काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेले आफूलाई कारागारबाट जबरजस्ती निकालिएको प्रष्टिकरण दिएका छन्। आफूलाई ‘कस्टडी’ मा राख्नका लागि सुरक्षा प्रमुखहरुलाई भनेको उनको दावी छ ।

लामिछानेले फेसबुक लाइभमा आएर भनेका छन्, ‘म आफूले चाहेर निस्किएको होइन । सुरक्षा दिन सकिन्न भनेर मलाई जबरजस्ती बाहिर निकालिएको हो । मलाई जस्तो पत्र दिइयो, जस्ताको तस्तै सार्वजनिक गरेको छु ।’ उनले आजै नेपाल प्रहरी र सशस्त्र प्रहरीसँग आफूले कुरा गरेर फेरि थुन्न भनेको बताए ।

लामिछानेले भने, ‘तपाईंहरुले मलाई आफ्नो कस्टडीमा राख्नुस् या कारागारमा पठाउनुस् भनेर उहाँहरुलाई भनें । उहाँहरुले आफै सुरक्षित बस्नुस्, परेको बेला आफैं सम्पर्क गर्छौं भन्नु भयो । सुरक्षा दिन नसकेरै पत्र दिएको होला भन्ने कुरा गर्नुभयो ।’

आजै न्यायिक निकायहरुलाई पनि औपचारिक जानकारी गराएको उनले बताएका छन् । आफू सरकार बनाउने र सरकारकोदौडमा नरहेको उनले प्रष्ट पारेका छन् । ‘मेरो नाममा विवाद गर्नु जरुरी छैन । मलाई डिफेम गर्न पर्दैन । म यो रेसमा नै छैन । झुटो मुद्दा अझै खेपिरहेको छु । प्रहरीले आफैं सुरक्षित बस भन्छ । बाटोमा जा भन्छ । बाटोमा आगो लिएर बसेको भिड छ । अब भन्नुस मैले बाँच्न पाउने कि नपाउने ? कांग्रेस–एमालेदेखि जेनजीसम्म आउँदा ममाथिको अन्याय नरोकिने नै हो त ?’ उनले प्रश्न गरे ।

उनले भनेका छन्–
म आज सिधाकुरा आफ्नो शैली प्रस्तुत गर्न आएको छु–
१. कारागारबाट म निस्किन चाहेको हैन भिड बढेपछि कारागारले मलाई जबर्जस्ती मलाई बाहिर निकालेको हो । मैले बिनापत्र जान्न भनेको हुँ । उनीहरूले जस्तो पत्र दिए जस्ताको त्यस्तै सार्वजनिक गरिसकेको छु ।

२. आजै मैले नेपाल प्रहरी र सशस्त्र प्रहरीका प्रमुखहरूलाई आईजीहरूलाई मलाई तपाईंहरूले आफ्नो कस्टडीमा राख्नुहोस्, नियन्त्रणमा लिनुस् या कारागारमा पठाउनुस्–उहाँहरूले स्पष्ट भन्नुभयो–तपाईं आफै सुरक्षित बस्नुस् सुरक्षा दिन नसकेरै कारागारले पत्र दिएको होला ।

३. सुरक्षा निकायबाट यस्तो जवाफ आएपछि मैले आजै न्यायिक निकायहरूलाई जानकारी गराइसकेको छु ।

४. म सरकार बनाउने सरकारमा जाने कुनै पनि दौडमा छैन । कसैसँग कतै कुनै बैठक गरेको छैन । मेरो नाममा कसैले विवाद गर्न जरुरी छैन। म कुनै रेसमा छैन भनेर धेरै पटक भनिसकें । रेसमा नआओस् भनेर डिफेम गर्न जरुरी छैन । तर यो देश रहनु पर्छ लोकतन्त्र रहनु पर्छ र नागरिक सर्वोच्चता रहनु पर्छ । यो कुरामा म कसैसँग नडराइ बाँचुन्जेल राख्नेछु ।

५. यो आन्दोलन जेनजीको हो । नेतृत्व जेनजीले नै तय गरोस् । म आफ्नो मुद्दा कानुनी माध्यमबाट लडिरहेको छु लडिरहनेछु । ओली–देउवाको कूशासनको सबैभन्दा शिकार भएको म तिनले लगाएको झुटो मुद्दा अझै पनि झेलिरहेको छु । तिनले लगाएको झुटो मुद्दा जिल्लैपिच्छे अझै पनि खेपिरहेको छु । जनताले ओली–देउवालाई खेदेर लखेटे तर तिनले लगाएको झुटो मुद्दा मेरो टाउकोमा अझै हटेको छैन ।

सरकार छैन सुरक्षा निकाय सुरक्षा दिन सक्दिन आफै बस भन्छ । कारागार बाटोमा जा भन्छ । जहाँ एउटा ठूलो भिड हातमा आगो लिएर बसेको छ आक्रोश लिएर बसेको छ–भन्नुस्, मैले बाँच्न पाउने कि नपाउने ?

कांग्रेस–एमालेबाट जेनजीसम्म आइसकेपछि पनि ममाथिको अन्याय नरोकिने नै हो त यो देशमा ? मलाई र म नेतृत्वको रास्वपालाई कुनै पनि लाभ चाहिएको छैन । लाउड एन्ड क्लियर ।

जेलले निस्क भनेर धकेलेर निकालेको पत्र बोकेर सुरक्षा निकायले नै सुरक्षा दिन नसक्ने त्यही जेलमा कुन विधिबाट जाऊँ?