काठमाडौं । नेपाली कांग्रेसका केन्द्रीय सदस्य तथा निवर्तमान गृहमन्त्री रमेश लेखकले जेनजी आन्दोलनका क्रममा भएको राज्य पक्षीय दमनप्रति आफू जिम्मेवार नभएको स्पष्ट पारेका छन् । आज (बुधबार) बसेको नेपाली कांग्रेस केन्द्रीय कार्यसमिति बैठकमा उनले तत्कालीन गृह प्रमुखको रूपमा ‘कुनै अप्रिय घटना नहोस्’ भनेर निरन्तर निर्देशन दिएको भन्दै दमनका लागि आदेश आफूले कहिल्यै नदिएको दाबी गरे ।

‘प्रधानमन्त्री र मन्त्रीले त्यस्तो आदेश दिने कुरा नै होइन, मैले बारम्बार भनेको छु—क्याजुलिटी कुनै हालतमा हुनु हुँदैन,’ लेखकले बैठकमा भने । उनका अनुसार आन्दोलन अगाडि र घटनाको बिहान दुवै प्रहरी प्रमुखलाई सचेत गराइएको थियो । लेखकले हालै अन्तरिम सरकारले आफूलाई स्थानहद निर्धारण र राहदानी रोक्का गरेको विषयमा कुनै पनि औपचारिक जानकारी नदिएको बताएका छन् ।

‘मलाई आजसम्म सरकार वा कुनै निकायले लिखित वा मौखिक रूपमा जानकारी दिएको छैन,’ उनले भने, ‘के कारणले, कुन कानुनका आधारमा र कति अवधिका लागि स्थानहद गरिएको भन्ने थाहा छैन ।’ उनका अनुसार दुई महिना अघि आफू र तत्कालीन प्रधानमन्त्री केपी शर्मा ओलीलाई स्थानहद तोकिएको र पासपोर्ट रोक्का गरिएको कुरा उनले माध्यमहरूबाट मात्र सुनेका हुन् ।

जेनजी आन्दोलनपछि भएको मानवीय क्षतिप्रति नैतिक जिम्मेवारी लिँदै आफूले गृहमन्त्री पदबाट राजीनामा दिने तयारी गरेको तर तत्कालीन प्रधानमन्त्री ओलीले रोकेको पनि लेखकले खुलासा गरेका छन् । ‘भदौ २३ गतेको आन्दोलनपछि मलाई गहिरो पीडा भयो । भोलिपल्टै राजीनामा दिन्छु भनेको थिएँ । प्रधानमन्त्रीले ‘मिल्दैन’ भन्नु भयो, तर म अडिग रहें र अन्ततः लिखित राजीनामा दिएँ,’ लेखकले भने । उनले सामाजिक सञ्जाल बन्द गर्ने निर्णय तत्काल फिर्ता लिन आग्रह गरेको तर ओलीले नमानेको पनि स्मरण गरे ।

पार्टीभित्र विशेष महाधिवेशनको प्रस्तावबारे बोल्दै लेखकले चेतावनी दिए, ‘‘विशेष महाधिवेशन भनेको जंगलभित्र कांग्रेस पस्ने हो, जहाँबाट फर्कने बाटो फरक–फरक हुन्छ र कांग्रेस सग्लो रहँदैन ।’ उनले नियमित महाधिवेशन गर्न सक्ने क्षमता कांग्रेससँग भएकाले विशेष महाधिवेशनको प्रस्ताव फिर्ता गर्नुपर्ने बताए । ‘४० प्रतिशत हस्ताक्षरले माग गर्न सकिन्छ भन्ने प्रावधान छ, तर कार्यविधि र प्रक्रिया अस्पष्ट छन् । यस्तो अन्योलले पार्टीमा दरार ल्याउँछ,’ उनले भने । लेखकले पुसभित्रै क्रियाशील सदस्यता नवीकरण र वितरण सकेर नियमित महाधिवेशन गर्ने तयारीमा लाग्न सबैलाई आग्रह गरे।