काठमाडौं । नेपाली कांग्रेसका वरिष्ठ नेता डा. शेखर कोइरालाले पार्टीको आन्तरिक नेतृत्व परिवर्तनका लागि आगामी निर्वाचनअघि नै महाधिवेशन गर्नुपर्ने आफ्नो अडान दोहो¥याएका छन् । आज (शुक्रबार) बिहान विशालनगरस्थित आफ्नै सम्पर्क कार्यालयमा उपत्यकाका निकटस्थ जिल्ला सभापतिहरूसँगको छलफलमा उनले पुस महिनामै महाधिवेशन सम्पन्न गर्नुपर्ने प्रस्ताव अघि सारेका हुन् ।

डा. कोइरालाका अनुसार कांग्रेसले पुसको तेस्रो सातासम्म समानुपातिकतर्फको उम्मेदवार सूची बुझाइसकेपछि तुरुन्तै महाधिवेशनको तयारी थाल्नु पर्छ । ‘मेरो पहिलो माग निर्वाचनअघि नियमित महाधिवेशन गरेर नयाँ नेतृत्व चयन गर्नुपर्छ भन्ने हो’, छलफलमा सहभागी एक जिल्ला सभापतिले कोइरालाको भनाइ उद्धृत गर्दै सुनाए । उनका अनुसार कोइरालाले पुस २५ गतेसम्म बन्दसूची बुझाएर त्यसपछिका दिनमा महाधिवेशन गर्न सकिने प्रस्ताव अघि सारेका छन् ।

कोइरालाले आउँदो २१ फागुनमा हुने निर्वाचनमा पार्टीले नयाँ नेतृत्व लिएरै जानुपर्छ भन्नेमा आफू स्पष्ट रहेको बताएका छन् । उनका अनुसार यदि वर्तमान केन्द्रीय कार्यसमितिले नियमित महाधिवेशनको निर्णय गर्न असफल भयो भने पार्टी विधानको धारा १७ (२) अनुसार विशेष महाधिवेशन आह्वान गर्ने बाध्यता सिर्जना हुनेछ । ‘नियमित महाधिवेशन नभए, विशेष महाधिवेशन स्वतः हुनुपर्ने प्रावधान कार्यान्वयन गर्नैपर्छ’, उनले स्पष्ट पारे ।

डा. कोइरालाले पार्टीमा हाल देखिएको असन्तुष्टिपूर्ण अवस्थालाई संवाद र एकताको माध्यमबाट समाधान गर्नुपर्ने धारणा पनि राखेका छन् । ‘पार्टीभित्र संवाद नटुटोस् भन्ने मेरो चाहना हो’, उनले भने, ‘शेरबहादुरजी लगायत मभन्दा सिनियर सबै नेतासँग कुरा गरेर पार्टीलाई मिलाएर लैजान्छु । विरोध भयो भनेर म रिसाउँदिनँ, सबैलाई साथ लिएर अघि बढ्नु पर्छ ।’ उनका अनुसार पार्टीभित्र समानान्तर गतिविधि बढ्दा कांग्रेसलाई ठूलो संकटमा पार्ने सम्भावना छ ।

त्यसैले, उनले केन्द्रीय कार्यसमितिलाई निष्कर्षमा पुग्न आग्रह गरे । छलफलमा रूपन्देही, चितवन, खोटाङ, नुवाकोट, धादिङ लगायतका जिल्ला सभापतिहरू, केही पूर्व जिल्ला सभापति, प्रदेश कार्यसमितिका पदाधिकारी तथा केन्द्रीय सदस्यहरू पनि सहभागी थिए ।छलफलमा सहभागी केन्द्रीय सदस्य डा. गोविन्दराज पोखरेल र टेकप्रसाद गुरूङका अनुसार बैठकमा उपस्थित अधिकांश नेताहरूले कोइरालाको प्रस्तावको समर्थन जनाएका थिए । संक्षेपमा, डा. कोइरालाले पार्टीलाई एकजुट बनाएर नयाँ नेतृत्वसहित निर्वाचनमा जानुपर्ने आवश्यकता औंल्याउँदै, महाधिवेशन अब अपरिहार्य भएको सन्देश दिएका छन् ।