बारा । मंगलबार बारा जिल्लाको सिमरामा जेनजी समूह र नेकपा एमाले निकट नेता–कार्यकर्ताबीच भएको झडप र त्यसपछि सिर्जित अवस्था अन्त्यका लागि जिल्ला सुरक्षा समिति बारा र मधेस जेनजी समूहबीच वार्ता सुरू भएको छ । नेपाल प्राविधिक तालिम शिक्षालय पथलैयामा प्रमुख जिल्ला अधिकारी धमेन्द्र कुमार मिश्र, जिल्ला प्रहरी कार्यालयका प्रमुख, सशस्त्र प्रहरी, नेपाली सेना र जेनजी समूह बीच वार्ता सुरु भएको छ ।

सो घटनामा संलग्न दोषीलाई पक्राउ गरी कारबाही गर्नु पर्ने, घाइतेलाई निःशुल्क उपचार गर्नुपर्ने, शान्ति सुरक्षाको प्रत्याभूति गर्नु पर्ने लगाएका विभिन्न माग राख्दै जेन जी समूह वार्तामा सहभागी भएका छन् । यो वार्ता बिहीबार नै बस्ने भनिएको थियो । जिल्ला प्रशासन कार्यालय बाराले वार्तामा डाके पनि जेनजी समूहले बुधबार आफूहरूमाथि कुटपिट गर्ने मुख्य व्यक्ति अरविन्द साहलाई पक्राउ नगरेसम्म वार्ता नगर्ने अडान लिएका थिए ।

प्रहरीले बिहीबार राति साहलाई पक्राउ गरेपछि जेनजी समूह वार्तामा बस्न राजी भएको हो । वार्ताका लागि प्रमुख जिल्ला अधिकारी धर्मेन्द्रकुमार मिश्रसहित जिल्ला सुरक्षा समितिका सदस्यहरू आएका छन् । यही घटना मिलाउन भन्दै युवा तथा खेलकुद मन्त्री बब्लु गुप्ताको नेतृत्वमा सुदन गुरूङ, शिव यादव लगायतको टिम बिहीबारै काठमाडौंबाट जनकपुर गएको थियो । उनीहरूले बिहीबार राति सिमराका आन्दोलनरत जेनजीहरूसँग कुराकानी गरी वार्ताको माहोल बनाएका थिए ।

मन्त्री गुप्ता जनकपुरबाट काठमाडौं फर्किसकेका छन् भने सुदन गुरूङ, शिव यादव लगायतको टिम वार्तामा सहभागी हुन बारा पुगेको बताइएको छ । बुधबार जेनजी समूहलाई एमाले कार्यकर्ताले कुटपिट गरेको भन्दै प्रदर्शन र तोडफोड भएको थियो । स्थिति साम्य पार्न कर्फ्यू लगाउनु परेको थियो । त्यही तनावले बिहीबार पनि निरन्तरता पायो । प्रहरी र जेनजी प्रदर्शनकारीहरूबीच झडप हुँदा हवाई फायर र अश्रुग्यास प्रहार गर्नुपरेको थियो । केही प्रहरी र जेनजी युवा घाइते भएका थिए । झडपका कारण बिहीबार पनि कर्फ्यू लगाउनुपरेको थियो ।

कफ्र्यूकै बीच जेनजी प्रदर्शनकारीले सडक आवागमन ठप्प पारेका थिए । जेनजी समूहले बुधबारको घटनामा आफूहरूमाथि कुटपिट गर्ने सात जनाविरूद्ध प्रहरीमा जाहेरी दिएका थिए । तीमध्ये दुई जनालाई बिहीबार पक्राउ गरिएको थियो । जेनजीहरूले भने मुख्य व्यक्ति साह पक्राउ नपरेसम्म प्रदर्शन जारी राख्ने र वार्तामा नबस्ने अडान लिए । वार्ताको विस्तृत विवरण आउन बाँकी छ ।
तस्वीर : नेपाल फोटो लाइब्रेरी ।