काठमाडौ– नेपाल उद्योग वाणिज्य महासंघको आयोजनामा हरेक बर्ष आयोजना हुँदै आएको नेपाल अन्तर्राष्ट्रिय व्यापार मेला यस बर्ष मंसिर १४ गतेदेखि काठमाडौंमा आयोजना हुने भएको छ । महासंघले मंगलबार काठमाडौंमा पत्रकार सम्मेलन गरी व्यापार मेलाबारे जानकारी गराएको हो ।

काठमाडौंको भृकुटीमण्डपमा हुने व्यापार मेलामा चीन, भारत, पाकिस्तान, बंगलादेश लगायतका देशबाट व्यापारीको सहभागिता हुने महासंघले जनाएको छ । त्यस्तै मेलामा नेपाली युवा उद्यमी मञ्चद्वारा मेड इन नेपाल पेभिलियन तथा जुत्ता उत्पादक संघको तर्फबाट ४० स्टल रहने र चीनबाट ५५, भारतबाट ३०, बंगलादेश र पाकिस्तानबाट ८/८ स्टलहरु रहनेछन् । कुल २१० वटा स्टलहरुमार्फत मेलामा स्वदेशी तथा विदेशी वस्तु तथा सेवाहरुको प्रदर्शनी रहने महासंघका अध्यक्ष चन्द्र ढकालले जानकारी दिए । मेलाले स्वदेशी बस्तुको प्रवद्र्धन गर्न मद्धत पुग्ने उनले विश्वास व्यक्त गरे ।

मेलाका अवसरमा चीनको गान्छु प्रदेशबाट १२ जना व्यापारी प्रतिनिधिमण्डल र नेपाली प्रतिनिधिमण्डलबीच छलफल गर्ने कार्यक्रम रहेको अध्यक्ष ढकालले जानकारी दिए । कोभिड महामारीपछि हुन लागेको मेलाको प्रतिनिधिसभाका सभामुख देवराज घिमिरेले उद्घाटन गर्ने कार्यक्रम रहेको महासंघले जनाएको छ ।