बीबीसी । ह्वाइटहाउसका प्रवक्ता जोन किर्बीले अजरबैजान एयरलाइन्स दुर्घटनाग्रस्त भएको घटनामा रुस जिम्मेवार हुनसक्ने “प्रारम्भिक सङ्केत“ अमेरिकाले पाएको बताएका छन् ।

गत बुधबार भएको दुर्घटनामा ३८ जनाको मृत्यु भएको थियो । किर्बीले त्यसबारे थप व्याख्या गरेनन् । तर उनले दुर्घटनाको अनुसन्धानका लागि अमेरिकाले सहायता गर्ने प्रस्ताव गरेको बताए । चेचन्यामा अवतरणको प्रयास गर्ने क्रममा उक्त विमानमा रुसी हवाई प्रतिरक्षा प्रणालीबाट प्रहार भएको ठानिएको छ ।

तर पछि उक्त विमान त्यसो नगरीकन क्यास्पिअन सागरतर्फ मोडिँदै काजाकस्तानतर्फ लागेको थियो जहाँ त्यो दुर्घटना हुन पुग्यो । यसबारे क्रेमलिनले प्रतिक्रिया जनाउन अस्वीकार गरेको छ । तर रुसी नागरिक उड्डयन निकायले चेचन्याको अवस्था त्यसमा हुने युक्रेनी ड्रोन हमलाका कारण ‘निकै जटिल’ रहेको जनाएको छ ।

किर्बीका अनुसार अमेरिकाले पाएका सङ्केत दुर्घटनाग्रस्त विमानका व्यापक रूपमा फैलिएका तस्बिरभन्दा भिन्न रहेको जनाएको वासिङ्टन पोस्टले लेखेको छ । अजरबैजानका उड्डयन विज्ञ र अन्यले ’इलेक्ट्रोनिक जामिङ’का कारण विमानको जीपिएस प्रणालीहरू प्रभावित भएको र त्यसपछि त्यो रुसी हवाई प्रतिरक्षा क्षेप्यास्त्र विस्फोटनबाट निस्किएको छर्रा लागेर नस्ट भएको बताएका छन् ।

अजरबैजानले रुसलाई आरोप नलगाए तापनि उक्त विमान ‘बाह्य हस्तक्षेप’को मारमा परेको र अवतरण गर्ने क्रममा दुर्घटनाग्रस्त भएको त्यहाँका यातायात मन्त्रीले बताएका छन् । नबियबले अनुसन्धानहरूले ‘कस्ता खले अस्त्र वा अझ कस्तो खाले रकेट प्रयोग भएको थियो’ भनेर जाँच गर्ने बताए ।