काठमाडौं । प्रधानमन्त्री सुशीला कार्कीले आगामी फागुन २१ गतेभित्र प्रतिनिधि सभाको निर्वाचन सम्पन्न गराउने मुख्य लक्ष्यका साथ आफ्नो अन्तरिम सरकारले काम गरिरहेको बताएकी छन् । आज (बिहीबार) राष्ट्रका नाममा सम्बोधन गर्दै उनले ६ महिनाभित्र निष्पक्ष निर्वाचन गराउने मुख्य जिम्मेवारीसहित आफू प्रधानमन्त्री बनेको स्मरण गर्दै निर्वाचनका लागि आवश्यक जनशक्ति, बजेट, सामग्री र सुरक्षाको तयारी सुरु भइसकेको बताइन् ।

उनले १८ वर्षका जेनजी युवा पुस्तालाई मताधिकार प्रदान गर्न र मतदाता नामावली अद्यावधिक गर्न अध्यादेशमार्फत निर्वाचन कानुन संशोधन गरिसकिएको जानकारी दिइन् । विदेशमा रहेका नेपाली नागरिकहरूलाई पनि मतदानमा सहभागी गराउने सम्भावनाबारे निर्वाचन आयोगसँग छलफल भइरहेको उनले उल्लेख गरिन् ।

‘स्वतन्त्र, भयरहित तथा निष्पक्ष निर्वाचनलाई सफलतापूर्वक सम्पन्न गर्न सबै राजनीतिक दल, नागरिक समाज, सञ्चार जगत तथा सम्बद्ध सबै सरोकारवालाहरूलाई सक्रिय सहभागिताका लागि आह्वान गर्दछु,’ उनले भनिन् । प्रधानमन्त्री कार्कीले देशैभर शान्तिपूर्ण वातावरण कायम राख्न सबैलाई आग्रह गरेकी छन् । उनले ६ महिने चुनावी सरकारले आन्दोलनमा अभिव्यक्त सबै काम गर्न सक्ने अवस्था नरहेको स्वीकार गर्दै आफ्नो मुख्य ध्यान निर्वाचन सम्पन्न गराउनमा केन्द्रित हुने स्पष्ट पारिन् ।