काठमाडौं । अमेरिकाको रक्षा मन्त्रालयलाई युद्ध मन्त्रालयका रुपमा परिवर्तन गरिने भएको छ । अमेरिकी राष्ट्रपति डोनाल्ड ट्रम्पले रक्षा मन्त्रालयलाई युद्ध मन्त्रालयका रुपमा परिणत गर्नेसम्बन्धी कार्यकारी आदेशमा आज हस्ताक्षर गर्दैछन् । यस्तै रक्षामन्त्री पिट हेगसेथलाई युद्धमन्त्री भनिनेछ ।

विगतमा पनि पेन्टागन युद्ध मन्त्रालयको रुपमा थियो । सन् १७८९ मा स्थापना गरिएको युद्ध मन्त्रालय सन् १९४७ सम्म अस्तित्वमा थियो । ट्रम्पले जारी गर्ने कार्यकारी आदेशले रक्षामन्त्री, पेन्टागन र कार्यरत अधिकारीलाई नयाँ नाम प्रयोग गर्ने अनुमति दिन्छ ।

आदेशले रक्षामन्त्री हेगसेथलाई स्थायी रुपमा नाम परिवर्तन गर्नका लागि आवश्यक कानुनी र कार्यकारी कदमहरु सिफारिस गर्न निर्देशन दिएको छ । तर, संसदीय स्वीकृतिविना औपचारिक रुपमा नाम परिवर्तन गर्न सकिने व्यवस्था भने छैन । ह्वाइट हाउसले स्थायी रुपमा नाम परिवर्तनका लागि कति लागत लाग्छ भन्नेकुरा भने खुलाएको छैन । तर, उक्त कार्यका लागि अर्बौं डलर लाग्ने अनुमान गरिएको छ ।