बीबीसी । इजरायलले गरेको एउटा हवाई हमलामा परी उत्तरी गाजास्थित एउटा शरणार्थी शिविरमा रहेका कम्तीमा ३३ जना मारिएका छन् ।

गाजा स्ट्रिपस्थित हमास प्रशासनले जनाएअनुसार मारिनेमा २१ जना महिला छन् । जबिलामा गरिएको हमलाबारे इजरायलको तर्फबाट अहिलेसम्म कुनै प्रतिक्रिया आएको छैन । बाक्लो जनघनत्व रहेको सो क्षेत्रलाई केही सातादेखि इजरायली फौजहरूले घेराबन्दी गरिरहेका छन् ।

यसैसाता इजरायली हमलामा हमासका प्रमुख याह्या सिन्वार मारिएपछि एकथरीले युद्ध रोकिन सक्ने आशा गरेका थिए। तर सो समूहका उपनेताले हमास अझ सशक्त भएर निस्कने बताएका छन् ।

अमेरिकी राष्ट्रपति जो बाइडनले इजरायलले हिज्बुल्लाहसँग लडाइँ गरिरहेको लेबननमा ‘युद्धविरामको दिशामा काम गर्ने’ सम्भावना रहे पनि ‘गाजामा गाह्रो रहेको’ बताएका छन् । जर्मनीको राजधानी बर्लिनमा जर्मन, फ्रेन्च र ब्रिटिश नेताहरूसँग भेटवार्ता गरेर फर्कने क्रममा बाइडनले यो अभिव्यक्ति दिएका हुन् ।

गाजामा हमास सरकारद्वारा सञ्चालित सञ्चारमाध्यमका अनुसार इजरेलले शुक्रवार गरेको हवाई हमलामा ८५ जनाभन्दा बढी घाइते भएकामा केही गम्भीर छन् मानिसहरू भग्नावशेषमा पुरिएकाले मृतकको सङ्ख्या ५० पुग्न सक्ने उसले जनाएको छ।