दाङ । मानव कल्याण तथा वातावरण संरक्षण केन्द्र दाङका कार्यकारी निर्देशक प्रदीप मजगैयाँले महिलाहरुले नेतृत्वमा रहेर पनि काम गर्न सक्ने अवस्था नरहेको बताएका छन् ।

बुधबार दाङको घोराहीमा ग्लोबल एटु जेड कन्सल्टेन्ट प्रालिको आयोजना तथा नेपाल वान एचडी, र मानव कल्याण तथा वातावरण संरक्षण केन्द्र दाङको समन्वय र वल्र्ड लिंकको मुख्य प्रायोजनमा भएको लैंगिक समानता र सामाजिक समावेशीकरण प्रवद्र्धनका लागि महिला अभिमुखीकरण कार्यक्रममा कार्यकारी निर्देशक मजगैयाँले महिलाका क्षेत्रमा काम गर्न खोज्दा पनि नसकेको अवस्था रहेको बताए ।

उनले पत्रकारले किन महिला जनप्रतिनिधिले काम गर्न नसकेको हो भन्ने विषयलाई अनुसन्धान गरी बाहिर ल्याउनुपर्ने बताए । उनले भने, ‘महिलाका क्षेत्रमा काम गर्न खोज्दा पनि नसकेको अवस्था छ । जस्तो घोराहीको उपमेयरले बजेट बनाउनुहुन्छ, बजेट पढ्नु हुन्छ, तर उहाँले भनेको शीर्षकमा बजेट छुट्याउन गाह्रो हुन्छ । जस्तो मैले दाङमा महिला क्रिकेट गरौं भनें, उहाँले हुन्छ पनि भन्नुभयो, तर बजेट छुट्याउन सक्नुभएन । बजेट भाषण उहाँले गर्ने तर उहाँले भनेको बजेट छुट्याउन नपाउने अवस्था छ । यो त एउटा उदाहरण मात्र हो । सबै ठाउँमा यस्तै समस्या छ । मेयरले हो त उहाँलाई डोमिनेट गरेको ? यस्ता विषयलाई पत्रकारले उठान गर्नुपर्छ ।’

उनले पत्रकारको क्षमता अभिवृद्धिका लागि आफूहरुले १५ जिल्लामा यस्तो कार्यक्रम गर्न लागेको बताए । उनले पत्रकारलाई आवश्यक उपकरण, महिलाहरुलाई पढ्नका लागि छात्रवृत्ति र निःशुल्क इन्टरनेटका लागि वल्र्डलिंकसँग मिलेर काम गर्न लागेको जानकारी दिए ।