जलेश्वर (महोत्तरी), २८ मङ्सिर : अख्तियार दुरुपयोग अनुसन्धान आयोगका आयुक्त जयबहादुर चन्दले भ्रष्टाचार अन्त्य नभएसम्म देशले उन्नति गर्न नसक्ने बताउनुभएको छ ।महोत्तरी जिल्लाको सदरमुकाम जलेश्वरमा आज अख्तियार दुरुपयोग अनुसन्धान आयोग बर्दिबास कार्यालयले आयोजना गरेको ‘भ्रष्टाचार नियन्त्रण र सुशासन प्रवर्द्धन’ सम्बन्धी जिल्लास्तरीय अन्तक्र्रिया कार्यक्रमलाई सम्बोधन गर्नुहुँदै आयुक्त चन्दले सार्वजनिक पदमा बसेका जनप्रतिनिधि तथा राष्ट्रसेवक कर्मचारीलाई जनताको सुख, शान्ति र समृद्धिमा समर्पित गर्न सल्लाह दिनुभयो ।

महोत्तरीको १० नगरपालिका र पाँच गाउँपालिकाका प्रमुख, उपप्रमुख, अध्यक्ष, उपाध्यक्ष, प्रमुख प्रशासकीय अधिकृत, विभिन्न कार्यालयका प्रमुख, प्रमुख जिल्ला अधिकारी, चारवटै सुरक्षा निकायका प्रमुख र विभिन्न सरोकारवाला सङ्घसंस्थाका प्रमुख सहभागी रहेका सो कार्यक्रममा आयुक्त चन्दले भ्रष्टाचार गर्ने कसैको पनि भलो हुँदैन र भ्रष्टाचार गरे आफू र आफ्ना आउँदा सन्ततिले त्यसको परिणाम भोग्नुपर्ने निश्चित रहेको भन्नुुहुँदै आजैदेखि सबैले आ–आफ्नो तर्फबाट भ्रष्टाचार नगर्ने÷नगराउने प्रतिबद्धता जाहेर गर्न अपिल गर्नुभयो ।

अख्तियार दुरुपयोग अनुसन्धान आयोग बर्दिबास कार्यालयले आयोजना गरेको सो कार्यक्रमलाई जिल्ला समन्वय समिति महोत्तरीका प्रमुख सुमनकुमार लाल कर्णले अख्तियार दुरुपयोग अनुसन्धान आयोग भ्रष्टाचारीलाई कारबाहीका लागि मात्रै नभई जिम्मेवारीवोध गराउने र मार्गदर्शनको कामसमेत गर्ने संस्था रहेको बताउनुभयो ।