निर्वासित क्याटलोनियाका पृथकतावादी नेता कार्लेस पुज्डेमोनले आफू पक्राउ परे पनि केही हप्ताभित्रै क्षेत्रीय प्रमुखको बहसमा भाग लिन स्पेन फर्कने प्रतिबद्धता व्यक्त गरेका छन् ।

उनी विवादास्पद स्वतन्त्रताको असफल घाृषणापछि सन् २०१७ मा अभियोजनबाट बच्न सकियोस् भनी विदेश पलायन भएका थिए । त्यसपछि स्पेनी न्याय प्रणालीले उनलाई खोजिरहेको छ ।

पुज्डेमोनले स्पेन फर्केमा पक्राउ पर्ने खतरा छ, जहाँ उनीमाथि आतंकवाद, भ्रष्टाचार र उच्च राजद्रोहको आरोप लगाइएको छ ।

पुइग्डेमोनले भनेका छन्, ‘हामी जे गर्न प्रतिबद्ध छौँ र हामी त्यही गर्न गइरहेका छौँ । मेरो स्पेन फर्कने अभियान भनेका यसैका लागि हो ।’

स्पेनको सर्वोच्च अदालतले गत जुलाई १ मा क्याटलोनियाका पृथकतावादीका लागि आममाफीको कानुन लागू नहुने फैसला सुनाएपछि उनको यो पहिलो सार्वजनिक सम्बोधन हो ।

‘मेरो दायित्व भनेको मनोनयनको बहस भएमा क्याटलोनियाको संसदमा जानु हो । म त्यहाँ उपस्थित हुनेछु,’ स्पेनको सीमा नजिकै दक्षिणपश्चिमी फ्रान्समा आफ्नो ‘टुगेदर फर क्याटालोनिया पार्टी’को एक र्यालीमा भने ।

पुज्डेमोनले आफू फर्केमा उनी गैरकानुनी हिरासत, स्वेच्छाचारी नजरबन्दबाट बच्ने आशा व्यक्त गरेका छन् ।

क्याटालोनियाको असफल अलगावको समयमा क्षेत्रीय प्रमुख रहेका उनीविरूद्धका अभियोगका कारण उनी स्वदेश फर्किनसकेका छैनन् । अन्य थुप्रै पृथकतावादीहरूविरुद्धको कानुनी कारबाही यसअघि नै खारेज भइसकेको छ ।

उनीविरूद्ध सन् २०१९ मा सडक प्रदर्शनका लागि ‘आतङ्कवादी अपराध’का लागि पनि अनुसन्धान भइरहेको छ ।

मे महिनामा भएको चुनावमा आफ्नो पार्टी दोस्रो स्थानमा आउँदा क्याटालोनियाको प्रमुखमा निर्वाचित हुने आशा उनले गरेका थिए तर संसदमा पर्याप्त मत प्राप्त गर्न सकेनन् ।

पुज्डेमोनका पृथकतावादी समूहका नेताहरू स्पेनको सत्तारुढ समाजवादी पार्टीका सदस्य साल्भाडोर इलासँग पराजित भए, जसले प्रमुख पदका लागि अर्को प्रमुख स्वतन्त्र गठबन्धनसँग वार्ता गरिरहेका छन् ।

अगष्ट २६ भित्र कुनै पनि दलले क्षेत्रीय प्रमुखको नाम घोषणा नगरेमा अक्टोबरमा नयाँ निर्वाचन हुनेछ ।

छिमेकी फ्रान्सबाट क्याटलोनियाको चुनावका लागि प्रचार गरेका पुज्डेमोनले भने ‘अब निर्वासनमा कुनै चुनावी अभियान हुनेछैन । अर्को चुनावी अभियान क्याटालोनियामा हुनेछ र म त्यहाँ हुनेछु ।’