नाइजेरियामा सरकारद्वारा सञ्चालित आतङ्कविरोधी अभियानहरू तीव्र बन्दै गएका छन्, जसअनुसार हालैका दिनमा कम्तीमा ११ जना आतङ्ककारी नेताहरू मारिएको जानकारी प्राप्त भएको छ। यो विवरण नाइजेरियाका रक्षामन्त्री मोहम्मद बडारुले बुधबार राजधानी अबुजामा आयोजित पत्रकार सम्मेलनमार्फत सार्वजनिक गर्नुभएको हो।

उहाँले जानकारी दिनुहुँदै भन्नुभयो ,”देशको उत्तरी क्षेत्रमा सक्रिय तथा निकै खतरनाक मानिएका आतङ्ककारी समूहका एकजना प्रमुख नेता बेल्लो टुर्जि हाल सुरक्षाबलको कारबाहीका कारण फरार अवस्थामा छन्।” मन्त्रीका अनुसार हाल देशका विभिन्न भागमा सञ्चालन भइरहेका अभियानहरू उल्लेखनीय रूपमा सफल भइरहेका छन्, विशेषतः उत्तरपूर्वी क्षेत्रमा सुरक्षाबलले उल्लेख्य उपलब्धि हासिल गरेका छन्।

“हाम्रो सुरक्षाबलले आतङ्ककारीहरूका हरेक चुनौतीको साहसपूर्वक सामना गर्दै उनीहरूलाई महत्वपूर्ण क्षति पुर्‍याएका छन्,” मन्त्री बडारुले बताउनुभयो।

उहाँले थप जानकारी दिँदै भन्नुभयो कि सरकारद्वारा गुप्तचर प्रणालीमा पनि सुधार गरी सुरक्षालाई अझ सुदृढ बनाइएको छ, जसले गर्दा आतङ्कवादी आक्रमणहरूलाई समयमै नियन्त्रणमा लिन सकिने अपेक्षा गरिएको छ।

मन्त्रीले देशमा विद्यमान सुरक्षा चुनौतीहरू सामाजिक र राजनीतिक विभाजन, आर्थिक कठिनाइ, सीमापार समस्या तथा अन्तर्राष्ट्रिय आतङ्क गतिविधिहरूसँग सम्बन्धित रहेको बताउँदै यस्ता समस्याको समाधानका लागि केवल सैन्य उपाय मात्र नभई समग्र विकास, सामाजिक समावेशिता तथा क्षेत्रीय सहकार्य आवश्यक हुने धारणा राख्नुभयो।

यसअघि, अप्रिल २३ मा राष्ट्रपति बोला टिनुबुले देशको बढ्दो हिंसा र सुरक्षाजन्य चुनौतीहरूको गम्भीर मूल्याङ्कन गर्दै राष्ट्रिय सुरक्षा रणनीतिमा व्यापक पुनरावलोकन तथा सुधारको निर्देशन दिनुभएको थियो। “अब यथेष्ट भयो,” भनी उहाँले अबुजामा आयोजित सुरक्षा प्रमुखहरूको बैठकमा भन्नुभएको थियो।

मन्त्रीले राष्ट्रपतिको स्पष्ट निर्देशनले सुरक्षाबलमा नयाँ ऊर्जा थपिएको र आतङ्कविरोधी अभियानमा अझ दृढताका साथ अघि बढ्न प्रेरणा प्राप्त भएको उल्लेख गर्नुभयो।