज्य व्यवस्था तथा सुशासन समितिका पदाधिकारीलाई बालुवाटारमा बोलाइएको समाचारमा सत्यता नभएको बताएका हुन् ।
उनले भनेका छन्, ‘संसदको राज्य व्यवस्था तथा सुशासन समितिअन्तर्गत छलफलमा रहेको अख्तियार दुरुपयोग अनुसन्धान आयोग र भ्रष्टाचार निवारणसँग सम्बन्धित विधेयकहरूमा सम्माननीय प्रधानमन्त्रीज्यूले अस्वभाविाक चासो राखेर राज्य व्यवस्था समितिमा रहेका सत्तापक्षीय सांसदहरुलाई छलफलका लागि बालुवाटार बोलाएको भन्ने समाचारहरुमा कुनै पनि सत्यता नरहेको तथा बोलावट त परै जाओस् भेट र बिषयका बारेमा समेत स्वयम् प्रधानमन्त्रीलाई कुनै सूचना वा सामान्य जानकारी समेत नभएको स्पस्ट पार्न चाहन्छु ।आधिकारिक स्रोत बिना नै प्रधानमन्त्रीज्यूलाई जानकारी नै नभएको विषयमा प्रधानमन्त्रीको अस्वाभाविक चासो भनेर गलत समाचार आउनु असाध्यै दुःखद र अस्वाभाविक रहेको छ ।’
प्रधानमन्त्रीले आयोग र भ्रष्टाचार निवारणसम्बन्धी संसदीय उपसमितिको प्रतिवेदनप्रति चासो राखेको भन्दै सामाचार आएको थियो । राष्ट्रिय सभाबाट पारित भएर प्रतिनिधि सभामा आएको दुवै विधेयकमाथि छलफल गर्न राज्य व्यवस्था तथा सुशासन समितिले १२ सदस्यीय उपसमिति बनाएको थियो ।
उपसमितिले दुवै प्रतिवेदन पास गरेर मूल समितिमा बुझाएको छ । सोही उपसमितिका १२ जना सांसदमध्ये सत्तापक्षका सांसदलाई प्रधानमन्त्री केपी शर्मा ओलीले आज बिहान १० बजे प्रधानमन्त्री निवास बालुवाटारमा बोलाइएको खबर सार्वजनिक भएको थियो ।
उपसमितिले नीतिगत निर्णयको परिभाषा गरेको विषय र अख्तियार दुरुपयोग अनुसन्धान आयोगमा बेनामे उजुरी दिन पाउने प्रावधान यथावत् राख्ने निर्णय गरेको थियो । यस विषयमा प्रधानमन्त्रीले चासो दिएको बताइएको थियो ।
