काठमाडौं । गायक डा. प्रकाश पौडेलको रमाइलो जनराको गीत ‘बुढा बुढी’को म्युजिक भिडियो सार्वजनिक भएको छ । कुनै समयको बहुचर्चित गीत ‘नाइ मलाई त्यहि केटी चाहिन्छ’ बोलको गीतका सर्जक गायक पौडेलले नेपाली संगीत क्षेत्रमा लागेको २५ वर्ष पूरा भएको अवसरमा शुक्रबार नयाँ गीत बजारमा ल्याएका हुन् ।

गीतमा शब्द र स्वर स्वयं प्रकाश पौडेलको रहेको छ भने अन्य प्रतिभाशाली कलाकारहरूले संगीत सिर्जनामा साथ दिएका छन् । जसमा दीपराज नेयोङहाङले सङ्गीत भरेका छन् भने सूरज श्रेष्ठले एरेन्ज गरेका छन‍् ।

बरिष्ठ संचारकर्मी एवं निर्देशक सुब्रत आचार्यले निर्देशन गरेको आकर्षक म्युजिक भिडियोमा साक्षी लम्साल, कमल सिंह र स्वयं प्रकाश पौडेल फिचर्ड छन् । उत्सव दाहालले छायाङ्कन गरेको भिडियोलाई विकास दाहालले सम्पादन गरेका छन् । यो गीतको रिलिजले पौडेलको २५ वर्षे लामो र सफल सांगीतिक करियरलाई भव्यताका साथ मनाएको छ।

पछिल्लो समय चर्चित ज्योतिषीको समेत परिचय बनाएका गायक पौडेलले लामो ग्याप पछि सांगीतिक क्षेत्रमा कमब्याक गरेका हुन् । पहिलो एल्बम थ्रि मच देखि अहिलेसम्म ६ वटा एल्बम सार्वजनिक गरिसकेका उनले ‘नाइ मलाई त्यहि केटी चाहिन्छ’ गीतका अतिरिक्त ‘कसैलाई नभन्नु ल, कानेखुसी, डक्टर साब भिटामिन लेख्दिनु, घाँस काट्ने खुर्केर, हास्ने गीत हाहाहा, सलाम वालेकुम, भुडेंभुडी, भोली छुट्टी’ लगायतका चर्चित एवं लोकप्रिय गीत गाएका थिए ।