टर्कीका राष्ट्रपति रेसेप तैयप एर्दोगानले बुधबार आफ्ना रुसी समकक्षी भ्लादिमिर पुटिनलाई टेलिफोन गरी युक्रेनमा शान्तिस्थापनाका लागि ’सबै पक्ष’ सम्मिलित प्रक्रियालाई टर्कीले समर्थन गर्ने बताउनुभएको छ ।

एर्दोगानले पुटिनसँग भन्नुभयो, “टर्कीले युद्धको सुरुवातदेखि नै न्यायोचित शान्तिका लागि इमानदारीपूर्वक प्रयास गरिरहेको छ र यस सन्दर्भमा सबै पक्षको सहभागितामा दिगो शान्ति स्थापना गर्ने उद्देश्यले गरिएको दृष्टिकोणलाई समर्थन गर्दछ।

‘ब्ल्याक सी’ क्षेत्रका आफ्ना दुवै छिमेकीसँग मैत्रीपूर्ण सम्बन्ध रहेको टर्कीले गत मे महिनायता युक्रेन र रुसबीच तीन चरणको शान्ति वार्ता को आयोजना गरिसकेको छ ।

अङ्काराले युक्रेनको क्षेत्रीय अखण्डताको संरक्षणमा जोड दिँदै आएको छ भने रुसमाथि पश्चिमा प्रतिबन्धबाट पछि हटेको छ ।

अमेरिकी राष्ट्रपति डोनाल्ड ट्रम्पले अलास्कामा पुटिनसँग ऐतिहासिक भेट गरेको तीन दिनपछि सोमबार युक्रेनका राष्ट्रपति भोलोदिमिर जेलेन्स्की र युरोपेली नेताहरूसँग वासिङ्टनमा वार्ता गर्नुभएको थियो ।

नेटोका प्रमुख मार्क रुटले एर्दोगानलाई मङ्गलबार युरोप फर्कने क्रममा फोन गरेको टर्कीको राष्ट्रपतिको कार्यालयद्वारा जारी एक विज्ञप्तिमा जनाइएको छ ।

उहाँहरू ‘नेटोको सबैभन्दा महत्त्वपूर्ण देशहरूमध्ये एकको रूपमा शान्ति प्रक्रियामा टर्कीको योगदान’ को बारेमा छलफल गर्नुभयो र घनिष्ठ समन्वयमा रहन सहमत हुनुभएको छ ।

उहाँहरुबीच सम्भाव्य र दिगो सुरक्षा प्रत्याभूतिका बारेमा पनि विचार आदानप्रदान भएको विज्ञप्तिमा उल्लेख छ ।