अमेरिकी राष्ट्रपति डोनाल्ड ट्रम्पले रुस–युक्रेन युद्ध अन्त्य गर्ने उपायबारे छलफल गर्न युरोपेली नेताहरूले सोमबार र मङ्गलबार अमेरिकाको भ्रमण गर्ने घोषणा गर्नुभएको छ ।

न्युयोर्कमा पत्रकारहरूसँग कुरा गर्दै ट्रम्पले चाँडै रुसी राष्ट्रपति भ्लादिमिर पुटिनसँग पनि कुराकानी गर्ने बताउनुभएको छ ।

उहाँले भन्नुभयो, “केही युरोपेली नेताहरू सोमबार वा मङ्गलबार व्यक्तिगत रूपमा हाम्रो देश आउँदैछन् ।” तर, उहाँले कुन नेताहरूलाई लक्षित गर्दै बोलिरहनुभएको थियो भन्ने स्पष्ट थिएन ।

यसअघि, अमेरिकी वित्तमन्त्री स्कट बेसेन्टले वासिङ्टन रुसमाथि थप दबाब बढाउन तयार रहेको जनाउँदै युरोपलाई पनि मस्कोलाई वार्ताको टेबलमा ल्याउन ठोस कदम चाल्न आग्रह गर्नुभएको थियो ।

यी टिप्पणीहरू रुसले ड्रोन र मिसाइलको सबैभन्दा ठूलो लहर लिएर युक्रेनमाथि रातारात आक्रमण गरेको केही घण्टापछि आएका हुन् ।

बेसेन्टले ट्रम्प र उपराष्ट्रपति जेडी भान्सले युरोपेली आयोगकी अध्यक्ष उर्सुला भोन डेर लेयनसँग धेरै रचनात्मक कुराकानी गरेको जानकारी दिनुभयो । उहाँले आफैँले पनि भोन डेर लेयनसँग छलफल गरेको बताउनुभयो ।

उहाँका अनुसार, अमेरिका र युरोपेली सङ्घ (इयु) बीच रुसमाथि दबाब बढाउने तयारीसहित संयुक्त कारबाहीबारे विचारविमर्श भएको छ ।

यदि अमेरिका र इयुले रूसी तेल खरिद गर्ने मुलुकहरूलाई लक्षित गर्दै थप प्रतिबन्ध र माध्यमिक भन्सार शुल्क लगाए भने रूसी अर्थतन्त्र पूर्ण रूपमा कमजोर हुनेछ र यसले राष्ट्रपति पुटिनलाई वार्ताको टेबलमा बस्न बाध्य पार्नेछ भन्ने बेसेन्टको विश्वास छ ।