गत महिना कृष्ण सागरमा रूसी तेल ट्याङ्करबाट तेल चुहिएपछि दुई दर्जनभन्दा बढी समुद्री स्तनपायी मृत फेला परेको एक डल्फिन उद्धार केन्द्रले आइतबार बताएको छ । अधिकारीहरूले प्रकोपको परिणामलाई नियन्त्रण गर्न तीव्र रूपमा काम गरिरहेका छन् ।

डिसेम्बर १५ मा क्रिमियालाई दक्षिणी रुससँग जोड्ने केर्च स्ट्रेटमा दुई पुराना रूसी ट्याङ्करहरू आँधीबेहरीमा फसेपछि यो चुहावट सुरु भएको थियो । 

एउटा ट्याङ्कर डुब्यो र अर्को किनारमा थन्कियो । यिनीहरूले वरिपरिको पानीमा मजुट नामक करिब दुई हजार चार सय टन भारी इन्धन तेल पोखेको अधिकारीहरूले अनुमान गरेका छन् ।

डल्फिनहरूको उद्धार र पुनःस्थापना गर्ने रुसको डेल्फा केन्द्रले उक्त घटनापछि ६१ वटा मृत सिटेसियनहरू रेकर्ड गरेको बताएको छ । तीमध्ये ३२ वटा सम्भवतः तेल चुहावटका कारण मरेका थिए । 

सिटेसियन एक प्रकारको जलीय स्तनपायी हो । यसमा ह्वेल, डल्फिन र पोर्पोइजहरू समावेश छन् । “शवहरूको अवस्था हेर्दा सम्भवतः यी सिटेसियनहरूको ठूलो हिस्सा प्रकोपपछि पहिलो १० दिनमा मरे”, केन्द्रले भन्यो । 

केन्द्रका अनुसार मारिएकाहरू मध्ये अधिकांश ‘अजोभ’ डल्फिनहरू थिए । अजोभ डल्फिन जस्तै देखिने तर बेलुगा र नार्वालसँग नजिकको सम्बन्ध भएका हार्बर पोर्पोइजको एक प्रकार हो ।

रुसको आपत्कालीन मन्त्रालयले आइतबार उक्त घटनाको नतिजा हटाउन काम गरिरहेको तर ‘तीव्र हावा र छाल’ ले केही समुद्र तटहरूमा तेल फ्याँकेको बताएको छ । 

“अडसठ्ठी किलोमिटर (४२ माइल) भन्दा बढी तटरेखा सफा गरिएको छ”, मन्त्रालयले भन्यो । क्रिमियाको समुद्री तट र रुसको दक्षिणी तटबाट प्रदूषित माटो निकाल्न सयौँ स्वयंसेवक तैनाथ गरिएको छ । 

रुसी अधिकारीहरूका अनुसार घटनामा संलग्न इन्धन तेलको प्रकार विशेष गरी सफा गर्न गाह्रो छ किनभने यो बाक्लो र भारी छ र सतहमा तैरिँदैन ।