काठमाडौं । नेकपा (माओवादी केन्द्र) ले ‘मध्य पहाडी लोकमार्ग अभियान’ सञ्चालन गर्ने भएको छ । आइतबार अध्यक्ष पुष्पकमल दाहाल ’प्रचण्ड’ को निवास खुमलटारमा बसेको पदाधिकारी बैठकले जेठ २ गतेदेखि ‘मध्य पहाडी लोकमार्ग अभियान’ सुरू गर्ने निर्णय गरेको प्रचण्डको सचिवालयले जनाएको छ ।

त्यस्तै बैठकले ‘हुलाकी मार्गकेन्द्रित ‘जनतासँग माओवादीः तराई–मधेस जागरण अभियान’को समीक्षा गरेको छ । सो अभियानले राष्ट्रिय एकता सुदृढ गर्न सफल भएकोले माओवादी केन्द्रको मात्र नभई सम्पूर्ण राष्ट्र कै अभियान बन्न पुगेको पनि माओवादीले जनाएको छ ।

बैठकमा माओवादीप्रति देखिएको जनविश्वास, अभियानको तयारी, कार्ययोजना र संगठनात्मक पक्षबारे विस्तृत छलफल भएको थियो।