काठमाडौँ । सरकारले पूर्वप्रधानमन्त्री माधव कुमार नेपाललाई उपलब्ध गराइँदै आएको सम्पूर्ण सुरक्षाकर्मी फिर्ता गरेको छ। प्रशासन सिंहदरवार विशेष स्रोतका अनुसार पूर्वप्रधानमन्त्री नेपालका लागि व्यवस्था गरिएका सबै सुरक्षाकर्मी फिर्ता गर्ने निर्णय गरिएको हो ।

पूर्वप्रधानमन्त्रीको हैसियतमा नेपाललाई १६ जना सशस्त्र प्रहरी र २ जना नेपाल प्रहरी गरी १८ जना सुरक्षाकर्मी उपलब्ध गराइएको थियो। सो कार्यविधिअनुसार नै उनका सबै सुरक्षाकर्मी फिर्ता गरिएको हो। नेपालविरुद्ध भ्रष्टाचार मुद्दा दर्ता भएकाले सुविधा कटौती गरिएको गृह मन्त्रालय स्रोतले बतायो ।

पतञ्जलि जग्गा हिनामिना प्रकरणमा विशेष अदालतले तोकेको ३५ लाख रुपैयाँ धरौटी रकम बुझाएर नेपाल रिहा भएका थिए।

यसअघि पनि सरकारले पूर्वप्रधानमन्त्रीद्वय केपी शर्मा ओली र पुष्पकमल दाहाल ‘प्रचण्ड’ले मापदण्डविपरीत प्रयोग गरेका सुरक्षाकर्मी फिर्ता गरेको थियो।