काठमाडौं । बाली लगाउने समयमा सधैंजसो रासायनिक मल अभाव झेल्दै आएका किसानले यसपालि हिउँदे बाली लगाउँदा भने सहजै पाउने स्थिति देखिएको छ ।

सरकारी कम्पनीसँग १ लाख मेट्रिक टनभन्दा बढी रासायनिक मल मौज्दात रहेको र ७५ हजार मेट्रिक टनभन्दा बढी आयातका क्रममा रहेका कारण किसानले यसपालि अभाव झेल्नु नपर्ने देखिएको हो । कृषि तथा पशुपंक्षी विकास मन्त्रालयका अनुसार कृषि सामग्री कम्पनी र साल्ट ट्रेडिङसँग १ लाख ८ हजार ९०८ मेट्रिक टन रासायनिक मल मौज्दात छ ।

कृषि सामग्री कम्पनीसँग युरिया ११ हजार २२२ मेट्रिक टन, डीएपी ४९ हजार २६९ मेट्रिक टन र पोटास ३ हजार ८ मेट्रिक टन तथा साल्ट ट्रेडिङसँग ७ हजार ३७७ मेट्रिक टन युरिया, ३३ हजार ७९१ मेट्रिक टन डीएपी र ३९४० मेट्रिक टन पोटास मौज्दात रहेको मन्त्रालयले जनाएको छ । मन्त्रालयका अनुसार हिउँदे बालीका लागि ६० हजार मेट्रिक टनभन्दा बढी डीएपी मल आवश्यक पर्छ ।

आलु र तोरीका लागि डीएपी मल चाहिन्छ । कृषि सामग्री र साल्ट ट्रेडिङसँग ८० हजार टनभन्दा बढी डीएपी मल स्टक रहेका कारण किसानले अभाव झेल्नु नपर्ने देखिएको हो । चालु आर्थिक वर्ष २०८२/८३ मा करिब ६ लाख मेट्रिक टन रासायनिक मल आयात गर्ने लक्ष्य रहेकामा हालसम्म करिब ४ लाख ७१ हजार ३०० मेट्रिक टन खरिदका लागि टेण्डर भएको छ । जसमध्ये १ लाख ९४ हजार ८५ मेट्रिक टन आयात भइसकेको छ ।

कृषि सामग्री कम्पनीले १ लाख १५ हजार ४०५ मेट्रिक टन र साल्ट ट्रेडिङले ७८ हजार ६६० टन मल आयात गरेका हुन् । कृषि सामग्री कम्पनीको ७५ हजार मेट्रिक टनभन्दा बढी रासायनिक मल आउने क्रममा रहेको मन्त्रालयले जनाएको छ । किसानले गत असार साउनमा रोपाइँका लागि आवश्यक मात्रामा मल पाएका थिएनन्।

तत्कालीन कृषिमन्त्री रामनाथ अधिकारीले मागको तुलनामा सरकारले अनुदान रकम कम छुट्याएका कारण मल आपूर्तिमा समस्या भएको बताएका थिए । चालु आर्थिक वर्ष रासायनिक मलमा अनुदानका लागि सरकारले २८ अर्ब ८२ करोड रुपैयाँ विनियोजन गरेको छ । अधिकारीले साउन २९ गते प्रतिनिधि सभाको बैठकमा अनुदान रकम नबढाए मल अभावको समस्या समाधान हुँदैन भनेका थिए । –रासस